Read Achang YOBA 20 Bible Online

YOBA 20 - Achang bible

YOBA 20

¹Yoba eh, nvng ngos lyis lhoeu nhunk. Gvshih ngos phuk taiq das zis ma yoh jhen toh lo.

³Nvng taiq zis ngos lyis laihwangh zis nghuot, laus eq khasoeh phuk das zis ngos seq.

⁴Yang cangsoeu dius lyis nyeisjvng mas cangxeih toh dah gohlhain mhayah lhung bang hank eq nyangh shoq ma yoh pyo zis gas nvng jyoengh nyang seq.

⁶Nyamoq khwank cho maukhung lhyi duons, las nyamoq uhloms jyommauh lyis tanh laus eq,

⁷nyamoq gas phvlhau teh muot dang loh das. Nyamoq lyis seq ku bang gas, Nyamoq khapheh loh au, ge mauh das.

⁸Nyamoq gas yhetmoq teh, nyenh lyis dah nyoqnyvng teh dyuk tyamp las khanhamp eq ma doms nyvng lo das.

⁹Lhung bang gas nyamoq gyangh nyeis joqyos masyah dyuk loh das.

¹⁰Nyamoq lo jens gas, nyamoq dah uwus moq nyungs bang jyank masyah khauh toh yvlyis, doms dyei das.

¹¹Nyamoq dah gungsdom gas noeuh las yangh. Nghuot laus eq ma nyangh lyis nyamoq phvlhau pheh tauh loh das.

¹²Nyamoq xiklyis ma gis dah whitau ka svsoh gis las, nyamoq nhuot khau mha dvkhamh kat las nyah shom ngoms toh.

¹⁴Nghuot laus eq nyah womdau mas hau zonoms gas lhangnyis duk teh khoh loh.

¹⁵Lhung soeu ka nyang khauh toh dah zisyos duk thuq los. Mangso ka nyah womdau masyah yangh hauh yvlyis doms yoeus.

¹⁶Ma gis bang nyhau zis gas nyonoq teh nghuot. Hauh zis gas duk bos dah lhangnyis chweh teh nyamoq lyis sat.

¹⁷Nyamoq gas tsanlun coeu lvng nyvng shoq, nghuot ya nauh yahge dyoyhei yaus dah jeislo lvng jens nyvng shoq ma nyeis das.

¹⁸Nyamoq zwi khank las yoh dah zisyos dvnganh lyis tyamp chah. Nyamoq dah nyeisgis cho lhyi gausyis das toeuh ma yoh.

¹⁹Khasoeh ge lyis nyamoq gas shohjyen bang lyis zaiq las doeuh tyamp toh, dvyuk yuk tsuk toh yhen lhyi yoeus.

²⁰Nyamoq dah nyoqnoq cho ka khanhamp eq nhaiq ma tap.

²¹Nyamoq zo lyis cha eq ma nyet lo; housoeh las gvshih nyamoq dah nyeisgis yaplhoq cho thank tyamp goeus.

²²Nyamoq nyoshoq yoh joq shih lyis yau cho ka nyamoq lyis chank duons das. Nhaiqkuk cho zainsmuh nyamoq thoq mas jweh los das.

²³Nyamoq o zis dvnganh zo nhang geh. Mangso dah nhaiqyo zis gas nyamoq dah zonoms kuot das.

²⁴Nyamoq thyeq moengsa mhayah tungh phang luiq lyis thunk nyo yah baiq khyoq das.

²⁵Nyamoq gungs masyah nyo nuot thuq los das. Nyamoq dah suih masyah nyothyoh ying ying nuot thuq los das las, nyamoq nhaiqlom mas gyuk dvn cho jweh das.

²⁶Nyamoq yung toh dah vyhang dvnganh dyoqbis tyamp. Dius loq yah ma tap dah nyi yah nyamoq eq, nyamoq yhenbang dvnganh ngeh tyamp.

²⁷Maukhung ka nyamoq yaunos lyis tuonhshet. Nyeisjvng eq nyamoq lyis tyi lha kanghjyoeng kat.

²⁸Nyamoq dah nyeisgis cho dvnganh gas Mangso dah nhaiqyo jeis nhauq yvmas dyoqbis tyamp das.

²⁹Heika ka lhung bang lyis Mangso toeuq dyei toh dah uhpui loqkyoq nghuot.