Read Achang YOBA 29 Bible Online

YOBA 29 - Achang bible

YOBA 29

¹Yoba doms taiq xi zis gas,

²Mangso ngos lyis zungh dyei nyeis yoq lyis teh ngah kang dwis cho dvlhain doms yoh phoh ya.

³Hauh uhlyis Mangso ngos yah vjangh nyeis las ngos mauchuotdwang mas suh lai loh lyis bvng zis pank dyei.

⁴Houka ngos nyeisgis buisnyeis lyis Mangso dah buisnoms kuot cho yah ngah yhen lhyi gomh dyei.

⁵Yomzains Mangso ngos yah dvgeh nghuot uhlyis ngah lo jens dvnganh ngah vyvm vwi mas tsain nyeis.

⁶Ngah noeu yahge shvbeq jens nauh nyoshoq dyei las ma thoq shuk lo shoq dvkhauyah dyingh loh. Ngah tsanlun coeu eq jeis soeh yaus nyeis.

⁷Ngos wus logis jens yah xauhgoh khanghmuh ngos nyamoq mas tsung joqyos yoeus lyis,

⁸loyvm jens ngos lyis nyvng yah dvyih nyamoq jhank dyei, lokhoq jens eq ngos lyis phauh nyang cho chixoeuq khyvlyis toq yap.

⁹dius jens dah uhshe bang dang ma taiq lo;

¹⁰yhaugyen thank bang yangh samlo nyeis.

¹¹Ngos lyis nyvng soeu, nghuot ya ngah cho xauhgyo soeu khanghmuh ngos kuot goeus zis gis cho taiq.

¹²Shohjyen bang ngaus lyis ngos nyamoq lyis pangh. Pangh soeu ma bos dah chauhlo jens lyis pangh.

¹³Nhaiqngis nyoq yaus bang ngos lyis chungh. Ngos chauhmuh jens dah sam cho bos xo dyei.

¹⁴Ngos dan cho lhyi dyi teh wuot las, lyi jus cho lhyi uhthop soeh thop toh.

¹⁵Ngos gas nyoqjet bang dah nyoq, khyei gyau bang dah khyei duot.

¹⁶Ngos gas nyungs bang dah uwus teh, ngos lyis ma seq bang dah yau cho mha bos yoeuh dyei.

¹⁷Ngos, lhoeng bang dah yomsoq lyis mhont tyamp las nyamoq dah loqbat zokho [10]lhyi khyuot kat.

¹⁸Ngos vjangh nghamhloms zis gas, kang xing shoq nyeis las yhen mha nyens nyens shei das cho nghuot.

¹⁹Ngos gas, vnyet mas vjangh jeis yoh las, nyah vko eq jyweh yah jyweq dah saiqzains teh nghuot.

²⁰Yuk khanghmuh ngos lyis vjangh chungh. Ngos vjangh yombos.

²¹Ngos joeui dyei lyis dius jens samlo nyeis las ngos taiq yvlyis vlhomuh kamp gyo.

²²Ngos dye taiq lyis nyamoq cha ma lhungh; ngah dang gas nyamoq mas mau zoq teh wvng loh.

²³Yos zwi bang gas zvn wvng zoh lyis mau lhom teh, nyamoq yuk khanghmuh lhom yoeus.

²⁴Nyamoq nghamhnywe cho dyuk loh lyis ngos nyamoq lyis ching xoeuq. Ngos gaus dah nyoqnho ka nyamoq lyis yomdyei jus.

²⁵Ngos nyamoq lyis zwi las nghamh thyet cho kuot. Hwankti ka nyah jesphung lhyi shwih teh ngos nyamoq lyis choshe. Nyamoq yomgyau yvmas nhaiqtaink dyei.