Read Achang YOBA 24 Bible Online

YOBA 24 - Achang bible

YOBA 24

¹Mangso ka nyang lyis phuqsoe bang xiklyis lyi jus buisnyeis, soetuon das buisnyeis chamus ma toh lah?

²Dius jens gas maunyeis nyo nyo yoh das xiklyis khyamkyoh zains cheh, nyamoq yvng khauh las nyamoq nyang dah yvng khom mas kat.

³Nyamoq chauhlo jens yah sen dah mauhlyihzoe yoeus; chauhmuh dah noeu lyis nyah jyen dye cap shoq yoeus toh.

⁴Nyamoq gas shohjyen bang dah toeuh yoh das yvmas gos toh, nyungs bang lyis tsoengh phang tamh nhang.

⁵Housoeh las shohjyen bang gas mauhlyihzoe lamh teh kyuk dah mhanhdyvp mas zonoms xo laus eq nyamoq lo jens xiklyis zonoms khalhye eq ma xauh xo.

⁶Nyamoq gas nyamoq ma sain dah yos mas jyo yhomh chah.[9] Lhung bang dah zvbiq khyam mha zvbiq shih thyoq dyei chah.

⁷Nyenh lyis nyamoq phomh yhet das zis cha ma yoh. Ngamh lyis cha ma wuot.

⁸Nyamoq boms mas wus dah mau yah jyweq. Nyamoq gas khaugus ma bos yvmvyah luk-uk nvm mas tsain nyeis.

⁹Ma gis bang gas chauhlo lonoeuh jens lyis nauh shuk nyeis masyah yoeus las jons tsain kuot. Shohjyen bang dah loshang jens lyis eq nyamoq dah jyen xiklyis tank toh nhang.

¹⁰Nghuot laus eq shohjyen bang gas nyamoq lyis gos das dyimis ma bos suh yenh chah. Sunghso yhomh uhlyis eq yuot zis yah loh chah.

¹¹Nyamoq gas tsanlun coeu nyhet, zvbiq jeis nyhet laus eq nyamoq shet nyeis.

¹²Wus mas dvmdap bang yahge shei loh nyeis bang kaiq nyeis. Nghuot laus eq Mangso ka nyamoq shvmanh dung yvlyis ma gyo dyei.

¹³Houmha bvng zis lyis peq bang bos, nyamoq bvng cho lhyi ma seqgyo, nghuot ya hauh bvng zis choshe yvcho ma loh.

¹⁴Dius sat soeu ka nyoq nyvng lyis toq las shohjyen bang, nyungs bang lyis loh sat, nyenh lyis gas khauh.

¹⁵Nyi shuot soeu ka mauchuot das zis langh nyeis, nyang lyis hank ma yoh nyvng das xiklyis nyah nyoqnho nghop toh.

¹⁶Khauh bang gas nyenh lyis yhen mha tsain thyoq wvng, nghuot laus eq nyeih lyis gas bvng yvlyis jhank las tamh joq.

¹⁷Nyamoq gas nyeih lyis dah bvng yvlyis gyuk. Nghuot laus eq chuot zis gas nyamoq xiklyis gyukphoh ma nghuot.

¹⁸Lhung bang gas jeisphauq yah shenh loh zis xauh. Nyamoq sain dah maunyeis lyis eq Mangso nhoengh toh. Nyamoq gas nyamoq dah zvbiq khyam mha muh ma loh zwi lo.

¹⁹Gyu gas gywes yvmas dyuk las kyuk loh teh, yaunos kuot bang gas dwis nyeis mau masyah dyuk loh das.

²⁰Gvshih nyamoq dah ungwes moq yangh nyamoq lyis ma soh lo. Nyamoq lyis luk yah zo tyamp las lains dah saiqzains teh dyoqbis tyamp das.

²¹Housoeh bweh zis gas, chauhmuh jens lyis ma gis khyvlyis kuot, dyei thonh jens lyis nhaiq ma bos cho chixoeuq yvmvyah nghuot.

²²Mangso ka nyah yom yah yomzains bos bang lyis mhont tyamp. Mangso kuot lyis lhung bang shei loh.

²³Mangso ka nyamoq lyis jesluiq shohluiq nyeis nhang mvbeh, nghuot laus eq nyang nyamoq lyis nyoqjeih ma shen yoeuh nyeis.

²⁴Lhung bang gas dvsoq nyeisgis nyeis. Nghuot laus eq nyamoq nyoq teh, yet toh dah jyo zains teh nyhauh loh.

²⁵Haih zis ma jus lyis, ngos shuot oen hank yoh kyink? Ngah dang phauh ma dap ge hank yoh chixoeuq, ge.