Read Achang DYUNG 27 Bible Online

DYUNG 27 - Achang bible

DYUNG 27

¹Nvng akhesha saiq yah phon[16] dvkoeuq kuot chah: houka soehuqthunk nghuot las xing choeu 7 pe dvkhyamh, khonh choeu 7 pe dvkhyamh, nyhang choeu 4 pe dvkhyamh nghuot chah.

²Hau nyei thunk mas khyau eq tap chah; hauh zis gas phon yah dvgungs teh nghuot chah. Nvng hauh yvlyis thunk yah tsain kyop chah.

³Nyiyvp kham das auh, tsohthauh, phont, shohjwi, nyibvn tsain kuot chah: hauh kyahsoe dvnganh yvlyis thunk yah kuot chah.

⁴Nvng thunk dvn-gya kuot las hau dah nyei thunk mas thunk khwank nyei koeuq tap chah.

⁵Hauh thunk dvn-gya lyis phon vzam o mha toh chah. Housoeh hau dvn-gya gas phon nyhang choeu dvgohyih mas duons das.

⁶Phon dvng das xiklyis akhesha saiq yah tanzoe tsain kuot las thunk yah kyop chah.

⁷Hau tanzoe aiq koeuq lyis vkhwank mas tsain jauh las, phon dvng uhlyis tanzoe dvshot dvkoeuq nghuot das.

⁸Phon lhyi saiq yah kuot las vkhau khungh nhang chah: hauh zis ngos nvng lyis boms mas chixoeuq vgus nghuot das.

⁹Nvng hauh Zvng khyam[17] lhyi misyhwiq seh yah lhaink toh chah. Mautyi shot pheh khyam gos gas 50 gaiq xing chah.

¹⁰Hauh yvlyis thuk das zis zains aiqci yahge thunk phangh aiqci kuot las nghweh yahge zains kweh gas ngwis yah nghuot chah.

¹¹Houyah dvyhangteh mautsung shot pheh eq 50 gaiq xing dah khyam gos mas zains aiqci, nyah phangh aiqci lhyi thunk yah kuot las, nghweh yahge zains kweh lyis gas ngwis yah tsain kuot chah.

¹²Buiswvng shot pheh dah khyam gos gas 25 gaiq xing lha zains dvci, phangh dvci nghuot chah.

¹³Buisthuq shot pheh ganthoq khyam khonh choeu mha eq 25 gaiq nghuot.

¹⁴khyam khomh dah dvshot pheh khyam gos 7 gaiq dvkhyamh yahge zains somh lom, phangh somh koeuq nghuot.

¹⁵Gohtoeu dvshot mas eq khyam gos 7 gaiq dvkhyamh yahge zains somh lom, phangh somh koeuq nghuot.

¹⁶Khyam khomh xiklyis khomh gos gas 10 gaiq nghuot. Houka jeini las vlanh, nesnoq, vnes yah yoq dah misyhwiq seh mas ban thauh tap las shunk zis nghuot. Hauh yvlyis thuk das zains nyei lom mas phangh nyei koeuq nghuot.

¹⁷Khyam lhaink las zains chank yah zains kweh lang tsoq goh toh chah: nghweh gas ngwis yah, phangh gas thunk yah nghuot.

¹⁸Hauh khyam dah xing choeu 50 gaiq, lvm choeu 25 gaiq, nyhang choeu aiq gaiq dvkhyamh nghuot. Gosseh gas misyhwiq seh yah, phangh eq thunk yah nghuot.

¹⁹Zvng mas yhung dah vyhang dvnganh, zvng yahge zvng khyam xiklyis dah jywangh dvnganh lyis thunk yah kuot chah.

²⁰Nyitoengh vjangh duk joq das xiklyis tuonh das zis Israel jens lyis, tsanlun coeu gyingh lyis nah jyank mas chi los das xiklyis tying aq.

²¹Thanghchvp Kwi xikkhonh gosseh dah nghe pheh, zvng khau mha Aron yahge nyah loloeu jens gas YHENSAIN xikkhonh mas nyi tuonh chah. Houka nyenhthang masyah nvpyo jweh shoq nyi duk nyeis das. Haih vmingh gas Israel jens mas vcaiq caiq muh gyamh huon zis nghuot.