Read Achang DYUNG 38 Bible Online

DYUNG 38 - Achang bible

DYUNG 38

¹Tsai nyang akhesha saiq yah ngheq phudyei das phon eq kuot. Hauh xing choeu 7 pe dvkhyamh, khonh choeu 7 pe dvkhyamh mulas soefuqthunk kuot: Nyhang choeu 4 pe dvkhyamh nghuot.

²Hau nyei thunk mas khyau eq tap: hau khyau ka phon yah dvgungs teh kuot toh; nyang hauh yvlyis thunk yah tsain kyop toh.

³Phon yah sen dah auh, tsohthauh, khuq, shohzvp, nyi auh dvnganh lyis thunk yah kuot.

⁴Thunk dvn-gya kuot las phon lvt vjeis mas toh.

⁵Tanzoe jauh das xiklyis hau dvn-gya nyei thunk mas tap das zis thunk vkhwank nyei koeuq kuot.

⁶Nyang tanzoe dvzomh lyis akhesha saiq yah kuot las thunk kyop.

⁷Phon dvng das xiklyis thyishot haqshot vkhwank mas hau tanzoe dvzomh jauh toh. Nyang hau phon lhyi saiq yah kuot las vkhau khungh.

⁸Nyang YHENSAIN nyeis dah moq zvng khomh mas los gyangh phuqsoe nyeis vmesbih jens dah thunk bvngtoenk yoeus las jeislang yahge nyah khyei kuot.

⁹Nyang YHENSAIN nyeis dah zvng khyam eq kuot. Mautyi shot pheh, misyhwiq seh yah 50 gaiq xing dah khyam gos dvkoeuq kuot.

¹⁰Nyang hau zains aiqci yahge phangh aiqci lhyi thunk yah kuot las nghweh yahge zains kweh gas ngwis yah kuot.

¹¹Mautsung shot pheh eq 50 gaiq xing dah khyam gos mas zains aiqci, nyah phangh aiqci lhyi thunk yah kuot las nghweh yahge zains kweh lyis gas ngwis yah kuot.

¹²Buiswvng shot dah khyam gos gas 25 gaiq xing lha, zains dvci, nyah phangh dvci kuot: zains nghweh yahge kweh gas ngwis yah kuot.

¹³Buisthuq shot pheh ganthoq khyam eq 25 gaiq nghuot.

¹⁴Khyam khomh dah gohtoeu dvshot xiklyis khyam gos gas 7 gaiq dvkhyamh xing lha zains somh lom, phangh somh koeuq nghuot.

¹⁶Khyam goms shoq dah khyam gos dvnganh gas misyhwiq seh nghuot.

¹⁷Zains dah phangh gas thunk, nghweh yahge kweh gas ngwis yah kuot: zains dah vthyoh mha ngwis yah kyop: khyam zains dvnganh lyis ngwis kweh kat toh.

¹⁸khyam khomh gosseh gas misyhwiq seh nghuot las, sauhkhying vlanh, nesnoq, vnes yah thauh saiq toh: hauh xing choeu dvci gaiq, nyhang choeu gohtoeu khyam gosseh yah dvyih, 2 gaiq dvkhyamh nghuot.

¹⁹Hauh xiklyis zains nyei koeuq, thunk phangh nyei koeuq, nghweh eq ngwis yah, zains thyoh kyop yahge zains kweh ngwis nghuot.

²⁰Zvng khyam yahge Zvng dah jywangh dvnganh thunk nghuot.

²¹Haih zis gas tyingtoh lyi 10 lhaih toh dah luklhywaq aiq koeuq joq dah YHENSAIN Nyeis dah Zvng tsuk yvmas yhung dah kyahsoe comh cho nghuot. Haih comh cho lhyi Moshe taiq toh khyvlyis, phudyei Aron lo Ithama shwih uhshe lha Lewi jens tsain chank kuot.

²²YHENSAIN Moshe lhyi yah taiq ya taiq toh zis dvnganh lyis Yuda vkoq mas dah Hur nyeilo, Uri lo Bezele kuot.

²³Nyang lyis pangh soeu, Dan vkoq mas Ahisamak lo Oholiab gas luk mas thwang tap, loqmuh dap las; vlanh, nesnoq, vnes sauhkhying yah lhyent goeus jyuhmahsen khying yungh gan mas khoh seq kat soeu nghuot.

²⁴Hau gyingshang joqyos dah muh dvnganh xiklyis thank dah xing, lyi jus jvng khyvlyis 2,195 paung nghuot.

²⁵Moqphung nyings mas bos bang dyei dah ngwis dvnganh, hau gyingshang joqyos jvng khyvlyis 7,550 paung nghuot.

²⁶Nyings bos bang aiqci zvn masyah thoq pheh bang dvnganh 603,550 nghuot zis yah dvyhangteh, nyamoq dvyuk dvyuk dyei zis gas lyi jus jvng khyvlyis laiq las sang nyhoq dyei.

²⁷Gyingshang zvng dah phangh yahge gosseh dah phangh shonh das xiklyis ngwis 7,500 paung wvng: phangh dvkoeuq mas ngwis 75 paung wvng las phangh dvxo nghuot.

²⁸Bezalel gas zains dah nghweh yahge zains thyoh kyop las hauh yvlyis kweh kat das nyhenshang ngwis 50 paung yhung.

²⁹Thunk vlu gas 5,310 paung nghuot.

³⁰Thunk hauh zis yah YHENSAIN nyeis dah zvng khomh dah phangh, phon, dvn-gya yahge phon yah sen zis dvnganh,

³¹Khyam yvmlhaink phangh, khyam khomh phangh, zvng jywangh dvnganh, khyam yvmlhaink dah jywangh dvnganh lyis kuot.