Read Achang DYUNG 3 Bible Online

DYUNG 3 - Achang bible

DYUNG 3

¹Gvshih Moshe ka nyah yukphoq Yethro ge, Midian phudyei soeu dah yvng shvbeq yoeuh las nyeis. Nyang hauh yvng shvbeq phung lhyi mhanhdyvp vthang mha komp loh las Horeb ge Mangso dah boms mas jweh loh.

²Houmha YHENSAIN dah loeuswons gas mhanhgyomh mas nyi duk zis yah nyah jyank mas thuq xoeuq. Nyang hauh zis lyis yoeuh lyis, nyiduk nyeis laus eq mhanhgyomh ma ngeh loh.

³Housoeh las Moshe ka, Chamus mhanhgyomh ma ngeh au? Hau mauhphoh yvlyis ngos loh yoeuh bah, ge.

⁴Nyang loh nyeis yvlyis YHENSAIN nyvng lyis Mangso ka nyi duk nyeis mhanhgyomh masyah Moshe, Moshe, ge nyang lyis lui thuq los. Nyang gas, Ngos heimha nyeis, ge toeuh.

⁵Hauh uhlyis Mangso ka, Heimha vywi los lo, nah thyvkoq khyuot tyamp aq. Khasoeh ge lyis nvng yap joqyos gas gyingshang, ge.

⁶Ngos gas nah uwus dah Mangso, Abraham, Isak, Yakop moq dah Mangso nghuot, ge taiq. Housoeh Moshe ka Mangso lhyi yoeuh das zis gyuk yvmvyah nyah nyoqnho lhyi nghop toh.

⁷Hauh thang lhyi YHENSAIN ka, Egutu mas ngah dius jens xauh dah zaiq cho lhyi ngos nyvng goeus las, nyamoq dah lvgungh jens gvng mas pangh aq ge dung thwe ngos xauhgyo, ngos nyamoq xauh dah shohjyen lhyi seq.

⁸Ngos nyamoq lyis Egutu dius loq masyah khyuot las hauh mau masyah Khanan, Hiti, Amori, Perizi, Hiwi yahge Yebusi dius tsain nyeis, maunyeis coeu lha dvm, nauh yahge dyoyhei yaus dah mau mas shwih loh das xiklyis lyih.

⁹Gvshih Yoeuh aq, Israel jens pangh aq ge dung nyeis thwe ngah jyank mas jweh goeus. Egutu bang nyamoq lyis zaiq las jons kuot dah muh lyis ngos nyvng goeus.

¹⁰Los aq, ngah dius Israel jens lyis Egutu masyah shwih thuq los das xiklyis ngos nvng lyis Pharao jyank mas nhang kat bah, ge.

¹¹Nghuot laus eq Moshe YHENSAIN lhyi taiq zis gas, Ngos gas khasoeh teh soeu nghuot las Pharao jyank mas loh las Israel jens lyis Egutu masyah khyuot das lah, ge.

¹²Mangso taiq, Ngos nvng yah jyoengh nyeis das, ngos nvng lyis nhang dah vlho ka, nvng hauh dius jens lyis Egutu masyah shwih thuq los las, namoq haih boms mas Mangso lhyi xauh paiq das, ge.

¹³Moshe Mangso lhyi taiq, Ngos Israel jens jyank mas jweh las, Namoq Phauh thyeih moq dah Mangso ka ngos lyis namoq jyank mas nhang kat oen lhyi, nyamoq eq, Nyah nyings cha nghuot lah, ge nyei lyis, ngos khasoeh toeuh das, ge nyei.

¹⁴Mangso ka Moshe lhyi, Ngos nghuot Soeu, NGOS NGHUOT, Ngos nghuot ge soeu ka ngos lyis namoq jyank mas nhang kat, oen nvng Israel jens lyis taiq das, ge.

¹⁵Tsai, Mangso ka Moshe lhyi, Namoq phauh thyeih moq dah Mangso, Abraham dah Mangso, Isak dah Mangso, Yakop dah Mangso ge dah YHENSAIN ka ngos lyis namoq jyank mas nhang kat, oen nvng Israel jens lyis taiq das. Ngah nyings, YHENSAIN ka vcaiq vto nghuot. Houka dvcaiq thang lhyi dvcaiq dah soh das nyings nghuot.

¹⁶Loh las Israel logis jens lyis tsainh huom lha nyamoq lyis heisoeh oen taiq aq: Namoq phauh thyeih moq dah Mangso, Abraham, Isak, Yakop dah Mangso ge dah YHENSAIN ka ngah jyank mas thuq los las, Ngos namoq lyis jyoengh komh las, namoq lyis pangh chah cho nyvng goeus.

¹⁷Hau Egutu dah yaukyenh shanghsenh masyah ngos namoq lyis Khanan, Hiti, Amori, Perizi, Hiwi yahge Yebusi dius tsain nyeis, nauh yahge dyoyhei yaus mau mas shwih kat das ge nyeis, ge ngos lyis taiq, oen aq.

¹⁸Nyamoq eq nah dang gyo das: housoeh nvng yahge Israel logis jens gas Egutu hwankti Pharao jyank wvng las Hebre dius jens dah YHENSAIN Mangso ka ngamoq yah xauhgoh goeus, housoeh las ngamoq dah YHENSAIN Mangso lhyi phudyei das zis ngamoq lyis somh nyeih cho mhanhdyvp mas loh nhang aq, oen nyang lyis taiq das.

¹⁹Egutu hwankti Pharao gas Mangso yah ma tsoengh kuot lyis gas namoq lyis ma loh nhang das zis ngos seq.

²⁰Housoeh las ngos ngah yomsoq chixoeuq las ngos Egutu mau mas kuot das, ngah Mauh loqmuh dvnganh yah hauh mau lyis yau dyei das: hauh thang lhyi nyang namoq lyis dvnhang kat das.

²¹Ngos haih vnyau lyis Egutu dius xikkhonh mas nyoqnho yoh nhang das las, namoq yoh thuq loh uhlyis gungskom thuq das zis ma nghuot.

²²Vmesbih khanghmuh nyah yhenkyoh yahge nyah yhen mha khau nyeis bang jyank masyah ngwis, xing loqyhang[1] yahge dyimis sang yoeus las namoq dah nyelo yukgis lo lyis huot das. Housoeh namoq gas Egutu dius jens lyis shank shoq kuot das, ge kat.