Read Achang DYUNG 23 Bible Online

DYUNG 23 - Achang bible

DYUNG 23

¹Nvng ma ying loeus vhoeuh. Yobos bos soeu ma ying kanghjyoeng kat yvmas vpangh.

²Ma gis muh kuot das zis dius nyo shot vdap. Soetuon cho mha lyi bos yvlyis thyoq das zis dius nyo shot kanghjyoeng vkat.

³Nyungs soeu lhyi nyah soe mha lyi yah dvyhangteh tuon aq.

⁴Nvng nah jeswus dah noeu, mauhlyihzoe chowhang whang loh zis zangh nyvng lyis nyah jyank mas loh komp kat dyei aq.

⁵Nyah mauhlyihzoe tu yah lains nyih joq zis zangh nyvng lyis hauh yvlyis vlai toh khoq, bos toeu tsung dyei aq.

⁶Soetuon jang mas nyungs soeu soe bos lyis nvng ma jyoeng khyvlyis soe vtuon dyei.

⁷Lyi ma bos dah kauq cho vgyo dyei, yobos ma bos soeu lhyi vsat. Khasoeh ge lyis housoeh teh ma gis zis kuot soeu hank lyis laus eq ngos dang thang thyet das.

⁸Nvng khauwhot vzo, hauh ja khauwhot gas dius jens dah nyoq lyis jet nhang lha jus cho lhyi ma nyvng, yobos ma bos bang lyis dyoqbis nhang.

⁹Nvng boenghwus lyis vzaiq; namoq Egutu mas boengh duot ku yvmvyah namoq boenghwus dah ehnyet seq.

¹⁰Nvng nah maunyeis mas khyuk zvn top xoh las shih los zis yhomh yoeus.

¹¹Nghuot laus eq nyhet vzvn lyis hwangh toh bas jungh. Houmha yuk los zis cha eq ma yhomh bas jungh, shohjyen bang yoeus zo bas jungh, nyet goeu gas yewus tsain zo bas jungh. Nah zvbiq khyam yahge tsanlun khyam lhyi eq housoeh kuot aq.

¹²Dvdaus lyis khyuk nyeih muh zwi aq, nghuot laus eq nyhet vnyeih lyis muh vzwi. Housoeh lyis nah jons jens, nah xiklyis muh zwi dah gohmau bang yahge nah gaunyhauq jens yoh no das.

¹³Ngos YHENSAIN namoq lyis taiq ya taiq yvlyis gyo yoeus geh. Gohtoeu mangso lhyi vdung goh, nyamoq dah nyings yangh vyoeus goh.

¹⁴Nvng ngos lyis chungh das zis dvzvn lyis somh lhain pwe kuot chah.

¹⁵Nvng Egutu masyah thuq los Abi khyvp lyis ngos nvng lyis taiq toh vgus hau bicheih ma bos ohlhyoq zo pwe kuot chah. Haih pwe nyhet nyeih gyo lyis bicheih kat ohlhyoq ma gis zo. Jyungshuk ma chi ngah jyank mas hank eq ma gis thuq xoeuq.

¹⁶Nah jyo yhomh xi uhlyis Jyo Yhomh Pwe kuot aq. Cungh thuq zoh, nah zvbiq khyam mha jyo dye yhomh uhlyis Phunk Pwe eq kuot chah.

¹⁷Zvn khanghmuh haih pwe somh koeuq mas namoq dah vbusbih jens dvnganh ngos YHENSAIN, nah Mangso lhyi los paiq chah.

¹⁸Ngos lyis gaunyhauq yah phudyei uhlyis bicheih bos dah ohlhyoq vdyei. Haih pwe jens gyo lyis ngos lyis phudyei dah gaunyhauq coeu lhyi nungsnvp jweh shoq vtoh.

¹⁹Zvn yau zvn nvng cangxeih yhomh dah jyo lhyi YHENSAIN, nah Mangso yhen mha chi los chah. Yvnglo, nghuot ya beqlo lyis nyah ungwes nauh yah vjyauq.

²⁰Ngos sont toh dah joqyos mas nvng lyis shwih loh lyis cho mha gomh das nyhenshang nah xik pheh loeuswons soeu nhang kat.

²¹Nyah dang gyo aq, nyah domsyos gyo aq, nyang lyis tyi lha gomloeus vtoq; khasoeh ge lyis nyang lyis ngos nhang kat las nvng housoeh teh gomloeus toq cho lhyi ma yoh khyuot dyei das:

²²Nghuot laus eq nvng nyah domsyos gyo las ngos taiq zis dvnganh chank kuot lyis gas ngos nah jeswus dvnganh lyis zan das.

²³Ngah loeuswons soeu nah xik pheh loh las Amori, Hiti, Perizi, Khanan, Hiwi, Yebusi dius jens nyeis mau mas nvng lyis shwih loh las nyamoq lyis mhont tyamp das.

²⁴Namoq nyamoq dah mangso jens lyis vpaiq goh; nyamoq dah paiq cho lhyi vxuq goh. Nyamoq dah mangso jens lyis mhont tyamp geh, nyamoq gyingshang lukzains jens lyis tsain thyoq khyoq geh.

²⁵Ngos YHENSAIN, nah Mangso lhyi paiq lyis gas, namoq lyis zonoms shukphoh shvmanh dyei das. Namoq dah noslom lyis ngos wes tyamp dyei das.

²⁶Nah mau mas loshuot zis ma bos, nghuot ya vthonh ma bos das. Ngos namoq lyis kang xing nhang das.

²⁷Ngos nah jeswus lyis ngos lyis gyuk nhang das; nvng zan nyeis bang lyis nhaiqchuot nhang das. Nah jeswus dvnganh lyis nungs phuk phang loh nhang das.

²⁸Ngos nah jeswus lyis nyetlos nyettant yaukyenh nhang das. Nah cho mhayah Khanan yahge Hiti jens, Hiwi jens lyis khat tyamp das.

²⁹Ngos nyamoq lyis dvzvn dvm lyis ma khat thuq tyamp das. Khat thuq lyis gas, hauh mau jyamhjyuklhyuk mus las nah xiklyis yewus nyo dyingh das.

³⁰Hauh gungsthaiq nvng jebais los las mau gonh yoh sain buisnyeis jweh shoq ngos nyamoq lyis dvtsiq dvtsiq zohyah khat tyamp das.

³¹Ngos nah maukyo lhyi Thomh Nes guih masyah Mediteranean thomh jweh shoq, hauh mhanhdyvp masyah Uphrat lvng jweh shoq toh das. Hauh mau mas bang lyis nah loq mas kyauh las, nvng nyamoq lyis khat tyamp das.

³²Nyamoq yah eq, nyamoq dah mangso jens yah eq thanghchvp vtoh.

³³Hauh bang lyis namoq dah mau mas vnyeis nhang. Nyeis nhang lhyi ka nyamoq gas namoq lyis ngos lyis shuot nhang das. Nvng nyamoq dah mangso lhyi paiq lyis gas houka nah xiklyis lhyik mas nyih teh bweh das, ge.