Read Achang DYUNG 35 Bible Online

DYUNG 35 - Achang bible

DYUNG 35

¹Moshe ka Israel jens moqhuom dvnganh khi huom las taiq zis gas, Haih zis gas namoq chank kuot das zis YHENSAIN tyingtoh dang nghuot.

²Namoq namoq nyang dah muh zwi das khyuk nyeih top yoh; nghuot laus eq nyhet vnyeih gas, namoq mas gyingshang nyeih, YHENSAIN xiklyis no nyeis das yhaugyen No Buisnyeis nghuot. Hauh nyeih mas muh zwi soeu ka shei chah.

³No Buisnyeis lyis namoq yhen mha nyi yangh yoh khat das zis ma nghuot, ge.

⁴Israel jens moqhuom dvnganh lyis Moshe taiq zis gas, Heika YHENSAIN tyingtoh dang nghuot.

⁵YHENSAIN xiklyis namoq mas dah vlu tsainh geh. Hank eq dyei mes ehnyet bos bang gas, YHENSAIN dah vlu ge, ngwis, xing, thunk;

⁶misyhwiq seh; sauhkhying vlanh, nesnoq, vnes; beq mauh yah kuot misseh;

⁷cauh nes dah yvnglus yeis; shohyeis yungh; akhesha saiq;

⁸nyituonh coeu; juot coeu yahge xangh coeu;

⁹unuk luk yahge phudyei zainsmuh dah ephod dyi yahge sainhkhonh nghop mas tap das dah phauhdap luk teh zis chi los geh.

¹⁰Namoq mas muh kuot lyes bang hank eq YHENSAIN taiq ya taiq toh vgus,

¹¹zvng yahge nyah vnghop, nghweh, vkhomp, vkyank, zains, phangh lyis eq;

¹²Thanghchvp Kwi yahge nyah tanzoe aiq koeuq, hau kwi nghop, gosseh eq;

¹³Hau kihgus yahge nyah tanzoe, houyah sen dah kyahsoe dvnganh, Mangso xikkhonh mas dah ohlhyoq eq;

¹⁴Nyituonh gus yahge nyah kyahsoe, nyah nyitoengh yahge nyituonh coeu eq;

¹⁵Xangh phon yahge nyah tanzoe, juot coeu, xangh, zvng khomh mas dah gosseh eq;

¹⁶Ngheq phudyei das phon yah dvgeh thunk dvn-gya, nyah tanzoe yahge houyah sen kyahsoe dvnganh, jeislang yahge nyah khyei eq;

¹⁷khyamgos yahge nyah zains, nyah phangh, khyam khomh gos das gosseh eq;

¹⁸Zvng dah jywangh, khyam jywangh yahge nyah twih eq;

¹⁹phudyei bang gyingshang joqyos mas phuqsoe uhlyis bvng dyimis wuot chah, Aron yahge nyah loloeu jens wuot das gyingshang dyimis eq tsain kuot geh.

²⁰Hauh uhlyis Israel jens moqhuom dvnganh Moshe xikkhonh masyah thuq loh.

²¹Vsainnyang ehnyet mas duon los soeu; dyei mes ehnyet bos bang dvnganh, hau YHENSAIN nyeis zvng kuot das xiklyis eq, houmha phuqsoe muh xiklyis eq, gyingshang dyimis kuot das xiklyis eq, YHENSAIN lhyi vlu chi los.

²²Dyei mes ehnyet bos dah vbusbih vmesbih dvnganh, xing kyenh, nhodangh, loqkyop, ywi teh dah xing tsain chi los.YHENSAIN lhyi xing vlu dyei bang dvnganh jweh los.

²³Vlanh, nesnoq, sauhkhying nes, misyhwiq seh, beqmauh seh, vnes cauh dah yvnglus yeis, shohyeis yungh yoh bang eq chi los.

²⁴Ngwis yahge thunk vlu dyei bang eq, YHENSAIN jyank hau vlu chi los. Muh mas yhung das zis akhesha saiq yoh bang hank eq hauh zis chi los.

²⁵Khying ba lyes dah vmesbih jens dvnganh eq nyamoq loq yah duis dah sauhkhying vlanh, nesnoq, vnes yahge jyuhmahsen khying yungh chi los

²⁶Nyamoq gas beqmauh yah eq khying duis.

²⁷Uhshe bang eq, ephod yahge sainhkhonh gos mas khop das unuk luk yahge gohtoeu phauhdap luk chi los.

²⁸Nyamoq gas nghamh shom, nyi tuonh das coeu, juot das coeu, xangh coeu eq tsain chi los.

²⁹Israel jens mas dyei mes ehnyet duon los dah vbusbih, vmesbih dvnganh gas YHENSAIN Moshe lhyi taiq kat muh xiklyis, YHENSAIN lhyi vlu los dyei.

³⁰Tsai, Moshe Israel jens lyis taiq zis gas, Gyo geh, YHENSAIN ka Yuda vkoq mas Uri lo, Hur nyeilo Bezale lyis nyings yoeus las muh mas kat toh.

³¹Nyang lyis Mangso dah dyos yah tyink dyei las lyes cho, yik cho, loqmuh ja khanghmuh mas seq cho tyink dyei las,

³²ngwis, xing, thunk shonh yvmas vzwvng vkhyoh seq toeuq,

³³luk swih las xiq dah muh, saiq thwang muh, loqmuh ja khanghmuh nyhenshang nghuot.

³⁴YHENSAIN ka nyang yahge Dan vkoq mas Ahisamak lo Oholiab lyis gohyuk lyis loqmuh yoh jyauh das xiklyis so dah joeui kat dyei goeus.

³⁵Nyah zomh gas thwang tap muh, phauhdap soehfuh muh, jyuhmahsen yungh; sauhkhying vlanh, nesnoq, vnes seh yahge gohtoeu khoh kat bang nghuot. Nyah zomh gas muh vja ja seq, phauhdap, yungh khyvlyis seq kuot das nyhenshang Mangso yah lyes cho kat dyei zis xauh bang nghuot.