Read Achang YOBA 11 Bible Online

YOBA 11 - Achang bible

YOBA 11

¹Zopha gas, Hai vjyuk ma bos yvlyis hank eq ma phuk das. Dang nyoshoq taiq zis gas nvng lyis jus ge dyei das lah?

³Yoba eh, ngamoq nvng lyis ma yoh phuk taiq oen nghamh lhyeh? Nvng jwangh dah dang gas ngamoq mas tsoeklo joq das lhyeh?

⁴Nvng taiq lyis, nvng lomsjingh zis jus; nvng Mangso nyoqlvtjvng mas gyingshang ge toenk toenk taiq.

⁵Mangso nvng lyis phuk taiq nhang mes.

⁶Nyang gas nvng lyis joeui cho vja ja lyis taiq kyoh das; vyhang ka dius dah seq cho thoq lyis sunk noq. Mangso ka nvng lyis kham vvng thoq lyis shauh las joeng nyeis.

⁷Nvng Mangso dah kuhxing cho yahge yomsoq lyis thank shoq yoh xo yoeuh lhyeh?

⁸Mangso dah joeui ka maukhung thoq lyis zes nyhang. Mangso ka shei mau lyis seq laus eq nvng gas ma seq.

⁹Mangso dah kuhxing cho ka nyeisjvng thoq lyis zes dvm, thomh thoq lyis zes lvm.

¹⁰Mangso ka nvng lyis nyhik las zaukauq yvmas shwih loh lyis nyang lyis tomp toh das zis hank nyeis?

¹¹Mangso ka khah dius jens vkyuh ma bos zis seq, nyamoq dah ma gis zis kuot cho dvnganh nyvng.

¹²Ye mauhlyihzoe dius thuqsoengh lyis, koh bang joeui bos zoh los das.

¹³Yoba eh, nvng nah nhaiqlom lyis jus jus toh las, nah loq Mangso jyank pheh toeu aq.

¹⁴Ma gis cho yahge shuot cho lhyi nah yhen mhayah yoeus tyamp aq.

¹⁵Housoeh nvng mas xoqphuh cho ma bos das las nvng ma gyuk das.

¹⁶Housoeh lyis jeis je zis lai las ma soh lo teh nah yau cho dvnganh nvng soh nyeis masyah shen dyuk loh das.

¹⁷Nah kang ka nyeihgungs buis tso thoq lyis zes bvng das, kang dah mauchuot thank shishenh gas nyoq nyvng los lyis teh bvng das.

¹⁸Nvng jesluiq las nghamhloms cho dyingh dyingh yah nyeis das. Mangso nvng lyis gos las noyos dyei das.

¹⁹Nvng nah jeswus jens lyis ma gyuk noh. Dius nyoshoq nvng lyis pangh cho sang das.

²⁰Lhung bang gas yomgyau zis yah yvmlhaink yoeuh laus eq phang luiq cho xo ma nyvng. Nyamoq dah nghamhloms cho ka shei das cho kyingh dvnghuot, ge.