Read Achang DYUNG 37 Bible Online

DYUNG 37 - Achang bible

DYUNG 37

¹Bezale gas akhesha saiq yah xing choeu loq 45 shih, khonh choeu loq 27 shih, nyhang choeu loq 27 shih bos dah kwi dvlom tsuk.

²Hauh yvlyis vkhau vthoq xing gyingh yah kyop. Hauh vthoq vzam chank xing yah khomp toh.

³Xing khwank nyei koeuq kuot las hauh kwi khyei nyei koeuq mas dvshot aiq koeuq koeuq tap toh.

⁴Akhesha saiq yah tanzoe tsain kuot las hauh yvlyis xing yah kyop.

⁵Hau Thanghchvp Kwi dvng das xiklyis kwi dah thyishot haqshot mas dah vkhwank mas tanzoe jauh toh.

⁶Nyang gas xing choeu loq 45 shih, khonh choeu loq 27 shih bos dah kwi nghop lyis eq xing gyingh yah kuot.

⁷Nyang gas Kherubim lho aiq koeuq lyis yoh bat shonh dah xing yah

⁸kwi nghop 2 thang gonh mas dvthang mha dvlho lho kuot tap. Housoeh nyang hauh zis lyis kwi nghop yah dvkoeuq teh kuot.

⁹Hau Kherubim aiq koeuq gas nyoqnho changh xoeu goh toh. Houmha nyamoq dungs tsain tyo lha vnghop lyis nghop toh.

¹⁰Tsai nyang akhesha saiq yah xing choeu loq 36 shih, khonh choeu loq 18 shih, nyhang choeu loq 27 shih bos dah kihgus dvkoeuq kuot.

¹¹Nyang hauh yvlyis xing gyingh yah kyop las, vyvm chank xing yah dungh.

¹²Nyang gas hauh kihgus mas khonh choeu loq 3 shih bos dah vzam lyis kuot tap las xing yah hauh vzam lyis dungh.

¹³Nyang dvng das nyhenshang xing yah vkhwank nyei koeuq kuot las, nyah vthunk nyei koeuq mas hau vkhwank tsain tap toh.

¹⁴Hau kihgus dvng das xiklyis vzam mas vkhwank tsain tap las houka tanzoe jauh gus tsain nghuot.

¹⁵Kihgus dvng das tanzoe eq akhesha saiq yah kuot las xing yah tsain kyop.

¹⁶Hau kihgus xiklyis bvn lywas, zvbiq jyungshuk xiklyis bvn, kom, jywang yahge khuq lyis xing gyingh yah kuot.

¹⁷Nyang xing gyingh yah nyituonh gus dvkoeuq kuot. Hauh vkhyei, vyau, shunk dah ban, vlhaink yahge vbuh lyis dvzwvng kyingh kuot las bat.

¹⁸Hauh vzwvng mas dvshot somh ko ko mulas khyuk ko thuq joq.

¹⁹Nyituonh gus vko khyuk koeuq mas dvko dvko mha batan buh buh teh vlhaink somh koeuq, vbuh somh koeuq dvgeh shunk toh.

²⁰Hau nyituonh gus vgungs vyau mas eq batan buh buh teh vlhaink nyei koeuq, vbuh nyei koeuq shunk toh.

²¹Vko somh zomh mas dvzomh dah o mha vlhaink dvkoeuq koeuq bos.

²²Hauh vlhaink, vko yahge nyituonh gus lyis xing gyingh yah dvkoeuq teh bat toh.

²³Nyang nyituonh gus xiklyis nyitoengh nyhet koeuq kuot las nyvp yahge bvnlywas eq xing gyingh yah kuot.

²⁴Nyang hau nyituonh gus yahge nyah kyahsoe dvnganh lyis xing gyingh 75 paung yah kuot.

²⁵Tsai nyang xangh ngheq das xiklyis phon eq akhesha saiq yah kuot; hauh xing choeu loq 18 shih, khonh choeu loq 18 shih, mulas soefuqthunk kuot: nyhang choeu ka loq 36 shih nghuot: nyah khyau lhyi eq houyah dvkoeuq teh kuot.

²⁶Hau nyah vthyoh, vyvm yvmlhaink yah eq, khyau mha eq xing gyingh yah tsain kyop las vyvm chank xing yah khop toh.

²⁷Hauh nyhenshang eq vkhwank aiq koeuq kuot las xing shauq toh dah vjeis mas phon thyishot haqshot vthunk mas tap toh. Houka dvng das tanzoe jauh gus nghuot.

²⁸Tanzoe dvzomh lyis akhesha saiq yah kuot las xing yah kyop.

²⁹Xangh seq phung soeu phung khyvlyis, juot das gyingshang coeu eq, xangh gyingh lyis eq phung.