Read Achang YOBA 1 Bible Online

YOBA 1 - Achang bible

YOBA 1

¹Uza mau mas Yoba ge dah vbusbih dvyuk nyeis. Nyang gas Mangso lhyi paiq soeu, nyang lyis lomluk soeu nghuot. Nyang gas dius gis nghuot las ma gis zis ma zangh kuot das zis zaih.

²Nyang loloeu nyhet yuk, lonyi somh yuk yoh.

³Nyang yvng nyhet khyoengh, gola-u somh khyoengh, noeulu oengxo kya, luzoe zains oengxo yoh. Uhkung jens nyoshoq yoh las, buisthuq mau mas dis thank soeu nghuot.

⁴Nyah loloeu jens gas, hank eq hank toeuq toh, nyah buisnyeis lyis nyah yhen mha pwe dvgeh gyangh tsain kuot las nyamoq nhamhmuh somh yuk lyis eq khi khi kuot.

⁵Pwe dvlhain dye khanghmuh Yoba gas nvp lyis noq yah toq las nyah lo jens dvyuk dvyuk xiklyis phudyei zis yah cheihshang cho kuot dyei. Nyang haih cho vjangh kuot dyei: khasoeh ge lyis nyah lo jens dvyuk yuk Mangso lhyi zangh nhoengh zis yah yaunos kuot mvbeh ge nghamh.

⁶Maukhung mha bang YHENSAIN xikkhonh mas los thuq xoeuq nyeih lyis Satan eq nyamoq yah dvgeh houmha bos los.

⁷YHENSAIN ka Satan lhyi, Nvng khalhye yah los, ge nyei. Satan toeuh zis gas, Nyeisjvng thoq mas kwang yenh masyah jweh los, ge.

⁸YHENSAIN ka Satan lyis nyei, Nvng ngah jyeidwis Yoba lyis vsoh yoeuh lah? Nyeisjvng mas nyang teh gis las lomluk zis hank ma bos. Nyang ngos lyis paiq, ma gis zis ma kuot das xiklyis jhank, ge.

⁹Satan phuk taiq zis gas, Yoba nyang cha ma yoh lo lyis nvng lyis paiq das lah?

¹⁰Nvng, nyang lyis eq, nyah yhenbang lyis eq, nyang sain zis dvnganh lyis eq vjangh gomh toh dyei. Nyang kuot zis dvnganh lyis eq nvng shvmanh dyei, nvng nyang lyis noeu luk shoq dyei las hauh mau mas dvmau gonh dyingh los.

¹¹Nghuot laus eq gvshih nvng nyang yoh zis dvnganh yoeus tyamp dyei oen goh, nyang nah xikkhonh mas nvng lyis nhoengh das, ge.

¹²YHENSAIN Satan lyis taiq. Nghuot goeus, nyang yoh ya yoh zis dvnganh nah loq khau mas nghuot. Yoba dah gungs lyis gas vnos nhang, ge. Housoeh las Satan thuq khoq.

¹³Dvnyeih gas, Yoba lo jens, nyamoq dah mang muh yhen mha pwe kuot nyeis lyis,

¹⁴loeus kyoh dvyuk Yoba jyank mas wuih jweh las taiq. Ngamoq noeulu jens lyis yah yos phuk nyeis. Mauhlyihzoe gas vnvm mas dah katjang mas nyeis.

¹⁵Sabean bang nyetlos nyettant los zan las gaunyhauq komp loh; jyeidwis jens yuk khanghmuh lyis eq sat khoq, ngos kyingh dvnyet lo. Nvng lyis los kyoh das zis ngos dvyuk kyingh dvphang luiq los lo, ge.

¹⁶Nyang ma dye taiq shih lyis gohtoeu jyeidwis dvyuk los las taiq, Maunyoq zangh las yvng yahge yvng yoeuh bang dvnganh lyis sat goeus. Nvng lyis los kyoh das zis ngos dvyuk kyingh dvphang luiq los lo, ge.

¹⁷Nyang ma dye taiq shih lyis, gohtoeu jyeidwis dvyuk jweh los las taiq, Khalde bang jes somh dvp ngamoq lyis los zan las gola-u komp loh, nah jyeidwis jens dvnganh lyis eq sat, ngos kyingh dvnyet lo: nvng lyis los kyoh das zis ngos dvyuk kyingh dvphang luiq los lo, ge.

¹⁸Nyang ma dye taiq shih lyis gohtoeu jyeidwis dvyuk jweh los las taiq, Nah lo jens gas nah lobes yhen mha pwe kuot nyeis lyis,

¹⁹mhanhdyvp masyah lyeismuh jyang los las, hauh zis yhen lhyi muot khyoq yvmvyah, nyamoq dvnganh lyis sat goeus. Nvng lyis los kyoh das zis ngos dvyuk kyingh dvphang luiq los lo, ge.

²⁰Hauh uhlyis Yoba gas toq las kuk zis yah nyah dyimis langchuiq, uhyuk las nyeisjvng mas gop las paiq.

²¹Nyang taiq, Ngos khoeu los lyis cha ma bos los, ngos cha ma bos bos shei loh das. YHENSAIN dyei las gvshih nyang doms yoeus tyamp goeus. Nyah nyings chungh zis xauh bas jungh, ge.

²²Yoba gas hounyhoq bweh laus eq Mangso lhyi yobos huon zis yah yaunos ma kuot.