Read Achang DYUNG 19 Bible Online

DYUNG 19 - Achang bible

DYUNG 19

¹Israel jens gas Rephidim masyah thuq las, Egutu masyah thuq thang lhyi lhamhmuh somh vkhyvp canh dvnyeih lyis Sina mhanhdyvp mas jweh loh. Nyamoq hau Sina boms khyei mha tsain thoeng nyeis.

³Moshe ka Mangso yah xauhgoh das xiklyis boms mas doq loh. YHENSAIN eq hauh boms masyah nyang lyis lui las, Nvng Yakop dah diusjangh caiq Israel jens lyis heisoeh taiq aq.

⁴Ngos YHENSAIN Egutu bang lyis cha kuot cho yahge ngos namoq lyis ngah jyank mas zonsmuh gas nyah lo lyis nyah dungs thoq mas kih dvng teh shwih los yvlyis namoq nyvng goeus.

⁵Gvshih namoq ngah domsyos gyo las ngah thanghchvp chank nyeis lyis gas, namoq ngah dius nyau duot das. Nyeisjvng gonh ngah zis nghuot laus eq namoq gas ngos khyen yoeus dah dius nyau nghuot das.

⁶Namoq kyingh ngos yah sen bang nghuot las, ngah munghdan mas dah phudyei bang yahge gyingshang dius nyau duot das. Nvng Israel jens lyis haih dang taiq chah, ge.

⁷Housoeh Moshe gyoh los las dius jens dah uhshe bang lyis khi tsainh las YHENSAIN nyang lyis tyingtoh dang dvnganh nyamoq lyis taiq kyoh.

⁸Dius jens dvnganh eq, YHENSAIN taiq ya taiq zis ngamoq kuot das, ge chomp toeuh. Moshe eq haih zis YHENSAIN lhyi taiq kyoh.

⁹YHENSAIN Moshe lhyi taiq zis gas, Ngos jyommauh puk masyah nah jyank mas los das. Housoeh las ngos nvng yah jisgoh zis dius jens xauhgyo das las gvshih masyah nvng lyis lomsjingh das, ge. Moshe ka dius jens khasoeh toeuh cho YHENSAIN lhyi taiq kyoh.

¹⁰YHENSAIN nyang lyis taiq zis gas, Dius jens jyank mas loh las, khvnyhik phvnaq nyeihyo shishenh yoeus las paiq das nyhenshang nyamoq cheihshang yoeus geh, oen taiq aq. Nyamoq dah dyimis cheih chah.

¹¹Sangphoq nyeihyo nyamoq cicont nghuot bas jungh: hauh nyeih lyis dius jens yoh nyvng dah Sina boms mas ngos gyoh los das.

¹²Boms lhaink las dius jens ma gis lai dah vjyih kuot toh aq. Boms mas vdoq loh goh, oen taiq toh aq. Houmha yangh vni loh goh. Dvyuk yuk houmha khyei khyoq lyis hauh soeu ka sat zis xauh chah.

¹³Nyang lyis hank loq yah eq ma tanh, luk yah doeuh, nghuot ya lyei yah (nyo) baiq sat chah. Dius eq gaunyhauq eq shei chah. Lvbuh muot lyis dius jens boms mas dvyoh ni loh das, ge.

¹⁴Hauh thang lhyi Moshe ka hauh boms masyah gyoh loh las dius jens lyis paiq cho cicont kuot das nyhenshang taiq. Housoeh las nyamoq dyimis tsain cheih.

¹⁵Nyang dius jens lyis taiq, Somh vnyeih lyis cicont kuot geh. Hauh gyo lyis vmesbih yah vzomhgoh goh, ge.

¹⁶Somh vnyeih nvp lyis maujau jau, maunyoq nyik las hauh boms thoq mas jyommauh thoeu thoeu thuq los. Lvbuh thwe than nyings zis xauhgyo. Dius jens dvnganhmoq gyuk las nvn nyeis.

¹⁷Moshe ka nyamoq lyis Mangso yah xauhgoh das xiklyis dvp masyah shwih thuq. Nyamoq eq boms khyei mha yap joq.

¹⁸YHENSAIN ka nyi yah Sina boms thoq mas gyoh los yvmvyah, hau dvboms gonh nyikhauh nhoenk toh. Hauh nyikhauh gas nyitsau mha nyikhauh teh nhoenk doq loh las dius jens dvnganh svsoh nvn nyeis.

¹⁹Hauh lvbuh thwe zes zes nyings los. Moshe dang jis lyis, Mangso ka nyang lyis maujau thwe yah phuk taiq.

²⁰YHENSAIN ka Sina boms thyoh mas gyoh los las, Moshe lhyi hauh boms thyoh mas khi. Moshe eq houmha doq loh.

²¹YHENSAIN Moshe lhyi taiq, Dius jens ngos lyis yoeuh das ge vkyo mha ma lai bas jungh nyamoq lyis zaih nhang das zis gyoh loh aq. Nyamoq lai lyis nyoshoq shei das.

²²Ngah jyank mas ni los dah phudyei bang yangh nyamoq nyang cheihshang chah, ma nghuot lyis ngos nyamoq lyis joeng das, ge.

²³Moshe YHENSAIN lhyi taiq zis gas, Dius jens Sina boms mas ma yoh doq los das. Khasoeh ge lyis nvng ngamoq lyis hauh boms gyingshang yvlyis nghamh yoeuh aq, lho lhyi boms lhaink kyoq toh aq, ge tying toh, ge.

²⁴YHENSAIN toeuh zis gas, Nvng gyoh loh las Aron lyis shwih doq los aq; nghuot laus eq phudyei bang yahge dius jens gas ngah jyank doq los das ge, vkyo mhayah ma gis lai wvng los; ma nghuot lyis gas ngos nyamoq lyis joeng das, ge.

²⁵Housoeh las Moshe ka dius jens jyank mas gyoh loh las YHENSAIN taiq kat yvlyis taiq kyoh.