Read Achang DYUNG 10 Bible Online

DYUNG 10 - Achang bible

DYUNG 10

¹Hauh thang lhyi YHENSAIN Moshe lhyi taiq zis gas, Pharao jyank loh aq: khasoeh ge lyis ngos Pharao yahge nyah zau jens lyis ngah yomsoq muh yoh chixoeuq shoq ngos nyamoq dah nhaiqlom lyis than nhang.

²Ngos Egutu bang lyis ngah yomsoq muh yah khasoeh kuot yvlyis nah lo nah nyei jens lyis yoh taiq kyoh das. Housoeh ngos YHENSAIN nghuot yvlyis seq das.

³Housoeh Moshe yahge Aron gas Pharao jyank mas loh las, YHENSAIN Hebre jens dah Mangso heisoeh ge: Nvng ngah o mha gyoh das zis khanhamp jweh shoq ngoek nyeis das lah? Ngah dius jens ngos lyis loh yoh paiq bas jungh, nyamoq lyis loh nhang aq.

⁴Nvng ngah dius jens lyis loh nhang das zis ngoek shih lyis gas, nvpyo ngos nah mau mas janghgyik nhang kat das.

⁵Houka tsoh ma nyvng lo shoq nghop joq das: gyu ma mhont, nyet shih yvlyis eq, nah yos mas nyet shih saiqzains dvnganh lyis eq zo tyamp das.

⁶Hauh janghgyik gas nah hwankti yhen, nah zau jens dvnganh dah yhen, nah dius jens dvnganh dah yhen mha dyingh joq das. Houka namoq dah phauh thyeih moq ma nyvng ku svsoh xungh zis nghuot das, ge taiq lho lha Pharao jyank masyah thuq loh.

⁷Housoeh las Pharao dah zau jens gas nyang lyis, Haih soeu yang lyis khanhamp jweh shoq yau dyei nyeis shih das lah? YHENSAIN, nyamoq dah Mangso lhyi loh paiq bas jungh, yukgis jens lyis loh nhang goh. Egutu mau gonh dyoqbis goeus zis nvng ma soh lhyeh, ge.

⁸Housoeh Moshe yahge Aron lyis Pharao jyank mas doms shwih los las taiq zis gas, YHENSAIN, namoq dah Mangso lhyi loh paiq geh, nghuot laus eq hank hank tsain loh das, ge.

⁹Moshe toeuh zis gas, Ngamoq loh das lyis gas, ngamoq YHENSAIN lhyi chungh pwe kuot das yvmvyah, ngamoq dah loshang jens, lokhoq jens, ngamoq dah loloeu lonyi jens, ngamoq dah yvng shvbeq, noeu phung dvnganh yah dvgeh loh das, ge.

¹⁰Pharao taiq zis gas, Ngos nvng lyis namoq dah loshang jens yahge vmesbih jens lyis ma shwih loh nhang oen YHENSAIN mha maukhi. Houka namoq toeu-nghank das cho da zis bvng bvng nghuot.

¹¹Housoeh ma yoh kuot, namoq o zis yah dvyhangteh YHENSAIN lhyi yukgis jens kyingh loh paiq geh, ge nyah zomh lyis Pharao xikkhonh masyah khat tyamp.

¹²Hauh thang lhyi YHENSAIN Moshe lhyi taiq zis gas, Nah loq Egutu mau thoq mas toeu lha janghgyik she kat aq. Hauh zis gas yuk dah vzains dvnganh, gyutomp bat masyah doeng los zis dvnganh zo tyamp das, ge.

¹³Housoeh las Moshe nyah lhamloq lyis Egutu mau thoq mas toeu lhyi YHENSAIN ka hau dvnyeih dvnyens gonh buisthuq lyeis hauh mau thoq mas muot nhang lha nungsnvp gas hauh lyeis yah janghgyik shwih los.

¹⁴Hauh janghgyik gas Egutu mau gonh los nghop toh. Houka svsoh thoeu lha housoeh teh zis xikpheh ma nyvng ku, thang pheh eq ma doms nyvng ku lo das.

¹⁵Hauh zis gas maunyeis eq noq shoq los nghop toh las gyutomp ma zangh dah zains mas shih dvnganh zo tyamp. Egutu mau gonh mas dah saiqzains yahge pa mha dah anghphoq nyaus zis cha eq ma nyet lo.

¹⁶Housoeh las Pharao gas Moshe yahge Aron lyis lvnyap khi yoeus las taiq zis gas, Ngos YHENSAIN, nah zomh dah Mangso lhyi eq, nah zomh lyis eq shuot goeus.

¹⁷Gvshih hai dvlhain ngah yobos khyuot dyei las, ngah jyank masyah hai xungh dah joeng cho yoeus tyamp dyei bas jungh, YHENSAIN, nah zomh dah Mangso lhyi dung dyei geh, ge.

¹⁸Moshe ka Pharao jyank masyah thuq las YHENSAIN lhyi dung dyei.

¹⁹YHENSAIN eq buisthuq lyeis lyis thaiq las buiswvng lyeis than muot los nhang zis yah janghgyik lyis Thomh Nes mas dvng khyoq tyamp. Egutu mas janghgyik dvdoeu eq ma nyet lo.

²⁰Nghuot laus eq YHENSAIN ka Pharao dah nhaiqlom lyis than nhang lha Israel jens lyis ma loh nhang doms kuot.

²¹Tsai, YHENSAIN Moshe lhyi taiq zis gas, Nah loq maukhung pheh toeu aq, hauh uhlyis yoh wu yoeuh dah chuot zis gas Egutu mau lyis nghop toh das, ge.

²²Moshe ka nyah loq maukhung pheh toeu lhyi, Egutu mas svsoh thoeu shoq chuot joq zis somh nyeih nghuot.

²³Housoeh las Egutu jens nyang changh nyang ma nyvng goh, hauh gyo lyis hank eq vsainnyang yhen mhayah ma yoh thuq loh: nghuot laus eq Israel jens nyeis yvmas gas bvng zis tsain yoh.

²⁴Pharao gas Moshe yahge Aron lyis khi yoeus las taiq zis gas, YHENSAIN lhyi loh paiq geh: namoq dah vmesbih jens, lo jens eq shwih loh geh: nghuot laus eq yvng shvbeq, noeu phung ka heimha nyeis chah, ge.

²⁵Housoeh Moshe toeuh zis gas, YHENSAIN, ngamoq dah Mangso lhyi phudyei das xiklyis gaunyhauq yahge ngheq dyei jyungshuk eq nvng dyei chah.

²⁶Ngamoq dah gaunyhauq eq komp loh das, dvdoeu eq ma nyhet toh khoq das: khasoeh ge lyis ngamoq hou mhayah khyen yoeus las YHENSAIN, ngamoq dah Mangso lhyi paiq phuqsoe das: houmha ma jweh shih lyis YHENSAIN lhyi khah zis sat ngheq dyei das zis gas ngamoq ma seq, ge.

²⁷YHENSAIN ka Pharao dah nhaiqlom lyis than nhang lha nyang nyamoq lyis ma mes loh nhang.

²⁸Nyang Moshe lhyi taiq zis gas, Ngah nyoqlvtjvng masyah thuq loh aq, nvng ngos lyis khanhamp eq vlos nyvng nhang lo. Ngos nvng lyis nyvng nyeih lyis, nvng shei das, ge.

²⁹Moshe toeuh zis gas, Nvng taiq zis jus goeus. Ngos nah nyoqnho lhyi khanhamp eq ma doms nyvng lo das, ge.