Read Achang DYUNG 36 Bible Online

DYUNG 36 - Achang bible

DYUNG 36

¹Bezale, Oholiab yahge YHENSAIN yah seq cho joeui yahge muh lyes cho tyink dyei dah loqmuh dap bang dvnganh gas, YHENSAIN taiq ya taiq toh zis yah dvyhangteh, hau gyingshang zvng kuot chah.

²Moshe ka Bezale, Oholiab yahge YHENSAIN joeui tyink dyei las, vsainnyang ehnyet mas hauh muh kuot das zis duon los dah lyes bang dvnganh lyis muh xi aq, ge.

³Nyamoq gas, hau gyingshang yhen yah sen dah phuqsoe das kyahsoe kuot das xiklyis Israel jens chi los dah vlu vyhang lhyi Moshe loq masyah lhom yoeus. Hauh thoq lyis vlu dyei mes bang nvp yau nvp chi los shih.

⁴Joeui bos las, hauh muh zwi nyeis bang thuq loh las,

⁵Moshe lhyi taiq zis gas, YHENSAIN taiq toh nyhoq tham kuot das thoq lyis jes shoq tsain chi los goeus, ge.

⁶Hauh uhlyis Moshe ka, Hai gyingshang zvng yah sen lha vlu dyei mes dah vbusbih, vmesbih hank laus eq vdyei lo, ge dvp gonh lyis dang tying kat zis yah dius jens vlu chi los cho no tyamp.

⁷Jweh los goeus vyhang eq hau muh dvnganh dye kuot das xiklyis tham thoq lyis nyo shih.

⁸Hau muh kuot bang mas zes lyes bang gas, YHENSAIN nyeis dah Zvng lyis kuot. Nyamoq gas hauh zvng lyis jyuhmahsen khying, sauhkhying vlanh, nesnoq, vnes yah Kherubim silho tsain thauh tap toh dah misseh dvci lywang yah yvm.

⁹Misseh dvlywang dah xing choeu 14 gaiq, khonh choeu 2 gaiq nghuot las, mislywang dvnganh dvyhangteh nghuot.

¹⁰Nyamoq gas misseh oeng lywang lyis dvdung chop tsomp. Gohtoeu oeng lywang lyis eq gohtoeu dvdung chop tsomp.

¹¹Nyamoq gas mislanh seh yah vkhwank tsain kuot las mis dvdung dvdung dah vyvm misjang chank yah vkhwank tsain kuot tap toh.

¹²Cangxeih vdung dah cangxeih vlywang vjang chank yah, vlanh seh yah vkhwank oengci, aiq vdung dah thang thank vlywang vjang chank yah vkhwank oengci kuot tap las vkhwank changh zopgoh joq.

¹³Hau aiq dung yah dvkoeuq khyvlyis tsoq das xiklyis, nyamoq xing yah nghweh oengci eq kuot.

¹⁴Nyamoq beqmauh yah yoq dah misseh dvci dvlywang yah Zvng mau.

¹⁵Nyamoq gas hauh misseh dvlywang dah xing choeu 15 gaiq, khonh choeu 2 gaiq mulas dvnganh dvyih yih kuot toh.

¹⁶Nyamoq gas oeng lywang lyis dvdung, khyuk lywang lyis dvdung chop tsomp toh.

¹⁷Cangxeih vdung dah thangthank vjang dah vzam chank yah vkhwank oengci, gohtoeu dvdung dah vjang mas eq vkhwank oengci kuot tap toh.

¹⁸Nyamoq gas thunk nghweh oengci kuot las hauh vkhwank dwang mas tsain nghweh tap zis yah hau aiq dung gas vnghop dvkoeuq bweh los.

¹⁹Nyamoq hau zvng nghop lyis vnes cauh dah yvnglus yeis yah dvpuk, hauh thoq mas shohyeis noeuh yah dvpuk nghop toh.

²⁰Nyamoq zvng tyoyvm vkhomp lyis akhesha saiq yah kuot.

²¹Tyoyvm vkhomp dvkoeuq dah xing choeu 15 pe, khonh choeu loq 27 shih nghuot.

²²Vkhomp dvkoeuq mas amgus aiq koeuq koeuq kat las, hau dvnganh yvlyis tsomp goh toh. Zvng dah vkhomp dvnganh yvlyis housoeh kuot.

²³Nyamoq zvng dah mautyi shot pheh xiklyis vkhomp aiqci koeuq kuot.

²⁴Vkhomp aiqci koeuq dah vkhyei tyen das zis ngwis phangh nyeici kuot; vkhomp dvkoeuq mas amgus aiq koeuq xiklyis phangh aiq koeuq koeuq kuot.

²⁵Zvng dah gohtoeu dvshot, mautsung shot pheh xiklyis eq, vkhomp aiqci koeuq yahge,

²⁶hauh nyhenshang ngwis phangh nyeici kuot las vkhomp dvkoeuq vkhyei mha phangh aiq koeuq koeuq kat.

²⁷Buiswvng shot pheh zvng ganthung nyhenshang vkhomp khyuk koeuq yahge,

²⁸Zvng ganthung pheh vthunk aiq koeuq xiklyis eq nyamoq vkhomp aiq koeuq kuot.

²⁹Hau vkhomp jens gas vkhyei gohtoeu toeu nghuot laus eq vthyoh mas dah vkhwank mas loh tsoq goh joq. Heisoeh nyang vthunk aiq koeuq xiklyis vkhomp aiq koeuq kuot.

³⁰Housoeh vkhomp xet koeuq yahge nyah ngwis phangh dvci khyuk koeuq nghuot: vkhomp dvkoeuq dvkoeuq vkhyei mha phangh aiq koeuq koeuq nghuot.

³¹Nyang akhesha saiq yah vkyank 15 koeuq kuot; zvng dvshot pheh dah vkhomp xiklyis vkyank oeng koeuq,

³²gohtoeu dvshot pheh dah vkhomp xiklyis oeng koeuq, zvng ganthung oen das buiswvng pheh vkhomp xiklyis vkyank oeng koeuq nghuot.

³³Vgungs mas dah vkyank gas vkhomp dah vlvt hweq mas toh las dvthang mha zis gohtoeu dvthang mha jweh shoq zis kuot toh.

³⁴Hauh vkhomp jens lyis xing yah kyop las vkyank jauh das zis xing khwank eq tsain kuot tap; hauh vkyank lyis eq xing yah tsain kyop toh.

³⁵Nyamoq jyuhmahsen khying yungh yah yoq dah misseh mas sauhkhying vlanh, nesnoq, vnes yah Kherubim lho thauh tap las gosseh kuot.

³⁶Nyamoq gas gosseh xiklyis akhesha saiq yah zains nyei lom kuot las xing yah tsain kyop. Hau nghweh eq xing yah tsain kyop. Zains xiklyis eq ngwis phangh nyei koeuq shonh.

³⁷Zvng khomh xiklyis sauhkhying vlanh, nesnoq, vnes yah yoq dah misyhwiq seh mas ban thauh tap dah gosseh kuot.

³⁸Hau gosseh xiklyis nyang akhesha zains oeng koeuq yahge houmha dah nghweh eq, zains thyoh lyis eq xing yah kyop: phangh oeng koeuq lyis gas thunk yah kuot.