Read Achang DYUNG 17 Bible Online

DYUNG 17 - Achang bible

DYUNG 17

¹YHENSAIN dah vmingh vgus, Israel jens moqphung gonh Sin mhanhdyvp masyah thuq, dvjoq dvjoq cheh las Rephidim mas thoeng toh. Nghuot laus eq houmha shuk jeis ma joq.

²Nyamoq Moshe lhyi lop zis gas, Ngamoq lyis shuk das jeis dyei aq, ge. Moshe phuk taiq zis gas, Namoq chamus ngos lyis lop nyeis goh? YHENSAIN lhyi chamus shih yoeuh goh, ge.

³Nghuot laus eq dius jens jeis svsoh shet las Moshe lhyi tsoq lop. Nyamoq taiq, Nvng ngamoq lyis Egutu masyah chamus shwih los? Ngamoq lyis eq, ngamoq lo jens lyis eq, ngamoq gaunyhauq jens lyis eq jeis shet shei nhang das oen lhyeh, ge.

⁴Moshe YHENSAIN lhyi khyoeuq dung zis gas, Ngos haih bang lyis khasoeh kuot das lah? Ngos lyis lukzains yah doeuh sat bah ge goeus, ge.

⁵YHENSAIN Moshe lhyi taiq zis gas, Nvng Israel uhshe bang dvyhamh shwih las dius jens xik pheh loh aq. Hau Nile lvng lyis lyuk dah lhamloq yoeus chi aq.

⁶Horeb boms dah luk-uk thoq mas ngos nah xik mas yap joq das. Nvng hauh luk lyis lyuk aq, hou mhayah dius jens shuk das nyhenshang jeis yaus thuq los das, ge. Moshe eq Israel uhshe bang dah nyoqlvtjvng mas housoeh kuot.

⁷Houmha Israel jens gas lop zis yah, YHENSAIN yang yah dvgeh nyeis au ma nyeis au ge nyei las YHENSAIN lhyi shi yoeuh yvmvyah hauh joqyos lyis Masa[8] ge eq, Meriba[9] ge eq nyhink.

⁸Amalek jens gas Rephidim mas Israel jens lyis jes los zan.

⁹Moshe Yoshua lyis taiq zis gas, Dius dvyhamh khyen lha nvpyo Amalek lyis loh zan aq. Mangso ngos lyis chi aq ge taiq toh dah lhamloq chi lha ngos jing thyoh mas yap joq das, ge.

¹⁰Yoshua gas Moshe nyang lyis tying toh vgus kuot las Amalek lyis zan das xiklyis loh. Hauh uhlyis Moshe, Aron, Hur moq gas hauh jing thyoh mas doq loh.

¹¹Moshe dah loq toeu toh lyis Israel jens ung; nyah loq khyoq goeus ya Amalek jens ung xi los.

¹²Nghuot laus eq Moshe loq nyung los las, Aron yahge Hur gas luk dvlom mas nyang lyis tsung nhang lha nyah loq lyis nyah zomh dvshot dvyuk, buiswvng shoq bos thuk toeu toh dyei.

¹³Housoeh Yoshua gas Amalek jens lyis dvnganh yoh ung tyamp.

¹⁴Hauh thang lhyi YHENSAIN Moshe lhyi taiq zis gas, Haih ung cho lhyi soh das xiklyis maussauh mas lhaih toh aq. Ngos Amalek lyis thank shoq mhont tyamp das cho Yoshua lyis taiq kyoh aq, ge.

¹⁵Moshe eq phon ci lha hauh yvlyis, YHENSAIN ka ngos lyis ung cho dyei soeu nghuot, ge nyhink.

¹⁶Nyang taiq zis gas, Ngos YHENSAIN lhyi nges toh yvmvyah YHENSAIN ka Amalek lyis tsoq las vcaiq vto jeszan das, ge.