Read Achang DYUNG 9 Bible Online

DYUNG 9 - Achang bible

DYUNG 9

¹YHENSAIN Moshe lhyi taiq zis gas, Pharao jyank mas loh las, YHENSAIN Hebre jens dah Mangso heisoeh ge: Ngos lyis loh yoh phudyei das xiklyis ngah dius lyis loh nhang aq.

²Nvng nyamoq lyis loh nhang das zis doms ngoek lyis gas,

³Ngos namoq dah gaunyhauq dvnganh ge, noeu jens, nyang jens, yvng, shvbeq phung, mauhlyihzoe jens, gola-u jens thoq mas gyukphoh noslom nhang zis yah namoq lyis joeng das.

⁴Israel dah gaunyhauq yahge Egutu gaunyhauq jo mas YHENSAIN kyoq das las Israel jens dah gaunyhauq gas dvdoeu eq ma shei das.

⁵Nvpyo YHENSAIN haih muh haih mau mas bweh nhang das ge YHENSAIN ka shishenh top toeuq toh, oen lha taiq aq, ge.

⁶Nungsnvp YHENSAIN ka hauh muh bweh nhang lha Egutu jens dah gaunyhauq dvnganh shei. Israel jens dah gaunyhauq gas dvdoeu eq ma shei.

⁷Pharao gas dius nhang lha, Israel jens dah gaunyhauq dvdoeu eq ma shei zis nyang seq. Nghuot laus eq Pharao nhaiqlom than lha hauh dius jens lyis ma loh nhang.

⁸Hauh thang lhyi YHENSAIN Moshe yahge Aron lyis taiq zis gas, Nah zomh gas nyikhyomp mas dah nyiyvp tsop yoeus las, Moshe ka hauh yvlyis Pharao dah nyoqlvtjvng mas mau pheh doeuh lhank kat aq.

⁹Hauh zis gas Egutu mau gonh mas dang dah phvlhau duot las, mau gonh dah dius yahge gaunyhauq mas dyings jyen nyuk los das, ge.

¹⁰Nyah zomh gas nyikhyomp mas nyiyvp tsop las Pharao xikkhonh mas tsain yap joq. Moshe ka hauh yvlyis maukhung mha sanh tangh kat las, houka dius mas eq, gaunyhauq mas eq dyings jyen nyuk los.

¹¹Hweq kat bang gas Moshe xikkhonh mas ma yoh yap lo, khasoeh ge lyis nyamoq mas eq gohtoeu Egutu bang mas teh dyings jyen nyuk los.

¹²YHENSAIN Moshe lhyi taiq toh vgus, YHENSAIN ka Pharao nhaiqlom lyis than nhang lha nyah zomh dang ma gyo dyei.

¹³YHENSAIN Moshe lhyi taiq zis gas, Nvng nvpyo noq yah Pharao yah loh xauhgoh las nyang lyis, Hebre jens dah YHENSAIN Mangso heisoeh ge, oen taiq aq. Ngos lyis loh phudyei das zis ngah dius jens lyis loh nhang aq.

¹⁴Nyeisjvng gonh mas ngos teh soeu hank ma bos zis gas nvng yoh seq das xiklyis, gvshih haq lhain ka nah zau jens yahge nah dius jens lyis kyingh ma nghuot, ngos nvng lyis eq joeng das.

¹⁵Ngos ngah loq toeu lha nvng lyis eq, nah dius jens lyis eq yomh yah joeng lyis nvng shank shoq monh tyamp das.

¹⁶Nghuot laus eq ngah yomsoq nvng lyis chixoeuq das zis yahge ngah nyings nyeisjvng gonh hoeuh loh bas jungh oen ngos nvng lyis kang dwis nhang toh.

¹⁷Nvng gvshih eq lhoq lhoq teh ngah dius jens lyis loh nhang das cho ngoek nyeis.

¹⁸Egutu mau kuot masyah gvshih jweh shoq ma gyoh ku shih, svsoh kuh dah gyutomp mau, nvpyo haih shishenh lyis wus khyoq nhang das.

¹⁹Housoeh las pa mha nyeis nah gaunyhauq yahge nvng yoh ya yoh yvlyis mau gau yvmas toh nhang aq. Yhen mha ma hwank, pa mha nyeis dah dius yahge gaunyhauq dvnganh gas hauh gyu bat las shei das, ge.

²⁰YHENSAIN dang lyis gyukwoms dah Pharao zau jens dvyhamh gas nyamoq dah gaunyhauq yahge jyeidwis jens lyis yhen mha shwih toh.

²¹YHENSAIN dah dang lyis chaxwe ma nhang bang gas nyamoq dah jyeidwis yahge gaunyhauq lyis pa mha kat lhamp toh.

²²YHENSAIN Moshe lhyi taiq zis gas, Nah loq maukhung pheh toeu aq, Egutu mau gonh mas dah dius, gaunyhauq, tsungh toh vzains Egutu mau gonh thoq mas gyutomp mau gyoh bas jungh, ge.

²³Moshe eq nyah lhamloq maukhung pheh toeu lho lhyi, YHENSAIN ka maujau yahge gyu mau wus khyoq. Maunyoq eq nyeisjvng mas nyik jweh. Housoeh YHENSAIN ka Egutu mau mas gyutomp mau wus nhang.

²⁴Egutu bang nyeis lyih masyah hauh mau gonh mas khanhamp eq ma bweh yoeuh, svsoh changh dah gyutomp mau wus, maunyoq nyik.

²⁵Egutu mau gonh mas dah pa mha nyeis ya nyeis dah dius lyis eq, gaunyhauq lyis eq hauh gyutomp yah tsain bat. Pa mha tsungh toh vzains dvnganh lyis gyutomp yah bat khyop tyamp, saiqzains eq gyau tyamp.

²⁶Israel jens nyeis dah Goshen mha ka hauh gyutomp mau ma gyoh.

²⁷Pharao gas Moshe yahge Aron lyis khi nhang lha taiq zis gas, Haq lhain ka ngos shuot: YHENSAIN ka dan, ngos yahge ngah dius jens dvshuot.

²⁸Mangso dah maujau jau zis, gyutomp mau geh nyhink goeus: YHENSAIN lhyi dung dyei aq: ngos nyamoq lyis loh nhang das, namoq heimha ma nyeis lo noh, ge.

²⁹Moshe nyang lyis taiq zis gas, Ngos wus masyah thuq loh yah dvyih ngos loq toeu lha YHENSAIN lhyi dung das. Housoeh YHENSAIN ka nyeisjvng sain nghuot yvlyis nvng yoh seq das xiklyis hauh maujau jau zis yahge gyutomp gyoh zis doms tyamp das.

³⁰Nghuot laus eq nvng yahge nah zau jens gas YHENSAIN Mangso lhyi ma gyuk shih zis ngos seq, ge.

³¹Jei yahge yoh gas yuonh goeus: khasoeh ge lyis yoh gas nyhink goeus, jei eq buh goeus.

³²Sunghso ka thang lhyi dvnyhink las ma monh.

³³Moshe ka Pharao jyank masyah thuq las wus nghe jweh lyis YHENSAIN lhyi nyah loq toeu las shvmanh dung. Housoeh maujau eq, gyutomp yahge mau wus zis eq doms tyamp.

³⁴Housoeh mau ma wus lo, gyutomp ma gyoh, maujau ma jau lo yvlyis Pharao nyvng lyis nyang yaunos doms kuot las nyang yahge nyah zau jens gas vgus nhaiqlom doms than tyamp.

³⁵YHENSAIN Moshe lhyi yah taiq toh zis yah dvyhangteh Pharao nhaiqlom than lha Israel jens lyis ma loh nhang.