Read Achang YOBA 18 Bible Online

YOBA 18 - Achang bible

YOBA 18

¹Yoba eh, nvng soeh teh dius gas khanhamp yoh sam das lah? Nvng no las gyo lyis gas ngamoq nvng yah yoh jisgoh das.

³Nvng ngamoq lyis noeu teh dvnghamh, nvng ngamoq lyis koh ge nghamh.

⁴Nvng nhaiqyo zis yah nvnyang gungs lyis dvnos nhang. Nvng nhaiqyo yvmvyah nyeisjvng phang loh das lah? Nvng ehnyet tap shoq Mangso ka boms lyis xwih tyamp dyei das lah?

⁵Lhung bang dah bvng zis dyuk loh das: hau nyilhyam ka khanhamp eq madoms duk lo das.

⁶Nyamoq zvng mas nyitoengh soeng soeng noq das.

⁷Nyamoq beszoh gas goeng khoq laus eq gvshih nyamoq thungh lains, las nyamoq nyang dah joeui dyei yvmas nyih.

⁸Nyamoq nyho thung yvmas wvng loh las nyamoq khyei mha nyih.

⁹lhyik mas nyamoq khyeichuk nyih las hauh zis yah lang toh.

¹⁰Nyeisjvng mas twih gauh khyoq toh; nyamoq dah cho mha lhyik thung toh.

¹¹Nyamoq dah yvmlhaink mas gyukphoh zis yah langh nyeis. Houka nyamoq thang mha tsuk tsuk chank los.

¹²Nyamoq gas dis ku laus eq gvshih nyamoq yuot shet loh; dyoqbis zainsmuh gas nyamoq dah vyvm mas langh yap joq.

¹³Nyamoq dah gungs mas shei phoh noslom dyos loh las hauh gvng mas nyamoq dah loqyom yahge khyei lhyi bop nhang.

¹⁴Nyamoq jesluiq nyeis dah zvng masyah gang loh. Shei Zau jyank mas lang she loh zis xauh.

¹⁵Hwank sanh las noslom bau sat thang lhyi gvshih nyamoq dah zvng mas dvyuk yuk gis nyeis.

¹⁶Nyamoq dah vnyet yahge vko ka nyhauh las kyuk loh.

¹⁷Nyamoq dah nyings hoeuh cho ka yhen khau mha eq we pheh eq thank tyamp. Nyamoq lyis hank eq ma soh lo.

¹⁸Nyamoq gas kang dwis nyeis mau masyah khat tyamp zis xauh das, bvng masyah chuot yvmas khat tyamp zis xauh das.

¹⁹Nyamoq vnyau vshih ma bos, doeng nyeis zis eq hank ma bos.

²⁰Buisthuq masyah buiswvng jweh shoq nyamoq dah uhpui loqkyoq lyis xauhgyo bang dvnganh gas gyuk zis yah tsain nvn.

²¹Houka Mangso xiklyis cha ma nghamh, ma gis bang dah uhpui loqkyoq nghuot, ge.