Read Achang ESTHER 6 Bible Online

ESTHER 6 - Achang bible

ESTHER 6

¹Hauh nyens lyis hwankti ka ma yoh yhet, housoeh las nyang munghdan dah hwankti comh buk yoeus los las nyang lyis nghap kyoh das zis zaudang khyoq.

²Hauh maussauh mas hwankti yhen unuk jens mas hwankti yvp jens zungh dah Bigthan yahge Teresh aiq yuk gas hwankti lhyi sat das ge lhaink yvlyis Mordekhai khasoeh nyvng cho bos dah vdoeus mas nghap loh.

³Hwankti ka, haih nyhenshang Mordekhai lyis yang khasoeh teh phauh shangh las chungh zis xauh goeus lah, ge nyei. Nyah jyeidwis jens toeuh zis gas, nyah xiklyis cha eq ma kuot dyei ku, ge.

⁴Hwankti ka, Hwankti yhen mha ngah xamchangh dvyuk yuk vnyeis lah, ge nyei. Haman gas gvshih nyang cicont cuk toh, lhangh sat zains mas Mordekhai lhyi lhangh sat das zis hwankti lyis sang das xiklyis khyam khau mha wvng los jus.

⁵Housoeh las jyeidwis jens phuk taiq zis gas, Heimha Haman gas nvng yah xauhgoh mes las langh nyeis, ge. Hwankti eq nyang wvng los bas jungh, ge.

⁶Housoeh las Haman wvng los las nyang lyis hwankti taiq zis gas, Ngos nyoqnho ngelang svsoh dyei mes dah dius dvyuk nyeis. Ngos haih soeu xiklyis khasoeh kuot chah lah, ge. Housoeh Haman nyang nghamhzo zis gas, Hwankti hou iq nyoqnho ngelang dyei mes soeu hank bos das? Ngos dvnghuot vvng, ge.

⁷Housoeh las Haman hwankti lhyi phuk taiq zis gas, Haih soeu xiklyis Hwankti nvnyang wuot dah dyixing, hwankti buismuk, hwankti ji nyang chi los aq oen zaudang khyoq aq.

⁹Hauh thang lhyi haih zis nah xamchangh kuh thank soeu dvyuk lyis yah nyang lyis gvm huot, nyang ji nhang lha wus vgungs chank yah shwih loh das. Hau xamchangh loh zoh lyis, Hwankti chunghtoq mes soeu lhyi khasoeh phauh shangh yvlyis yoeuh geh, ge taiq hoeuh nhang aq, ge.

¹⁰Housoeh Haman lyis hwankti taiq zis gas, Dyimis yahge ji nyang lvnyap yoeus las haih chungh cho Jew Mordekhai xiklyis kuot dyei aq. Nvng joeui dyei zis yah dvyhangteh dvnganh kuot dyei aq. Nyang lyis hwankti yhen khyam khomhdwang mas tsung toh yvmas xo nyvng das, ge.

¹¹Housoeh las Haman gas dyimis yahge ji nyang yoeus las, Mordekhai lhyi huot. Mordekhai eq nyang thoq mas ji las Haman gas wus vgungs chank yah shwih loh, nyamoq loh zoh lyis dius jens lyis taiq hoeuh zis gas, Hwankti nyoqnho ngelang dyei mes soeu lhyi khasoeh phauh shangh zis yoeuh geh, ge.

¹²Hauh thang lhyi Mordekhai ka hwankti yhen khyam khomh dwang mas tauh los. Haman gas noskyingh zis yah nyoqnho nghop las nyah yhen pheh lvnyap loh.

¹³Haman gas nyah yhensain nyhiq Zeresh yahge dyenschangh jens lyis nyang mas bweh cho dvnganh taiq kyoh. Housoeh nyah yhensain nyhiq yahge nyah dah joeui bos bang nyang lyis taiq zis gas, Nvng gas Mordekhai dah yomsoq lyis somh xi goeus. Nyang gas Jew nghuot las nvng nyang lyis ma yoh ung. Nyang nvng lyis ung das, tsain ge.

¹⁴Nyamoq taiq goh nyeis shih uhlyis, hwankti yhen mha unuk jens gas Haman lyis Esther dah zo pwe mha shwih loh das zis gyen gyen jweh los.