Read Achang DYUNG 25 Bible Online

DYUNG 25 - Achang bible

DYUNG 25

¹YHENSAIN Moshe lhyi taiq zis gas,

²Israel jens ngah jyank mas jyungshuk chi los das xiklyis taiq aq. Dyei mes soeu khanghmuh jyank masyah jyungshuk lhom yoeus toh geh.

³Hauh vlu jyungshuk gas: ngwis, xing, thunk;

⁴Misyhwiq seh; sauhkhying vlanh, nesnoq, vnes; beqmauh yah kuot misseh;

⁵cauh nes toh dah yvnglus yeis; shohyeis yungh; akhesha saiq;

⁶nyituonh coeu; juot coeu yahge xangh coeu;

⁷unuk luk yahge phudyei zainsmuh dah ephod dyi yahge sainhkhonh nghop mas tap das dah phauhdap luk tsain nghuot.

⁸Ngos nyamoq jyank mas nyeis das zis, nyamoq ngah xiklyis gyingshang Zvng kuot chah.

⁹Ngos nvng lyis chixoeuq das nghamh toeuq cho yah dvyhangteh hauh zvng yahge houmha dah kyahsoe dvnganh yvlyis namoq kuot chah.

¹⁰[13] Akhesha saiq yah xing choeu loq 45 shih, khonh choeu loq 27 shih, nyhang choeu loq 27 shih bos dah kwi dvlom tsuk aq.

¹¹Hauh yvlyis vkhau vthoq xing gyingh yah kyop aq. Hauh vthoq vzam chank xing yah khomp toh aq.

¹²Xing khwank nyei koeuq kuot las, hauh kwi khyei nyei koeuq mas, dvshot aiq koeuq koeuq tap toh aq.

¹³Akhesha saiq yah tanzoe tsain kuot las hauh yvlyis xing yah kyop las,

¹⁴kwi dvng das xiklyis kwi dah thyishot haqshot mas dah vkhwank mas tanzoe tsain jauh toh chah.

¹⁵Hauh tanzoe lyis kwi dah xing khwank masyah ma she tyamp tyamp vjangh jauh toh chah.

¹⁶Ngos nvng lyis dyei toh das tyingtoh dang lhaih toh dah luk aiq lhyoq lyis hauh kwi mha kat toh chah.

¹⁷Hauh kwi nyhenshang nvng xing gyingh yah vnghop dvkoeuq kuot chah; hauh zis xing choeu loq 45 shih, khonh choeu loq 27 shih nghuot chah.

¹⁸Hau vnghop thoq dah vthang aiq shot mas dungs dap dah xing Kherubim[14] aiq koeuq kuot las tap chah.

¹⁹Vthang aiq shot mas dvshot dvkoeuq kuot tap toh aq. Housoeh hauh zis gas vnghop yah dvgungs teh nghuot das.

²⁰Hau Kherubim aiq koeuq gas nyoqnho changh xoeu goh toh. Houmha nyamoq dungs tsain tyo lha vnghop lyis nghop toh.

²¹Kwi khau mha hau luk aiq lhyoq kat lho lha hauh thoq mas hau vnghop nghop toh aq.

²²Houmha ngos nvng yah xauhgoh las kwi nghop thoq mas dah Kherubim aiq koeuq dah vjo mas Israel dius jens xiklyis lyi dvnganh ngos nvng lyis dyei das.

²³Akhesha saiq yah xing choeu loq 36 shih, khonh choeu loq 18 shih, nyhang choeu loq 27 shih bos dah kihgus dvkoeuq kuot aq.

²⁴Hauh yvlyis xing gyingh yah kyop las, yvmlhaink xing yah dungh toh chah.

²⁵Hauh kihgus yvmlhaink yah loq somh shih vkhomp toh las, hauh yvlyis xing yah shauq toh chah.

²⁶Hauh nyhenshang xing khwank nyei koeuq kuot las, nyei thunk kihgus dah khyei mas tsain tap toh chah.

²⁷Hauh kihgus dvng das xiklyis tanzoe jauh gus vkhomp nvm mas vkhwank tsain tap toh chah.

²⁸Hauh kihgus dvng das xiklyis nvng akhesha saiq yah tanzoe kuot las xing yah kyop chah.

²⁹Zvbiq jyungshuk xiklyis yhung das bvn, kom, jywang yahge khuq tsain kuot chah. Hau dvnganh lyis xing gyingh yah kuot chah.

³⁰Hau kihgus lyis Thanghchvp Kwi xikkhonh mas toh las hauh thoq mas ngos lyis dyei dah gyingshang ohlhyoq vjangh kih toh chah.

³¹Xing gyingh yah nyituonh gus dvkoeuq kuot chah. Hauh vkhyei, vyau, shunk dah ban, vlhaink yahge vbuh lyis dvzwvng kyingh kuot las bat chah.

³²Hauh vzwvng mas dvshot somh ko ko mulas khyuk ko thuq joq das.

³³Nyituonh gus vko khyuk koeuq mas, dvko mha batan buh buh teh vlhaink somh koeuq, vbuh somh koeuq dvgeh shunk toh.

³⁴Hau nyituonh gus vgungs vyau mas eq batan buh teh vlhaink nyei koeuq, vbuh nyei koeuq dvgeh shunk toh chah.

³⁵Vko somh zomh mas dvzomh dvzomh dah o mha vlhaink dvkoeuq koeuq bos chah.

³⁶Hauh vlhaink, vko yahge nyituonh gus lyis xing gyingh yah dvkoeuq teh bat chah.

³⁷Hau nyituonh gus xiklyis nyitoengh nyhet koeuq kuot las kih toh chah. Housoeh lyis xikkhonh mas bvng joq das.

³⁸Nyvp yahge bvnlywas eq xing gyingh yah kuot chah.

³⁹Nyituonh gus yahge nyah kyahsoe dvnganh lyis xing gyingh 75 paung yah kuot chah.

⁴⁰Ngos nvng lyis boms mas chixoeuq goeus yikhyoh vgus, hau dvnganh yoh kuot shoq zaih nyeis aq.