Read Achang YOBA 28 Bible Online

YOBA 28 - Achang bible

YOBA 28

¹Ngwis dwang tsain bos. Xing shonh dah joqyos tsain bos.

²Dius jens thyeq lyis nyeisjvng khau masyah doeu yoeus. Luk masyah thunk shauq yoeus.

³Luk dwang xo bang gas nyitoengh tuonh las noq thank chuot yvmas xo. Nyamoq gas nyeisjvng dah noq cho lhyi tsain xo lha soeng soeng noq yvmas luk tsain doeu.

⁴Dius nyeis masyah we yvmas, nghuot ya dius khyei ma loh ku yvmas, nyeis khau dwang tsain kyungh. Nyamoq nyang kyingh houmha muh tsain zwi. Nyamoq dwang mas twih lhangh khyoq las lang toh.

⁵Nyeisjvng thoq mas zonoms jyo yuk. Nghuot laus eq hauh dvyhangteh nyeisjvng khau mha ka dvnganh gwi las nyi ngeh tyamp teh vdyis vmons mus.

⁶Hauh nyeisjvng mas dah luk gas nila eq bos, hauh tsoh mas xing bos.

⁷Hau luk dwang cho lhyi wuq dvng zons ma nyvng, zonsmuh eq ma nyvng.

⁸Khangkhyi, nghuot ya gohtoeu gyukphoh yewus hau hank ma loh cho chank khanhamp eq ma suh.

⁹Luk dwang xo bang gas than thank luk-uk lyis tsain doeu, boms khyei lhyi doeu tyamp.

¹⁰Nyamoq luk-uk chank khyoh bangh loh zis yah dvyhangteh, nyamoq phauhdap luk tsain xo nyvng.

¹¹Nyamoq jeislvng jeis jyungh mas tsain doeu las houmha nghop shung toh vyhang lhyi bvng yvmas thuq los nhang.

¹²Nghuot laus eq joeui lhyi khamha yoh xo nyvng das? Seqgyo das zis yang khamha yoh xuq das?

¹³Joeui ka seq shei bang mas xo ma nyvng das. Hauh dah jyoeng phauhdap yvlyis hank ma seq.

¹⁴Noq dah nvmukdra yahge thomh taiq lyis, houmha joeui ma xo nyvng, ge.

¹⁵Hauh yvlyis ngwis nghuot ya xing yah ma yoh wis.

¹⁶Xing gyingh yahge phauhdap luk yah nyah phauhdap zis ma yoh yih goh.

¹⁷Houka xing thoq lyis phauh, xing khuq yahge pat kom gyingh thoq lyis phauh.

¹⁸Joeui ka tanda, pvt nghuot ya pvtvmya thoq lyis zes phauh.

¹⁹Gis thank utapvya yahge xing gyingh yah hau joeui phauh cho ma yoh byi.

²⁰Housoeh lyis joeui vpom khamha nghuot? Yang seqgyo cho khamha yoh xuq das?

²¹Dwis ya dwis bang hank eq hauh yvlyis ma yoh nyvng. Dang dah nghoq yangh ma nyvng.

²²Shei bang yahge dyoqbis cho yangh, Ngamoq dang lamh kyingh dvxauhgyo, ge rhen.

²³Mangso kyingh hauh cho dvseq, nyang joeui khalhye xo nyvng joqyos seq.

²⁴Khasoeh ge lyis nyang nyeisjvng vthang lhyi nyvng, maukhung o mha joq ya joq yvlyis nyvng.

²⁵Mangso ka lyeis lyis nyah yomsoq dyei las jyommauh masyah mau wus nhang.

²⁶Mangso mau khamha wus das zis yahge, maujau jau loh das cho thyet toh uhlyis,

²⁷Mangso ka joeui lhyi yoeuh las hauh phauhdap yvlyis thyet. Nyang joeui lhyi toeutsung lha hauh yvlyis shi yoeuh.

²⁸Mangso ka yang dius jens lyis taiq, Yhensain lhyi gyukwoms zis gas joeui nghuot; ma gis cho lhyi jhank zis gas seqgyo cho nghuot, ge.