Read Achang DYUNG 40 Bible Online

DYUNG 40 - Achang bible

DYUNG 40

¹YHENSAIN Moshe lhyi taiq zis gas,

²Nvng cangxeih vkhyvp, cangxeih vnyeih lyis hau YHENSAIN nyeis dah zvng toeutsung chah.

³Nvng hau zvng khau mha tyingtoh lyi dvci bos dah Thanghchvp Kwi kat las gosseh yah gos toh chah.

⁴Kihgus lyis kat las houmha kih toh das kyahsoe kih toh chah. Hau nyituonh gus eq kat las nyitoengh eq tsain tuonh toh chah.

⁵Xangh ngheq dah xing phon lyis eq Thanghchvp Kwi xik mas toh las, zvng khomh mas khomh gosseh kat toh chah.

⁶Nvng ngheq dyei phon lyis eq zvng xikkhonh mas toh chah.

⁷Hau jeislang lyis eq zvng yahge phon jo mas toh las jeis kham kat chah.

⁸Hau yvmlhaink yah khyamgos toeutsung lha, khyam khomh mas gosseh lhangh toh chah.

⁹Nvng juot das gyingshang coeu yoeus las zvng yahge houmha bos kyahsoe dvnganh lyis juot zis yah zvng wvng aq. Housoeh hauh zis dvnganh gas gyingshang joq das.

¹⁰Ngheq dyei phon yahge nyah kyahsoe dvnganh lyis eq juot zis yah cheihshang lha, hau phon ka gyingshang thank phon nghuot das.

¹¹Jeislang yahge nyah khyei lhyi eq juot las cheihshang chah.

¹²Aron yahge nyah loloeu jens lyis zvng khomh pheh shwih Los las gungs cheih nhang aq.

¹³Aron lyis hau gyingshang dyimis gvmhuot las, ngah xikkhonh mas phudyei muh wonswuq das xiklyis, nyang lyis coeu juot zis yah cheihshang chah.

¹⁴Nyah loloeu jens lyis shwih yoeus las, dyimis tsain huot lho lha,

¹⁵Ngah xikkhonh mas phudyei muh yoh wons wuq nyeis das xiklyis, nyamoq dah uwus lyis juot dyei teh nyamoq lyis eq coeu juot dyei chah: nyamoq lyis coeu juot cho ka namoq lo jens vcaiq caiq vjangh yoh phudyei das gyamh huon cho nghuot, ge.

¹⁶Moshe YHENSAIN nyang lyis taiq ya taiq toh vgus kuot.

¹⁷Housoeh nyamoq Egutu masyah los aiq vzvn, cangxeih vkhyvp, cangxeih vnyeih lyis Moshe ka hau YHENSAIN nyeis dah zvng toeutsung.

¹⁸Moshe zvng toeutsung lhyi, phangh kat, vkhomp tsuk, vkyank kat zis yah zains tsain toeutsung.

¹⁹Hau zvng thoq mas zvng mau las, hauh thoq mas vnghop yah nghop. Houka YHENSAIN Moshe lhyi taiq toh vgus nghuot.

²⁰Hau luk aiq lhywaq lyis Thanghchvp Kwi mha yoeus kat, kwi vkhwank mas tanzoe jauh lho lha kwi nghop nghop.

²¹Hauh kwi lhyi zvng khau mha kat las, hau Thanghchvp Kwi lhyi gos toh das xiklyis gosseh kat toh. Houka YHENSAIN Moshe lhyi taiq toh vgus nghuot.

²²Nyang Kihgus lyis zvng khau mautsung shot pheh Thanghchvp Kwi lyis gosseh dah nghe pheh toh.

²³Kihgus mas YHENSAIN lhyi phudyei ohlhyoq kih toh. Houka YHENSAIN Moshe lhyi taiq toh vgus nghuot.

²⁴Nyang nyituonh gus lyis zvng khau, mautyi shot, kihgus twi twi mha toh.

²⁵YHENSAIN xikkhonh mas nyang nyitoengh tsain tuonh toh. Houka YHENSAIN Moshe lhyi taiq toh vgus nghuot.

²⁶Nyang xing phon lyis zvng khau, gosseh dah xik mas toh las,

²⁷hau phon mha nghamh shom xangh ngheq. Houka YHENSAIN Moshe lhyi taiq toh vgus nghuot.

²⁸Nyang zvng dah khomh mas gosseh lhangh las,

²⁹hau gosseh xik mas ngheq phudyei phon toh. Hau mha nyang gas ngheq phudyei lyis eq, zonoms phudyei lyis eq phudyei. Houka YHENSAIN Moshe lhyi taiq toh vgus nghuot.

³⁰Jeislang lyis zvng yah phon jo mas toh las cheih das xiklyis houmha jeis tyink toh.

³¹Moshe, Aron yahge Aron dah loloeu jens houmha khyei loq tsain cheih.

³²Nyamoq zvng khau mha wvng das lyis, phon mha loh das lyis tsain cheih. Houka YHENSAIN Moshe lhyi taiq toh vgus nghuot.

³³Zvng yahge phon yvmlhaink yah khyam toeutsung lha, khyam khomh mas khomh gosseh lhangh toh. Housoeh Moshe hauh muh dye.

³⁴Hauh uhlyis jyommauh gas zvng lyis nghop las YHENSAIN dah phunk gas houmha dyingh joq.

³⁵Hauh gvng masyah Moshe zvng khau mha ma gis wvng loh.

³⁶Israel jens dah gyung cho gonh mas zvng masyah jyommauh yop loh lyis, Israel jens suh e das cho pheh dvtsain suh e.

³⁷Jyommauh ma yoeus tyamp lyis gas, yoeus tyamp buisnyeis jweh shoq ma suh e, tsain nyeis.

³⁸Khasoeh ge lyis Israel jens suh e gyung dvcho gonh mas, nyamoq dvnganhmoq xikkhonh mas nyeih lyis YHENSAIN jyommauh gas zvng lyis nghop, las nyenh lyis nyi bvng joq.