Read Achang DYUNG 4 Bible Online

DYUNG 4 - Achang bible

DYUNG 4

¹Hauh thang lhyi Moshe toeuh zis gas, YHENSAIN ka nvng lyis ma nyvng xoeuq, ge nyamoq ngos lyis ma loms mvbeh, ngah dang eq ma tsain gyo mvbeh, ge.

²YHENSAIN nyang lyis taiq zis gas, Hau nah loq mas zis cha nghuot, ge lyis nyang gas, Lhamloq nghuot, ge.

³YHENSAIN ka, Nyeisjvng mas doeuh toh aq, ge. Nyang eq hauh zis doeuh toh las houka lhangnyis bweh joq, Moshe eq hou mhayah phang.

⁴YHENSAIN Moshe lhyi taiq zis gas, Nah loq yhonh las nyah lhyank loh zwi aq, ge lyis nyang eq loq yhonh las hauh yvlyis e zwi lyis houka nyah lhamloq doms bweh los.

⁵Housoeh kuot lyis nyamoq phauh thyeih moq dah Mangso, Abraham dah Mangso, Isak dah Mangso, Yakop dah Mangso ge YHENSAIN nah jyank mas nyvng xoeuq zis gas, nyamoq jingh das, ge.

⁶YHENSAIN nyang lyis taiq shih zis gas, Nah loq nah dyilhunk mas jauh kat aq, ge. Nyang eq jauh kat las she thuq yoeus lyis yoeuh aq, nyah loq gas gyu teh thyoeu lha mvnggvng gvng joq.

⁷Mangso ka, Nah loq nah dyilhunk mas doms jauh kat aq, ge zis yah dvyhangteh doms jauh kat las she thuq yoeuh lyis, houka nyah shoh vgus doms nghuot goeus.

⁸Nyamoq nvng lyis ma jingh, cangxeih dah vlho lhyi ma gyo dyei lyis eq thang lhyi dah vlho mha jingh das mvbeh.

⁹Hauh vlho aiq koeuq mas eq ma jingh, nah dang eq ma gyo dyei goeus ya jeislvng mas dah jeis gaiq las tungyos mas huot aq, Nile lvng mas dah jeis gas tungyos mas suih bweh das, ge.

¹⁰Moshe YHENSAIN lhyi taiq zis gas, Ngah YHENSAIN eh, Ngos dang taiq ma lyes, xikpheh yah ma lyes, nvng nah jyeidwis lyis taiq uhlyis yah ma lyes lo, Ngos nhuot phyiq, lhyo phyiq, ge.

¹¹YHENSAIN ka nyang lyis, Dius lyis nhuot hank tap dyei? Nhuot hank jet nhang? No hank jet nhang? Nyoq hank nyvng nhang? Nyoq hank jet nhang? Hauh zis ngos YHENSAIN kuot toh ma nghuot lhyeh?

¹²Housoeh las nvng gvshih loh aq, ngos nvng dang taiq yvmas pangh das las, nvng taiq das zis ngos jyauh das, ge.

¹³Moshe ka, YHENSAIN eh, nvng nhang mes soeu lhyi nhang aq.

¹⁴Hauh uhlyis YHENSAIN ka Moshe lhyi nhaiqyo las taiq zis gas, Lewi dius Aron gas nah vmang nghuot ma nghuot lhyeh? Nyang vlhomuh daq taiq zis ngos seq, nyang eq nvng lyis zes das ge thuq los nyeis. Nyang nvng yah xauhgoh lyis nyah ehnyet mas gaus das, ge.

¹⁵Nvng, nyang yah jisgoh las haih dang nyah nhuot mas thot kat dyei das. Housoeh ngos nah aiq yuk gonh lyis pangh las cha taiq das zis jyauh das.

¹⁶Nyang gas dius jens xikkhonh mas nah xiklyis taiq dyei das, nah nhuot gungsthaiq duot das, nvng eq nyah xiklyis Mangso teh duot das.

¹⁷Housoeh nvng kuot das mauhphoh vlho nyhenshang hauh lhamloq eq nah loq mas chi toh aq, ge kat.

¹⁸Hauh thang lhyi Moshe ka nyah yukphoq Yethro jyank mas loh las, Egutu mas tsain nyeis nyah vmang vnoeuh moq vdwis nyeis lo lah loh yoeuh das, ngos lyis nhang kat aq, ge taiq. Yethro eq Moshe lhyi, Nyenstap zis yah loh geh, ge nhang kat.

¹⁹Tsai, YHENSAIN ka Midian mas Moshe lhyi, Egutu mas tauh loh aq, nah kang lhyi xo bang shei goeus, ge.

²⁰Housoeh las Moshe ka nyah yhensain nyhiq yahge lotang lhyi mauhlyihzoe shwih ji las Egutu mas tauh loh. Mangso dah lhamloq eq Moshe nyah loq mas chi toh.

²¹YHENSAIN Moshe lhyi taiq zis gas, Nvng Egutu mas jweh loh lyis ngos nvng lyis dyei toh yomsoq muh dvnganh Pharao xikkhonh mas kuot xoeuq chah zis soh aq: housoeh chixoeuq laus eq ngos nyah ehnyet lhoq than dyei das las, hauh dius jens lyis ma loh nhang das.

²²Nvng Pharao lyis eq, YHENSAIN heisoeh ge nyeis, Israel gas nyah xiklyis loxeih nghuot.

²³Ngah lo ngos lyis yoh paiq bas jungh nhang kat aq, Ma nhang kat ge nvng ngoek yvmvyah yoeuh aq, ngos nah yukgis loxeih lyis sat das oen taiq aq, ge.

²⁴Cholvt thoenggus dvkoeuq mas YHENSAIN ka Moshe yah xauhgoh las, nyang lyis sat das ge xo.

²⁵Nghuot laus eq nyah yhensain nyhiq Zipora gas luk sham yah nyah lo dah vthyoh thyet las hauh zis yah Moshe dah khyei mas tanh dyei las, Nvng gas ngah xiklyis suih dah loloeu saiq nghuot, ge.

²⁶Housoeh YHENSAIN ka Moshe lhyi kat kat. Nyah yhensain nyhiq eq, vthyoh tyomh cho gvng mas, Nvng gas ngah xiklyis suih dap dah loloeu saiq nghuot, ge zis nghuot.

²⁷YHENSAIN Aron lyis taiq zis gas, Mhanhdyvp mas Moshe lhyi loh zes langh aq, ge. Housoeh las nyang loh lyis Mangso dah boms mas Moshe yah xauhgoh las nyang lyis bvlot tanh.

²⁸Moshe ka Aron lyis, YHENSAIN yah nyang lyis taiq nhang kat dang yahge nyang lyis taiq toh vlho dvnganh yah taiq kyoh.

²⁹Moshe yahge Aron gas, Israel jens dah logis jens dvnganhmoq lyis khi tsainh las,

³⁰YHENSAIN Moshe lhyi taiq kat dang dvnganh yah Aron lyis taiq kyoh. Moshe ka dius jens xikkhonh mas hauh vlho chixoeuq.

³¹Dius jens eq lomsjingh. YHENSAIN ka Israel jens lyis lyih komh las, nyamoq dah shanghsenh lyis nyvng goeus ge yvlyis nyamoq xauhgyo lyis nyamoq gop las paiq.