Read Achang ESTHER 7 Bible Online

ESTHER 7 - Achang bible

ESTHER 7

¹Housoeh hwankti yahge Haman gas hwankti nyhiq Esther yah dvgeh zo shuk das zis

²aiq vlhain loh. Zvbiq tsain shuk nyeis lyis hwankti ka Esther lhyi doms nyei, Hwankti nyhiq Esther eh, gvshih nvng cha o zis ngos lyis taiq kyoh aq, yoh das. Ngos nvng lyis Munghdan dvgohyih yangh dyei das, ge.

³Hwankti nyhiq Esther phuk taiq zis gas, Hwankti nhaiqdoeus las, ngos sang zis gyo dyei das nghuot lyis gas, ngah kang yahge ngah vnyau dah kang jenh lhuiq kat dyei nhang mes.

⁴Ngos yahge ngah dius jens gas sat das xiklyis ungh tyamp zis xauh goeus. Jons duot das xiklyis ungh tyamp zis dvnghuot ya, haih cho ngos hwankti lhyi ma thauqkhyi lo, tsoek yah kham nyeis das. Nghuot laus eq gvshih ngamoq gas dom shoq mhont zis xauh lo das, ge.

⁵Housoeh hwankti Xerxes gas hwankti nyhiq Esther lhyi, Heiteh cho womh kuot zis hank nghuot? Haih soeu khalhye nyeis? ge nyei.

⁶Esther phuk taiq zis gas, ngamoq dah jeswus, ngamoq lyis shoeuhshih soeu ka hai lhung dah Haman nghuot, ge. Haman gas gyuk dvn zis yah hwankti yahge hwankti nyhiq lyis yoeuh tsuk toh.

⁷Hwankti ka nhaiqyo zis yah toq las yvp nghe pheh hwankti yhen ban khyam pheh loh. Haman gas haih nyhenshang hwankti nyang lyis joeng lo das zis nghamh thyet goeus zis yoh nyvng. Housoeh nyang nyah kang xiklyis hwankti nyhiq Esther lhyi dung das ge gyoh nyeis khoq.

⁸Nyang gas Esther dah jung mas lains gyoh las nhaiqnyen cho dung das ge kuot uhlyis hwankti ka ban khyam mhayah yvpkhau mha tauh wvng los. Haman kuot cho lhyi hwankti nyvng lyis, nyang kaiq las, Haih soeu ka hai ngah hwankti yhen, ngah xikkhonh mas nyang hwankti nyhiq lyis laihwangh das lhyeh, ge. Hwankti housoeh taiq nyeis lyis unuk jens gas Haman dah uhloms lyis nghop tyamp dyei.

⁹Housoeh hauh bang mas dvyuk Harbona ge soeu taiq zis gas, Haman gas nvng hwankti dah kang kyoeu soeu Mordekhai lyis lhangh sat das xiklyis nyah yhen mas 75 pe nyhang dah lhangh sat zains cuk toh, ge. Hwankti ka, Houmha Haman lyis lhangh sat aq, ge zaudang khyoq.

¹⁰Housoeh las Mordekhai xiklyis cuk toh dah lhangh sat zains mas Haman lyis lhangh tyamp. Housoeh hwankti dah nhaiqyo bi tyamp.