Read Achang DYUNG 22 Bible Online

DYUNG 22 - Achang bible

DYUNG 22

¹Dvyuk yuk noeu, yvng dvja ja khauh las, hauh yvlyis sat laus eq, ungh laus eq, noeu dvdoeu mas noeu oeng doeu, yvng dvdoeu mas yvng nyei doeu khyauh chah.

²Khauh soeu ka nyang khauh zis doms dyei chah. Nyang cha ma yoh lyis gas, nyang khauh loh vyhang xiklyis nyah gungs lyis jons khyvlyis ungh tyamp chah. Nyang khauh loh noeu, mauhlyihzoe, yvng cha nghuot nghuot nyang sain yvmas vdwis nyvng lyis gas, nyang dvdoeu mas aiq doeu khyauh chah. Khauh soeu nyenh lyis yhen thyoq nyeis yvmas xauh nyhik las sat zis xauh laus eq sat soeu dius sat yobos ma bos. Nghuot laus eq nyeih lyis nghuot lyis gas nyang dius sat yobos bos.

⁵Dvyuk yuk nyah gaunyhauq lyis nyah yos mas, zvbiq khyam mha kat tsoh masyah whang loh las gohyuk dah yos mas, zvbiq khyam mha loh zo dyei lyis, gaunyhauq sain ka nyah yos, nyah khyam mha dah gis thank jyo[12] cap chah.

⁶Dvyuk yuk nyah yos mas nyi ngheq las mhanh masyah gohyuk dah yos mas ngeh las gukyos, gukphu, guk dain mas ngeh loh lyis nyi ngheq kat soeu hau yuonh loh yvlyis cap chah.

⁷Dvyuk yuk nyah yhenkyoh jyank mas ngwis xing phauhdap vyhang tsomh toh nhang lha, tsomh dyei soeu yhen mhayah khauh thyuk lyis, khauh soeu lhyi nyvng lyis gas, khauh soeu aiq huon khyauh chah.

⁸Khauh soeu ma nyvng kat lyis gas, tsomh dyei soeu nyang, yhenkyoh dah zisyos ma yoeus cho, shvmanh dung joqyos mas kyamp xauh tang das.

⁹Noeu, mauhlyihzoe, yvng, dyimis teh zis yahge dyuk dah vyhang dvja ja bos dah zisyos kyahsoe cho mha xam ma xonhgoh cho dah soe khanghmuh gas tsomh dyei soeu yahge tsomh nhang soeu aiq yuk yah shvmanh dung joqyos mas jweh las yobos bos, ge thyet dyei zis xauh soeu ka thyi gohtoeu dvyuk lyis mon dah phauh mas aiq huon khyauh chah.

¹⁰Dvyuk yuk nyah yhenkyoh lyis, Bos yoeuh dyei aq, ge nyah mauhlyihzoe, noeu, yvng dvja ja tsomh nhang toh yvmas, shei laus eq, gudwvng laus eq, komp loh dyuk laus eq, houmha kanghjyoeng ma bos lyis gas,

¹¹Tsomh dyei soeu ka, yhenkyoh dah gaunyhauq nyang ma yoeus cho Shvmanh dung joqyos mas kyamptang lyis gaunyhauq sain lhom yoeus chah. Tsomh dyei soeu eq ma cap noh.

¹²Nghuot laus eq hauh gaunyhauq khauh loh nghuot lyis gas nyang gaunyhauq sain lhyi khyauh chah.

¹³Yewus ngatzo nghuot lyis gas kanghjyoeng xiklyis shohkhyamh chi los chah. Ngatzo dah nyhenshang nyang ma khyauh noh.

¹⁴Dvyuk yuk yhenkyoh jyank masyah gaunyhauq nghoh las yhensain yah dvgeh ma nghuot uhlyis shei, nghuot ya gudwvng lyis gas, nyang khyauh chah.

¹⁵Nghuot laus eq gaunyhauq sain nyvng yvmas bweh lyis gas nghoh soeu ma cap noh. Noeu khoq nghuot lyis gas khoq phauh kyingh dvsang das.

¹⁶Dvyuk yuk gas hank ma kwank shih dah lonyi gyingh lyis chuq las nyang yah yhet lyis, nyang lyis phauh kat las yoeus nyang yoeus chah.

¹⁷Nghuot laus eq nyah uwus ma dyeizo mes lyis gas lonyi phauh dyei chah nyhoq ngwis khyauh chah.

¹⁸Jonzwi vmesbih hank lyis laus eq sat chah.

¹⁹Gaunyhauq yah zomhgoh soeu hank lyis laus eq sat chah.

²⁰Ngos YHENSAIN mha lai las gohtoeu mangso lhyi phudyei soeu ka shank shoq dyoqbis das.

²¹Namoq Egutu mas boengh duot ku yvlyis soh las boenghwus lyis vzaiq.

²²Chauhmuh chauhlo hank lyis eq vzaiq

²³Nvng nyamoq lyis zaiq las nyamoq ngos lyis pangh aq ge lui lyis ngos YHENSAIN nyamoq dah dang gyo dyei das.

²⁴Housoeh ngos nhaiqyo zis yah nvng lyis jes mas sat das. Namoq dah yhensain nyhiq jens chauhmuh muh las, namoq dah lo jens eq chauhlo duot das.

²⁵Nvng ngah dius jens shohjyen bang lyis ngwis jyeih dyei lyis gas, ngwis jyeih zo soeu teh vkuot, ngwis lhyi vsang.

²⁶Nvng dvyuk yuk los tank toh dah shanhzoe lyis buis ma wvng shih lyis nyang lyis doms dyei chah.

²⁷Khasoeh ge lyis nyang wuot yhet das zis hou kyingh dvnghuot. Nyang cha wuot yhet das? Ngos gas nhaiqnyen soeu nghuot yvmvyah, nyang ngos lyis pangh aq ge dung lyis ngos gyo dyei das.

²⁸Nvng Mangso lhyi goes vsang, nah dius dah uhshe soeu lhyi vnhoengh.

²⁹Nah jyo, nah zvbiq yoh los lyis hou mhayah ngos lyis dyei aq. Nah yukgis lomons ngos lyis dyei aq.

³⁰Nah noeu eq yvng eq cangxeih suot zis ngos lyis dyei aq. Cangxeih suot dah vlus lyis nyah ungwes yah nyhet nyeih toh las, xet vnyeih lyis hauh zis ngos lyis los dyei aq.

³¹Namoq ngah gyingshang dius nghuot las, namoq gas yewus ngat sat shoh vzo goh, houka lvkhuih lyis doeuh dyei geh.