Read Achang YOBA 16 Bible Online

YOBA 16 - Achang bible

YOBA 16

¹Ngos housoeh teh dang xikpheh xauhgyo ku; namoq dyei dah nhaiqtaink zis gas shoeuhshih zis dvnghuot.

³Namoq vjangh taiq nyeis shih das lah? Nvng vjangh thang thank dang bos lhyeh?

⁴Namoq ngah joqyos mas, ngos eq nah joqyos mas nghuot lyis, namoq taiq nyeis dang dvnganh ngos yoh taiq. Ngos joeui bos bos lainkamh nocwih kuot las dang nyoshoq yoh taiq zungs toh.

⁵Joeui dyei dang yah ngos namoq lyis yom yoh dyei. Tsoq taiq zis yah namoq lyis nhaiq yoh taink.

⁶Ngos dang taiq lyis eq nos ma sunghhuq; ma taiq taiq nyeis lyis eq ma nyens.

⁷Mangso eh, nvng ngos lyis nyungdaus nhang: nvng ngah yhenbang dvnganh lyis mhont tyamp.

⁸Nvng ngos lyis nyhik yoeus; nvng ngos lyis kanghjyoeng kat. Ngos yau mas yeis dvjons lo las dius jens gas, hauh zis ngos cu dah kanghjyoeng nghuot ge yoeus.[7]

⁹Mangso ngos lyis nhaiqyo las vdoeus doeus langchingh; nyang ngos lyis hoeng zis yah nyoqtyi yoeuh.

¹⁰Dius jens ngos lyis nhuot yhont: ngos lyis khyam nyang lhaink toh las bvlot tyuk dyei.

¹¹Mangso ka ngos lyis ma gis bang loq mas kyauh.

¹²Ngos nyens nyens tap tap nyeis laus eq Mangso ngos lyis khyunghdoq mhayah yoeus las pop pop bat, thunghthyi. Mangso ka ngos lyis baiq toeuq joqyos khyvlyis yhung lha shot khanghmuh masyah ngos lyis nyo baiq.

¹³Nyo gas ngos lyis zuk las dvmtap. Hauh thang lhyi yangh nyang nhaiqnyen cho ma chixoeuq.

¹⁴Nyang ngos lyis vlhain lhain dvmtap.

¹⁵Ngos kuk zis yah yanghthung dyi wuot las ngos hai tsohmop boms mas tsung toh.

¹⁶Ngos ngah nyoqnho nes shoq ngaus. Ngah nyoqjeih yam las siyet yah lhaink toh.

¹⁷Nghuot laus eq ngah loq yah lhoeng cho cha ma kuot: ngos shvmanh dung zis eq gyingshang.

¹⁸Nyeisjvng eh, ngos gas dius sat soeu teh ngah suih lyis vnghop toh, lyi jus cho xiklyis ngos kaiq ngaus thwe lyis nvng ma xauhgyo vtomp toh.

¹⁹Maukhung mha ngah xiklyis toq yap las ngah shot pheh taiq soeu dvyuk bos.

²⁰Ngah dyenschangh jens ngos lyis nyhap; ngos gas Mangso xikkhonh mas nyoqdyeis shuon.

²¹Dius dvyuk nyah dyenschangh xiklyis bos dung teh, ngos ngah xiklyis Mangso lhyi bos dung dyei das dius dvyuk o.

²²Gvshih ngah nyenhkyi ka lai loh nyeis las ngos gas ma tauh los lo dah cho mha suh loh.