Read Achang YOBA 17 Bible Online

YOBA 17 - Achang bible

YOBA 17

¹Ngah kang thank das zis ni goeus, ngos soq ma yoh she lo; ngah xiklyis cha ma nyet lo, lop kyingh dvjoq lo.

²Ngos gas yuk khanghmuh ngos lyis kha iq khoh shoq jwangh yvlyis zungh yoeuh nyeis.

³Mangso eh, ngos gas dang jings. Ngah dang lhom yoeus dyei aq. Ngos taiq yvlyis hank eq ma bos thuk.

⁴Nvng nyamoq nghamh yoeuh das ehnyet nyheih tyamp dyei las gvshih nyamoq ngos lyis v ung nhang.

⁵Sodang cauh mas, Dvyuk yuk nyah dyenschangh lyis unghzo soeu ka, nyah lo jens hauh yvlyis xauh kham, ge.

⁶Gvshih dius jens haih sodang yhung lha ngos lyis tyi; nyamoq ngah nyoqnho mha svkanh los dyeh gyon.

⁷Ngos kuk cho ka ngos lyis nyoq vluk jet nhang; ngah loqyom yahge khyei ka siyet teh gyih goeus.

⁸Dang jings ge bang mauh dvn loh. Nyamoq dvnganhmoq ngos lyis mangso ma bos soeu lhyi teh yobos tsain huon.

⁹Phauh nyang gis ge bang gas nyamoq jus ge yvlyis zes zes loms shoq kuot.

¹⁰Nghuot laus eq nyamoq dvnganhmoq ngah xikkhonh mas los yap lyis, nyamoq mas joeui bos soeu dvyuk yangh ma nyvng das.

¹¹Ngah buisnyeis tsain lai loh goeus; ngos nghamh toeuq toh zis dyoq tyamp goeus; ngos nghamhloms zis dyuk goeus.

¹²Nghuot laus eq ngah dyenschangh jens gas nyenh gas nyeih nghuot ge; nyamoq taiq lyis bvng zis ni los goeus ge laus eq, ngos gas chuot yvmas dvnghuot joq zis ngos seq.

¹³Ngos nghamhloms zis gas shei mau kyingh dvnghuot, ngos chuot yvmas lhain lha yhet das.

¹⁴Ngos lop lyis ngah uwus, ngos lyis zo dah lukdung lyis ngah ungwes, ngah nhamhmuh jens oen lui das.

¹⁵Ngah dah nghamhloms cho ka khamha? Ngah xiklyis nghamhloms cho hank ma yoh nyvng.

¹⁶Ngos shei mau mas gyoh loh uhlyis nghamhloms cho ngos yah ma loh das.