Read Achang DYUNG 30 Bible Online

DYUNG 30 - Achang bible

DYUNG 30

¹Nvng akhesha saiq yah xangh ngheq das xangh phon[20] dvkoeuq kuot chah.

²Hauh phon ka xing choeu loq 18 shih, khonh choeu loq 18 shih soefuqthunk nghuot chah, nyhang choeu loq 36 shih nghuot chah. Nyei thunk gonh mas dah khyau eq houyah dvkoeuq teh kuot chah.

³Nvng hau thoq pheh eq, vyvm lhaink yah eq khyau mha eq xing gyingh yah kyop las vzam chank yah xing yah khop chah.

⁴Nvng hau vkhop o, phon thyishot haqshot vthang mha xing khwank aiq koeuq koeuq kuot chah; houka dvng das tanzoe jauh das joqyos nghuot das.

⁵Hauh tanzoe aiq koeuq lyis akhesha saiq yah kuot las xing yah kyop chah.

⁶Ngos nvng yah xauhgoh das joqyos ge, hau Thanghchvp Kwi xikkhonh mas lhangh toh dah gosseh nghe mha hauh phon lhyi toh aq.

⁷Housoeh Aron gas nvp yau nvp hau nyitoengh cvq uhlyis, hau phon mha nvm pyo xangh ngheq chah.

⁸Nyenhthang lhyi eq Aron nyitoengh tuonh uhlyis houmha xangh ngheq chah: haih xangh ngheq cho ka no toh cho ma bos lo vjangh yah xiklyis nghuot.

⁹Namoq gohtoeu xangh hauh phon mas yoh ngheq das zis ma nghuot. Gaunyhauq phudyei nghuot ya wom phudyei yahge chah wai[21] lyis eq houmha yoh huot khyoq phudyei das zis ma nghuot.

¹⁰Aron gas dvzvn dvlhain hau phon khyau nyei koeuq gonh mas yobos shangphu dah gaunyhauq suih lyis huot gyuon zis yah hau phon lyis cheihshang cho kuot chah. Namoq dah lo jens vcaiq caiq housoeh dvzvn dvlhain kuot chah. Hauh phon ka NGOS YHENSAIN xiklyis gyingshang thank dah phon nghuot chah.

¹¹YHENSAIN Moshe lhyi taiq zis gas,

¹²Nvng Israel jens lyis suon lha nyings lhaih uhlyis, nyamoq yomh ma xauh bas jungh, dvnganhmoq vsainnyang kang khyuot das zis YHENSAIN lhyi kang khyuot phauh dyei chah.

¹³Suon lha nyings bos bang dvnganh gas gyingshang shekel[22] chank las, shekel dvkhyamh khyamh dyei chah: Shekel dvkhyamh khyamh gas YHENSAIN xiklyis vlu nghuot.

¹⁴Nyenhkyi aiqci zvn masyah thoq pheh bang dvnganh gas nyings bos las, YHENSAIN lhyi vlu dyei chah.

¹⁵Vsainnyang kang lhyi khyuot das zis YHENSAIN lhyi vlu dyei lyis, yoh soeu ma jes, nyungs soeu ma yomh shekel dvkhyamh khyamh dyei chah.

¹⁶Housoeh nvng Israel jens jyank masyah hau ngwis kui las NGOS nyeis dah moq zvng soq yvmas yhung: haih khoengh gas nyamoq dah kang khyuot phauh nghuot las NGOS nyamoq lyis gomh das xiklyis soh das, ge.

¹⁷Tsai YHENSAIN Moshe lhyi taiq.

¹⁸Nvng thunk lang yahge hauh zis kih das thunk tank eq kuot las moq zvng khomh yahge phon jo mas toh aq; houmha jeis eq kham kat aq.

¹⁹Aron yahge nyah loloeu jens houmha dah jeis yah khyei eq loq eq cheih chah.

²⁰Nyamoq ma shei bas jungh, YHENSAIN nyeis zvng mas wvng das lyis, YHENSAIN lhyi phuqsoe lha ngheq phudyei das lyis, nyamoq housoeh jeis yah cheih chah.

²¹Housoeh nyamoq ma shei das xiklyis, nyamoq khyei loq cheih chah: Houka nyamoq yahge nyamoq dah lo jens vcaiq caiq chank das lyi thungh nghuot, ge.

²²Hauh thoq lyis YHENSAIN Moshe lhyi taiq.

²³Gis thank xangh shom mura coeu 12 paung, xangh shom nvm Hubus kuk 6 paung, nghamh shom nvm gyon 6 paung;

²⁴dvnganh gas lyi bos jvng[23] masyah laiq las xanghbes 12 paung yahge tsanlun coeu dvgalan yoeus las,

²⁵nvng houyah juot das xiklyis, gyingshang coeu kuot das zis xangh shom seq phung soeu phung khyvlyis xangh coeu phung chah. Houka juot das xiklyis gyingshang coeu nghuot.

²⁶Nvng hauh coeu yah YHENSAIN nyeis zvng lyis eq, Thanghchvp Kwi lyis eq,

²⁷ohlhyoq kihgus yahge houmha dah vyhang dvnganh lyis eq, nyituonh gus yahge houmha vyhang dvnganh lyis eq, xangh ngheq phudyei dah phon lhyi eq,

²⁸ngheq phudyei phon yahge nyah kyahsoe dvnganh lyis eq, jeislang yahge nyah khyei lhyi eq juot dyei chah.

²⁹Hauh zis yah gyingshang thank das xiklyis housoeh cheihshang chah. Hauh vyhang lhyi tanh zis cha eq nghuot ya tanh soeu hank eq gyingshang los das.

³⁰Nvng Aron yahge nah loloeu jens lyis eq juot las, nyamoq ngah xikkhonh mas phudyei muh yoh kuot nyeis das xiklyis, nyamoq lyis housoeh cheihshang chah.

³¹Nvng Israel jens lyis eq heisoeh taiq chah: Haih zis gas namoq dah lo jens vcaiq caiq, ngah xiklyis juot dah gyingshang coeu bweh chah.

³²Namoq hauh yvlyis dius gungs mas yoh huot kat das zis ma nghuot; housoeh phung teh, gohtoeu eq yoh phung das zis ma nghuot; houka gyingshang lha namoq gyingshang oen lha soh chah.

³³Hauh zis yah toeuq las phung soeu yahge hauh yvlyis phudyei soeu ma nghuot gohyuk lyis juot soeu hank laus eq nyah vnyau masyah thyet zis xauh das, ge.

³⁴Tsai, YHENSAIN Moshe lhyi taiq. Xanghshom ge, Natap, unukha, galaban; xangh ja yahge loban gyingh lyis dvyih yih yoeus las,

³⁵xangh seq phung soeu phung khyvlyis coh yah lhoeuq las ngheq das xiklyis gyingh las gyingshang xangh lyis phung chah.

³⁶Nvng hauh yvmas zis dvkhamh lyis noeuh shoq mhont las, ngos nvng yah xauhgoh joqyos, YHENSAIN nyeis zvng khau mha dah Thanghchvp Kwi xikkhonh mas sanh chah: Houka namoq mas gyingshang thank zis nghuot chah.

³⁷Hau xangh phung khyvlyis namoq xiklyis gohtoeu yoh phung das zis ma nghuot: houka namoq mas YHENSAIN xiklyis gyingshang chah.

³⁸Vsainnyang nam das xiklyis hauh zis yah toeuq las phung soeu ka, ngah vnyau masyah thyet zis xauh das.