Read Achang YOBA 10 Bible Online

YOBA 10 - Achang bible

YOBA 10

¹Ngos kang dwis nyung goeus, ngos nhaiqkhoh zis yah noskyingh yvlyis gyo dyei aq.

²Mangso eh, ngos lyis dang thang vthyet. Nvng ngos lyis tsuk cho cha nghuot zis taiq aq.

³Nvng hou iq lhoeng das zis gas nah xiklyis jus lhyeh? Nvng nvnyang loq yah kuot toh yvlyis choqh lhyeh? Lhung bang toeuq cho mha bos gaus lhyeh?

⁴Nvng vyhang lhyi ngamoq nyvng teh nyvng lhyeh?

⁵Nah kang ngamoq kang teh lyung lhyeh?

⁶Housoeh lyis nvng ngah yaunos lyis xo lha ngah yobos lyis chamus choq yoeuh.

⁷Ngos yobos ma bos zis nvng seq, ngos lyis nah yomsoq masyah hank ma yoh khyuot zis eq nvng seq.

⁸Nah loq yah ngos lyis toeuq las gvnkhanh toh. Gvshih hauh loq yah ngos lyis mhont.

⁹Nvng ngos lyis tsohnyhon masyah[4] kuot toh yvlyis soh aq. Nvng ngos lyis tsohmop mas doms thungh thyi das lhyeh?

¹⁰Nvng ngos lyis ngah ungwes ung mha jeis soeh huot kat las, ngah gungs houmha bes zoh los.

¹¹Nvng ngah gungs lyis shoh gyi yahge shohyau yah vzwvng kuot las, shohyau lyis gyi yahge shohyeis yah nghop dyei.

¹²Nvng ngos lyis kang yahge goeng joq dah jyetdap cho dyei, nvng gomh toh yvmvyah ngos kang dwis nyeis.

¹³Nghuot laus eq nvng ngos lyis nos nhang das ge gauh toeuq nyeis cho gvshih ngos seq.

¹⁴Ngos yaunos kuot lyis nvng chank comh las, ngos lyis yobos khyuot dyei das zis nvng he.

¹⁵Ngos yaunos kuot yah dvyih ngos gas yau cho mha jweh joq. Nghuot laus eq ngos jus zis kuot lyis nyings ma hoeuh, shohjyen lha xoq dvphuh.

¹⁶Ngos ung cho cha ma yoh lyis, nvng ngos lyis khangkhyi teh khat las, ngos lyis nos nhang das zis yomsoq muh yangh kuot.

¹⁷Nvng ngos lyis tyi dah kanghjyoeng vjangh yoh; nvng ngos lyis nhaiqyo cho zes zes je los. Nvng zan cho vsaiq vjangh cvvq nyeis.

¹⁸Mangso eh, nvng ngos lyis chamus khoeu los nhang? Ngos lyis hank eq ma nyvng shih lyis shei gis.

¹⁹Ung mhayah lop pheh dan loh das zis gas khanhamp eq ma nyeis teh gis.

²⁰Ngah kang vluk thank loh goeus ma nghuot lhyeh? Nghuot lo goeus jungh. Ngos thuq loh das shishenh lyis ngos lyis gaus nhang aq.

²¹Ngos loh bah ge goeus las ma tauh los lo das. Chuot las nhaiqkuk nhaiqngis phoh mau pheh loh.

²²Bvng zis yangh chuot joq dah mau, chuot zis yahge siyet bos las khamkhvv dah mau nghuot.