Read Achang DYUNG 31 Bible Online

DYUNG 31 - Achang bible

DYUNG 31

¹Tsai, YHENSAIN Moshe lhyi taiq zis gas,

²Yoeuh aq, Yuda vkoq mas Uri lo, Hur nyeilo Bezale lyis ngos khyen yoeus.

³Ngos nyang lyis ngah dah Dyos yah tyink dyei las,[24] kank bos cho, yik cho, loqmuh ja khanghmuh mas seq cho dyei.

⁴ngwis, xing, thunk shonh yvmas vzwvng vkhyoh seq toeuq,

⁵luk swih las xiq dah muh, saiq thwang muh, loqmuh ja khanghmuh nyhenshang nghuot.

⁶Yoeuh aq, ngos nyang yah dvgeh, Dan vkoq mas dah Ahisamak lo Oholiab lyis eq toeuq kat; Ngos nvng lyis tying toh zis dvnganh ehnyet joeui bos bang yoh kuot shoq ngos nyamoq dah nhaiqlom mas seq cho lyes cho kat dyei goeus.

⁷Housoeh las nyamoq gas, ngos nyeis zvng, Thanghchvp Kwi yahge nyah vnghop, zvng mas dah kyahsoe dvnganh:

⁸Kihgus yahge nyah kyahsoe dvnganh, xing gyingh nyituonh gus yahge nyah kyahsoe dvnganh, xangh phon,

⁹ngheq phudyei phon yahge nyah kyahsoe, jeislang yah nyah khyei:

¹⁰Aron yahge nyah loloeu jens phudyei muh kuot uhlyis wuot das nyhenshang phauh las gyingshang dyimis eq;

¹¹juot das coeu yahge gyingshang joqyos mas chi das xangh eq, ngos nvng lyis taiq ya taiq toh vgus nyamoq tsain kuot chah, ge.

¹²Tsai YHENSAIN Moshe lhyi taiq.

¹³Nvng Israel jens lyis heisoeh taiq chah. Ngos gas namoq lyis ngah dius kuot dah YHENSAIN nghuot yvlyis, ngos yahge namoq dah lo jens vcaiq caiq jo mas kanghjyoeng vlho duot das zis ngah No Buisnyeis lyis top chank chah, ge.

¹⁴Housoeh las hau No Buisnyeis lyis namoq chank nyeis chah; houka namoq xiklyis gyingshang: hauh yvlyis thyoq soeu ka jyoengh shei chah. Hauh buisnyeis lyis muh zwi soeu hank laus eq nyah vnyau masyah thyet zis xauh chah.

¹⁵Khyuk nyeih top muh zwi chah; nyhet vnyeih gas YHENSAIN dah gyingshang no nyeis das buisnyeis zainsmuh nghuot. No Buisnyeis lyis muh zwi soeu ka jyoengh shei chah.

¹⁶Housoeh yvmvyah Israel jens vcaiq caiq, vcaiq vto thanghchvp duot nyeis das xiklyis No Buisnyeis lyis vjangh chank nyeis chah.

¹⁷Houka ngos yahge Israel jens jo mas vcaiq vto vlho duot das. Khasoeh ge lyis YHENSAIN ka maukhung nyeisjvng lyis khyuk nyeih gyo lyis gvnkhanh las nyhet vnyeih lyis no las huiq yoeus, ge.

¹⁸Housoeh Mangso ka, Sina boms mas Moshe yah dye jisgoh thang lhyi Mangso loqnyhauh yah lhaih, tyingtoh dang dap dah luklhywaq aiq koeuq dyei kat.