Read Achang YOBA 3 Bible Online

YOBA 3 - Achang bible

YOBA 3

¹Thang thank lyis Yoba taiq xi lha nyang khoeu buisnyeis lyis nhoengh.

²Yoba taiq, Mangso eh, ngos khoeu los dah buisnyeis lyis nhoengh aq; ngos lyis gungs mas chi los dah nyens lyis nhoengh aq.

⁴Mangso eh, hauh nyeih gas chuot yvpheh thaiq kat dyei aq. Hauh nyeih lyis khanhamp eq vdoms soh nhang lo. Hauh yvmas bvng zis khanhamp eq vdoms pank dyei nhang lo.

⁵Hauh buisnyeis lyis chuot zis yah kyuk tant bas jungh, hauh yvlyis jyommauh nhoenk las buis lyis chuot zis yah nghop bas jungh.

⁶Zvn mas hauh nyens thyuk tyamp bas jungh; khanhamp eq ma doms suon lo bas jungh.

⁷Hauh nyens gas tsingtsam nghuot bas jungh; gauslaus thwe houmha ma bos bas jungh.

⁸Kuh dah mvnjung lyis khasoeh joeu das zis seq dah mandan muot bang lyis hauh nyeih lyis nhoengh aq oen taiq geh.

⁹Buhnyhiq ma bvng bas jungh, hauh nyens lyis mau buh das zis nghamhloms cho vdyei.

¹⁰Hauh nyens gas ngos lyis khoeu los nhang lha yau cho yahge kuk cho phant thuq kat gvng mas nhoengh aq.

¹¹Ngos ngah ungwes ung mha shei ya! Nghuot ya khoeu los uhlyis shei ya.

¹²Ngah ungwes ngos lyis chamus sainhkhonh mas po? Nyang Chamus nauh gvmshuk?

¹³Ngos shei ya gvshih ngos samlo joq das.

¹⁴Houka xikpheh dah hwankti yhen jens lyis soq tsuk bang hwankti jens yahge guon bang yhet joq teh nghuot.

¹⁵Housoeh ngos gas nyamoq yhen lhyi ngwis xing yah tyink dah zaulo jens teh yhet joq das.

¹⁶Nghuot ya shei zis khoeu los dah lo nyhop teh nghuot.

¹⁷Lop mas gas lhung bang nyamoq dah ma gis cho no toh joqyos, nyungdaus dah muh zwi bang noyos xo nyvng joqyos nghuot.

¹⁸Houmha thung lungh bang yangh nyens nyens tap tap xauh nyeis, kaiq las vmingh than than dyei masyah luiq.

¹⁹Houmha nyings hoeuh bang ma hoeuh bang yuk khanghmuh nyeis; jons jens thang thank luiq goeus.

²⁰Dius jens lyis chamus Shanghsenh yvmas loh nyeis nhang. Nhaiqkuk yvmas nyeis bang lyis chamus pank dyei?

²¹Nyamoq shei mes laus eq ma shei. Zisyos thoq lyis lop lyis zes o.

²²Nyamoq gas shei lha ma nyhop dvchank ma pyo.

²³Mangso ka nyamoq cha bweh los das cho lhyi shung toh. Nyamoq lyis shot khanghmuh mas gos toh.

²⁴Ngos wom zo das gungsthaiq kuk nyeis; ngos noskyingh cho khanhamp eq ma yoh no.

²⁵Ngos gyuk cho yahge dvn cho dvnganh ngah jyank mas jweh los.

²⁶Ngos mas nyenstap zis ma bos, ma nyens, yau cho kyingh dvbos, ge.