Read Achang YOBA 22 Bible Online

YOBA 22 - Achang bible

YOBA 22

¹Joeui bos thank soeu ka nyah xiklyis vmyat yoh kuot. Dius dvyuk yuk Mangso xiklyis vkyuh yoh kuot lhyeh?

³Nah dan cho ka Mangso lhyi vkyuh dyei lhyeh? Nghuot ya nvng tswi ma bos zis gas nvng lyis pangh jus lhyeh?

⁴Nvng Mangso lhyi gyukwoms gvng mas nyang nvng lyis ma joeng das. Haih xiklyis nyang nvng lyis soetuon jang mas ma shwih loh das.

⁵Houka nah yaunos ma thoq thank lo; Nvng kuot dah ma gis cho dvnganh gvng mas nghuot.

⁶Nvng gas nah vmang vnoeuh shauh dah ngwis cvp das nyhenshang nvng nyah dyimis, nyang wuot das zis cha ma nyet lo shoq yoeus tyamp.

⁷Nvng nyungdaus bang lyis shuk jeis dyei das zis ngoek; yuot bang lyis tsoh das zis ngoek.

⁸Nvng maunyeis dvkoeuq gonh yoeus das xiklyis nah yomsoq yahge nvng yoh dah vkhom vkeq yhung.

⁹Nvng chauhmuh jens lyis pangh das zis ngoek zis kyingh ma nghuot, chauhlo jens lyis eq thyoq zo las ma gis khyvlyis kuot.

¹⁰Housoeh las gvshih nah yvmlhaink yah twih khyoq toh las, nvng nyetlos nyettant gyuk los zis xauh.

¹¹Houka soeng soeng noq los las nvng ma yoh nyvng, jeisphauq gas nvng lyis nghop tyamp.

¹²Kyi ka tsain nyhang joq laus eq Mangso ka nyhang thank maukhung mha nyeis las, kyi lhyi tsain yoeuh khyoq kat ma nghuot lhyeh?

¹³Nvng nyei zis gas, Mangso cha seq? Nyang lyis jyommauh yah gos toh las nyang yang lyis soe khasoeh yoh tuon?

¹⁴Nyang mauyvm khomh mas suh loh zis yah dvyhangteh, hau jyommauh thoeu yah nyang ma nyvng shoq yoh gos toh ge namoq nghamh, ge.

¹⁵Nvng ma gis dah bang vjangh chank dah cho mha suh das oen nghamh thyet lhyeh?

¹⁶Nyamoq gas shishenh yangh ma jweh shih lyis, nyamoq gas jeisphauq yah yhen lhyi khyuot loh teh khyuot loh zis tsain xauh.

¹⁷Haih bang gas Mangso lhyi peq tyamp las nyang nyamoq lyis cha ma yoh kuot ge lomsjingh bang nghuot.

¹⁸Nghuot laus eq nyamoq lyis nyeisgis nhang soeu ka Mangso nghuot. Ngos lhung bang dah nghamh cho lhyi ngoek.

¹⁹Dius gis jens hauh lhung bang joeng zis xauh yvlyis nyvng lyis nyamoq gaus las tswi ma bos bang yis nyeis.

²⁰Lhung bang sain zis dvnganh gas dyoqbis tyamp. Nyet shih zis dvnganh gas nyi yah ngeh tyamp.

²¹Yoba eh, Gvshih Mangso yah nyenstap cho kuot aq. Nyang lyis jeswus lyis teh kuot cho no aq, nvng housoeh kuot lyis nyang nvng lyis shvmanh dyei das.

²²Nyang dyei dah jyauh cho lhom yoeus las, nyah dang nah nhaiqlom mas kat toh aq.

²³Nghuot goeus, nvng Mangso jyank tauh los chah. Housoeh lyis nah yhen mha bweh dah ma gis cho dvnganh thank loh das.

²⁴Nah xing lyis doeuh tyamp aq. Nah dah yungh thank xing lhyi jeislo lvng kyuk dah tvpkhyoh mas doeuh tyamp toh aq.

²⁵Yomzains Mangso ka nah xing nghuot bas jungh, nyang gas nah ngwis yung boms toh zis nghuot bas jungh.

²⁶Housoeh nvng gas vjangh Mangso lhyi loms das las nyang gas nvng gauslaus das vpom nghuot yvlyis xo nyvng das.

²⁷Nvng shvmanh dung lyis, nyang gyo dyei das. Nvng nyhen toh zis chank tyink das.

²⁸Nvng kuot zis dvnganh yvmas ung los das, bvng zis gas nah cho mha pank dyei das.

²⁹Mangso ka khwank soeu lhyi khyoq laus eq, ehnyet nyhen mha gyoh soeu lhyi khyuot yoeus.

³⁰Nvng kuot zis dan[8] las nvng tswi ma bos lyis gas nyang nvng lyis khyuot das, ge.