Read Achang DYUNG 2 Bible Online

DYUNG 2 - Achang bible

DYUNG 2

¹Gvshih Israel vnyau Lewi vkoq vbusbih dvyuk gas Lewi vmesbih dvyuk lyis phoengh hwank.

²Hauh vmesbih ung mha loshang chi lha yukgis lo khoeu los. Hauh loshang yungh yvlyis nyah ungwes nyvng las nyang lyis lhamhmuh somh khyvp shung toh.

³Hauh thang lhyi ma yoh shung lo lyis, jvmbu kyunk yoq las jyeih yahge saiq gyei cauh lho lha houmha loshang kat las Nile lvng yvm jvmbu gyomh mas nyoeu nhang toh.

⁴Nyah vbi eq nyang khasoeh bweh zis yoeuh das ge we we mas yap joq.

⁵Hauh uhlyis Pharao dah lonyi gas gungs cheih das ge Nile lvng pheh e loh. Nyang nyah jons nyhiq jens yah dvgeh jeislvng jyankyvm chank yah loh nyeis lyis jvmbu gyomh mas kyunk dvkoeuq lyis nyvng las nyah jyeidwis vmesbih lyis e yoeus los nhang.

⁶Kyunk nyheih phank yoeuh lyis nyang hauh loshang lhyi nyvng, yoeuh aq, hauh loshang eq ngaus nyeis. Housoeh nyang nhaiqnyen las taiq zis gas, Heika Hebre lo nghuot, ge.

⁷Nyah vbi eq Pharao lonyi lyis, Ngos nah xiklyis hauh loshang lhyi nauh gvmshuk das Hebre vmesbih dvyuk loh lhung dyei bah lheih, ge.

⁸Pharao lonyi eq, Loh lhung dyei aq, ge nhang kat lyis, hauh nyelo gas hauh loshang dah ungwes lyis loh shwih los dyei.

⁹Housoeh las Pharao lonyi gas, Nvng ngah xiklyis haih loshang loh shwih nyhoeu dyei aq, ngos nvng lyis uhkung phauh dyei das, ge kat zis yah dvyhangteh hauh vmesbih eq loshang yoeus loh las nauh gvmshuk dyei.

¹⁰Hauh loshang kuh los goeus ya, Pharao lonyi jyank mas shwih kat dyei las, nyah lo duot nyeis. Nyang hauh loshang lhyi Moshe ge nyhink. Houka, Ngos, nyang lyis jeis masyah siq yoeus ge zis nghuot.

¹¹Moshe kuh los lyis, nyah vnyau muh changh zwi nyeis yvlyis e yoeuh. Egutu dius dvyuk nyah vnyau Hebre dvyuk lyis bat nyeis zis nyvng.

¹²Nyang vyvm vwi yoeuh lyis hank eq ma nyvng las Egutu dius lyis sat las sihsho yos mas shung.

¹³Nungs nyeih nyang doms thuq loh lyis Hebre aiq yuk bat goh nyeis las nyang gas shuot vyuk lyis, Nvng dyenschangh phoq lyis chamus bat, ge.

¹⁴Hauh soeu ka, Nvng lyis ngamoq thoq mas guon soeu yahge soetuon soeu hank kuot nhang? Nvng hau Egutu dius lyis sat teh ngos lyis eq sat bah oen sont lhyeh, ge toeuh. Housoeh las Moshe ka jyoengh haih cho vthang thuq soh bos goeus ge gyuk nyeis.

¹⁵Hauh cho Pharao xauhgyo lyis Moshe lhyi sat das ge xo nyeis. Moshe ka Pharao jyank masyah Midian mau mas loh phang nyeis. Houmha jweh lyis nyang jeis dwang dvkoeuq nvm mas loh no nyeis.

¹⁶Gvshih Midian phudyei soeu ka lonyi nyhet yuk yoh. Nyamoq gas nyamoq uwus dah yvng shvbeq khom lhyi jeis gvmshuk das ge lang mas jeis tsain kham tyink.

¹⁷Yvng yoeuh bang gas nyamoq lyis khat tyamp. Moshe ka nyelo jens dah yvng shvbeq khom lhyi jeis toq bos pangh gvmshuk.

¹⁸Nyamoq gas nyamoq uwus Reuel jyank mas jweh lyis, uwus gas, Khvnyhik namoq chamus hei iq noq jweh los goh lah, ge lhom nyei.

¹⁹Nyamoq gas, Egutu dius dvyuk ngamoq lyis yvng yoeuh bang loq masyah khyuot las, ngamoq dah yvng shvbeq phung lhyi jeis luk shoq bos kham gvmshuk, ge taiq kyoh.

²⁰Nyang gas nyah lonyi jens lyis, Nyang khalhye nyeis? Nyang lyis chamus toh khoq? Nyang lyis e khi los geh, wom zo bas jungh, ge.

²¹Moshe hauh soeu jyank mas nyeis mes las nyang nyah lonyi Zipora Moshe lhyi dyeizo.

²²Zipora eq yukgis lo khoeu lha, Moshe ka, Ngos lvbaus mau mas boengh duot nyeis ge, nyang lyis Gershom ge nyhink.

²³Buisnyeis nyangh shoq thang lhyi Egutu hwankti shei goeus. Israel jens eq hau jons duot yvwons gvng mas noskyingh ngaus nyeis. Nyamoq jons duot las pangh aq ge dung dang gas nyamoq dah Mangso jyank jweh bangh loh.

²⁴Nyamoq noskyingh dang Mangso xauhgyo dyei las, Abraham, Isak, Yakop moq yah toh dah thanghchvp lyis soh.

²⁵Mangso ka Israel jens lyis yoeuh las, nyamoq dah chojeis lyis pangh.