Read Achang YOBA 21 Bible Online

YOBA 21 - Achang bible

YOBA 21

¹Ngos cha taiq nyeis yvlyis gyo dyei geh, houka ngos namoq lyis dung dah nhaiqtaink cho nghuot.

³Ngos lyis dang taiq das toeuh dyei geh; namoq jwangh mes lyis ngos taiq thang lhyi jwangh geh.

⁴Ngos lop zis gas dius yah tyi zis ma nghuot. Ngos ma yoh jhen dah gis cho bos.

⁵Ngos lyis yoeuh las mauh dvn geh, housoeh mauh dvn zis yah namoq nhuot mas loq yah nghop geh.

⁶Ngos mas cha bweh au oen nghamh lyis, svsoh gyuk las ngah gungs loek loek ko los.

⁷Mangso chamus ma gis bang lyis dwis nyeis nhang au? Nyamoq lyis chamus kang xing lha nyeisgis yaplhoq nhang.

⁸Nyamoq lo jens, nyeilo jens yoh. Nyamoq gas hauh bang dvnganh bes los shoq zungh yoeuh nyeis.

⁹Mangso ka nyamoq dah yhen mha dyoqbis zainsmuh ma she los dyei, nyamoq nyeis yvmas gyukphoh cho khanhamp eq ma bos.

¹⁰Nghuot goeus, nyamoq dah noeu nyhoeu lha, yau cho ma bos noeulo suot los dyei.

¹¹Nyamoq loshang jens gas yvnglo jens teh wuih las lhoeu nyeis.

¹²Toenk, khvlhank, janghau thwe yah tsain goh nyeis.

¹³Nyamoq caiq lyis nyenstap zis yah nyeis lai las, nos ma xauh tsoek yah shei loh.

¹⁴Lhung bang gas Mangso lhyi, nyamoq jyank masyah thuq aq; nyamoq nyah cho lhyi ma mes seq.

¹⁵Nyamoq gas Mangso lhyi ma phuqsoe noh ge nghamh. Nyang lyis shvmanh dung lyis chah vkyuh yoh das lah, ge.

¹⁶Nyamoq gas nyamoq nyang yom yah ung das ge taiq. Nghuot laus eq nyamoq dah nghamh cho lhyi ngos ma yoh lhom yoeus.

¹⁷Lhung soeu dah bvng zis vshei loh ku lah? Nyamoq mas dvyuk yuk dyoqbis zainsmuh vxauh ku lah? Mangso nhaiqyo zis yah nyamoq lyis vjoeng ku lah?

¹⁸Nyamoq lyis lyeis mas huhyau teh muot tangh las lyeis jyang mha tsohmop lyis teh shenh loh.

¹⁹Nvng gas Mangso lhyi, loshang dvyuk lyis nyah uwus dah yaunos gvng mas joeng aq ge sang. Housoeh ma nghuot, Mangso ka yaunos yoh bang nyang lyis dvjoeng bas jungh. Nyang gas nyamoq dah yaunos gvng mas nyang hauh zis kuot yvlyis chixoeuq bas jungh.

²⁰Yaunos kuot bang gas nyamoq nyang dah joeng cho kham bas jungh. Yomzains Mangso dah nhaiqyo zis lyis kham yoeuh bas jungh.

²¹Yah kang thank loh lyis, yah loshang jens pyo das lah, oen yang jyoengh yoh zaih lhyeh?

²²Loeuswons bang lyis yangh soetuon soeu Mangso lhyi dvyuk yuk yoh jyauh lhyeh?

²³Dius dvyhamh shei loh buisnyeis jweh shoq yanghzan zis yah nyeis. Nyamoq gas pyo pyo nyens nyens shei loh. Nyamoq gungsdom lyis vlhomuh nyhoeu toh.

²⁵Gohyhamh gas pyo cho ma bos. Nyamoq nyeis las nhaiq khoh zis yah shei loh.

²⁶Nghuot laus eq dvnganh gas dvyhangteh shei lha nyhop zis xauh. Nyamoq dvnganh lyis luk yah nghop tyamp.

²⁷Namoq mas hoeng phoh nghamh cho cha bos yvlyis ngos seq.

²⁸Namoq nyei zis gas, Gvshih hau ma gis zis kuot, dius zains jens dah yhen khalhye nghuot, ge.

²⁹Nvng gyung suh bang yah ma jisgoh ku lhyeh? Nvng nyamoq doms taiq los zis ma seq lhyeh?

³⁰Mangso nhaiqyo las joeng dah buisnyeis lyis, lhung bang lhyi ma joeng.

³¹Lhung bang lyis kauq das zis hank ma bos, nghuot ya nyamoq kuot goeus yvlyis lvto phuk das zis hank ma bos.

³²Nyamoq lyis vlhomuh zungh nyeis dah nyamoq lopkhyung, lop khyam mha dvng loh lyis,

³³dius nyoshoq vzoh yah bos jens loh. Tsoh yangh nyamoq mvng thoq mas noeuh noeuh nhamp nhamp joq.

³⁴Namoq gas, ngos lyis vjyuk ma bos zis tungh nhaiqtaink nyeis. Namoq ngos lyis dyei dah phuk dang khanghmuh gas hwah zis dvnghuot.