Read Achang DYUNG 26 Bible Online

DYUNG 26 - Achang bible

DYUNG 26

¹Ngos nyeis dah gyingshang Zvng[15] lyis jyuhmahsen khying, sauhkhying vlanh, nesnoq, vnes yah yoq dah misseh dvci lywang yah kuot aq. Hauh misseh lywang mas Kherubim silho tsain thauh tap las kuot chah.

²Misseh dvlywang dah xing choeu 14 gaiq, khonh choeu 2 gaiq nghuot las mislywang dvnganh dvyhangteh nghuot chah.

³Oeng lywang dvdung chop tsomp chah, gohtoeu oeng lywang eq gohtoeu dvdung chop tsomp chah.

⁴Mislanh seh yah vkhwank tsain kuot las mis dvdung dah vyvm misjang chank yah tap chah. Gohtoeu dvdung dah vyvm misjang chank yah eq vgus housoeh tap chah.

⁵Cangxeih vdung dah cangxeih vlywang vjang chank yah, vlanh seh yah vkhwank oengci, aiq vdung dah thang thank vlywang vjang chank yah eq vkhwank oengci kuot tap las vkhwank changh zopgoh toh chah.

⁶Hau aiq dung yah dvkoeuq khyvlyis tsoq das xiklyis xing yah nghweh oengci kuot las nghweh goh toh das.

⁷Zvng mau das xiklyis beqmauh yah yoq dah misseh dvci dvlywang kuot chah.

⁸Mis dvlywang dah xing choeu 15 gaiq, khonh choeu 2 gaiq mulas dvnganh dvyih yih kuot chah.

⁹Mis oeng lywang lyis chop tsomp las dvdung kuot chah, gohtoeu khyuk lywang lyis eq chop tsomp las dvdung kuot chah. Hau khyuk vlywang lyis zvng khonh shot pheh khuk toh chah.

¹⁰Dvdyung dah vyvm mislywang vjang mas vkhwank oengci, gohtoeu dvdung dah vjang mas vkhwank oengci kuot tap chah.

¹¹Thunk nghweh oengci kuot las hauh vkhwank dwang mas tsain nghweh tap zis yah hau aiq dung gas vnghop dvkoeuq bweh das.

¹²Mislywang zes joq dah dvgohyih lyis zvng dah ganthung pheh khyoq lhangh toh chah.

¹³Zvng dah nyang shot nyang mas zes joq mislywang gaiq dvgohyih gas zvng mas nyang shot nyang gyoh lhangh las hauh yvlyis nghop das nyhenshang nghuot das.

¹⁴Hauh zvng nghop lyis vnes cauh dah yvnglus yeis yah dvpuk, hauh thoq mas shohyeis noeuh yah dvpuk nghop chah.

¹⁵Zvng tyoyvm vkhomp lyis akhesha saiq yah kuot chah.

¹⁶Tyoyvm vkhomp dvkoeuq dah xing choeu 15 pe, khonh choeu loq 27 shih nghuot.

¹⁷Vkhomp dvkoeuq mas amgus aiq koeuq koeuq kuot las hau dvnganh yvlyis tsomp goh chah. Housoeh zvng dah vkhomp dvnganh yvlyis kuot chah.

¹⁸Mautyi shot pheh xiklyis vkhomp aiqci koeuq kuot chah.

¹⁹Hauh vkhomp aiqci dah vkhyei tyen das zis ngwis phangh nyeici: vkhomp dvkoeuq dah amgus aiq koeuq xiklyis phangh aiq koeuq koeuq kuot chah.

²⁰Zvng dah mautsung shot pheh xiklyis eq vkhomp aiqci koeuq kuot las,

²¹hauh nyhenshang ngwis phangh nyeici kuot chah. Vkhomp dvkoeuq vkhyei mha phangh aiq koeuq koeuq kat chah.

²²Buiswvng shot pheh zvng ganthung nyhenshang eq vkhomp khyuk koeuq yahge,

²³zvng ganthung pheh vthunk aiq koeuq xiklyis vkhomp aiq koeuq kuot chah.

²⁴Hau vthunk vkhomp jens gas vkhyei gohtoeu toeu nghuot laus eq vthyoh mas dah vkhwank mas loh tsoq goh joq chah. Housoeh hauh vkhomp aiq koeuq gas vthunk aiq koeuq bweh loh das.

²⁵Housoeh houmha vkhomp xet koeuq yahge nyah ngwis phangh dvci khyuk koeuq nghuot das. Vkhomp dvkoeuq dvkoeuq vkhyei mha phangh aiq koeuq koeuq nghuot.

²⁶Akhesha saiq yah vkyank 15 koeuq kuot las, zvng dvshot pheh dah vkhomp xiklyis vkyank oeng koeuq kuot chah.

²⁷Gohtoeu dvshot pheh dah vkhomp xiklyis 5 koeuq, zvng ganthung oen das buiswvng pheh dah vkhomp xiklyis vkyank 5 koeuq kuot chah.

²⁸Vgungs mas dah vkyank gas vkhomp dah vlvt hweq mas toh las, dvthang mha zis gohtoeu dvthang mha jweh shoq zis kuot chah.

²⁹Hau vkhomp jens lyis xing yah kyop las vkyank jauh das zis xing khwank tsain kuot chah. Hauh vkyank lyis eq xing yah tsain kyop chah.

³⁰Nvng lyis boms mas chixoeuq goeus dah yikhyoh vgus zvng lyis toeutsung toh chah.

³¹Khying vlanh, nesnoq, vnes yah yoq dah misyhwiq gosseh dvkoeuq kuot chah. Houmha loqmuh dap soeu Kherubim vlho thauh tap chah.

³²Hauh gosseh lyis xing nghweh yah xing kyop goeus akhesha zains nyei zains mas lhangh toh aq. Hauh zains jens mas ngwis phangh tyen toh.

³³Hauh gosseh lyis zvng khung mha dah nghweh jens o mha tsain lhangh las gosseh dah nungsthank mas luk lhyoq aiq koeuq bos dah Thanghchvp Kwi kat toh chah. Hauh gosseh gas gyingshang joqyos yahge gyingshang thank joqyos lyis kyoq toh chah.

³⁴Thanghchvp Kwi lhyi vnghop yah dvgeh gyingshang thank joqyos mas toh chah.

³⁵Gyingshang thank joqyos dah nghe pheh, zvng mautsung shot pheh kihgus toh las hau yah twi twi mautyi shot pheh nyituonh gus toh chah.

³⁶Zvng khomh xiklyis sauhkhying vlanh, nesnoq, vnes yah yoq dah misyhwiq seh mas ban thauh tap dah gosseh kuot chah.

³⁷Haih gosseh xiklyis akhesha zains oeng zains kuot las xing yah kyop chah. Nyamoq dah nghweh jens eq xing tsain nghuot chah; hauh zains xiklyis phangh oeng koeuq lyis gas thunk yah tsain kuot chah.