Read Achang YOBA 14 Bible Online

YOBA 14 - Achang bible

YOBA 14

¹Yang dvnganh gas yomnhuk zis yah vshoh vjyen khoeu los. Yah kang ka lyung las yau cho nyoshoq bos.

²Yang bes los las ban teh lvnyap nyhauh loh; Yang siyet teh dyuk loh.

³Mangso eh, nvng ngos lyis yoeuh tsuk toh lhyeh? Ngos lyis zaukauq las soetuon lhyeh?

⁴Dius cangsoeu teh ma lhoq masyah lhoq zis khanhamp eq cha ma yoh thuq los?

⁵Nyah kang dah buisnyeis, lhamhmuh khyvp kang dwis das zis lyis xik lyis yah thyet toh dyei goeus. Nvng toh las hauh yvlyis ma yoh thaiq tyamp.

⁶Yau dah nyah kang dwis cho thank shoq nah nyoqnho nyah jyank masyah lhain loh aq.

⁷Saiqzains thoeuq lhain laus eq hauh xiklyis nghamhloms cho bos. Vkoq tot las yoh doms nyonh los.

⁸Hauh vnyet cauh loh las, vngot gas nyeisjvng mas yom tyamp laus eq,

⁹jeissoq gvng mas hauh zis gas saiqlo zains teh vnyuk tot los das.

¹⁰Nghuot laus eq dius shei lhyi houka thank goeus. Nyang soqdom goeus ya nyang khalhye nyeis?

¹¹Jeislvng kanh loh teh, thomhlo kyuk loh teh,

¹²dius gas shei lha khanhamp eq ma toq los lo. Nyamoq gas maukhung joq dvchank khanhamp eq ma soh los lo; nyamoq yhet masyah khanhamp eq nhont zis ma xauh lo das.

¹³Nvng ngos lyis shei mau mas tamh joq nhang mes; nvng nhaiqyo zis lai shoq ngos lyis tamh nhang aq, hauh thang lhyi ngos lyis soh das shishenh toeuq toh aq.

¹⁴Dius gas shei goeus ya yoh doms dwis das lah? Nghuot laus eq ngos gas zes gis shishenh lyis langh das. Hai yau shishenh thank shoq langh das.

¹⁵Hauh thang lhyi nvng lui das, ngos gas toeuh das las, nvng kuot toh soeu ngos lyis nvng nhaiqdoeus das.

¹⁶Nvng ngos bes cheh khanghmuh chank yoeuh las ngah yaunos lyis ma zungh yoeuh dyei.

¹⁷Nvng hauh yvlyis khyuot dyei las yoeus tyamp dyei das. Nvng ngos kuot shuot zis dvnganh yvlyis buot tyamp dyei das.

¹⁸Boms mas gvkhyot khyot las goeng dah luktyoq khyot she loh.

¹⁹Jeis yah luk lyis khyot loh das, mau jyang yah nyeis coeu lyis cheih loh das; housoeh kang dwis cho xiklyis dius nghamhloms yvlyis nvng thyoq tyamp.

²⁰Nvng dius thoq mas yomsoq chi lha nyang lyis vcaiq vto khat tyamp. Nyah nyoqnho shei yvpheh thaiq loh.

²¹Nyah lo jens nyoqnho ngelang yoh laus eq nyang khanhamp eq ma seq lo; xoqphuh laus eq nyang lyis hank ma taiq kyoh.

²²Nyang nyah gungs mas khih zis lyis kyingh kham zo las, nyah dyos kuk nyeis, ge.