Read Achang YOBA 30 Bible Online

YOBA 30 - Achang bible

YOBA 30

¹Nghuot laus eq gvshih gas dius caiq ngis bang ngos lyis jwangh; nyamoq dah uwus moq gas vjangh yah chah phauh ma dap las ngos nyamoq lyis ngah yvng zungh khuih jens lyis ma mes pangh nhang.

²Nyamoq yomguons goeus, yom nyo nhuk las ngah xiklyis chah muh ma yoh zwi lo.

³Nyamoq gas shoh jyen lha yuot zis yah saiq nyet kyuk lyis pau zo. Nyamoq gas nyenh lyis dius ma nyeis dah mhanhdyvp mas suh whang yenh.

⁴Nyamoq gas mhanhdyvp mas dah vzains lyis khuot las tsain zo. Whitau ma bos dah ratam zains vnyet lyis yangh tsain zo.

⁵Yuk khanghmuh gas nyamoq lyis khauh soeu lhyi kaiq teh kaiq las tsain khat tyamp.

⁶Nyamoq gas luk-uk mas, luk tyoq yvm mas tsoh dwang doeu las tsain lungh chah.

⁷Nyamoq mhanhdyvp mas gaunyhauq teh oeu lha mhanhgyomh khyei mha dvgeh duon jyenh nyeis.

⁸Nyamoq gas phauh ma dap, nyings ma yoh bang nghuot. Nyamoq gas hauh mau masyah khat thuq zis tsain xauh.

⁹Gvshih nyamoq dah lo jens ngos lyis los yis. Ngos gas nyamoq dah jwangh gus duot.

¹⁰Nyamoq ngos lyis choqh las we mas nyeis. Ngah nyoqnho mha svkanh yangh dyeh gyon.

¹¹Mangso ka ngos lyis yomnhuk las shohjyen nhang yvmvyah nyamoq nhaiqgis yo zis yah ngos yah tsain tyi loh.

¹²Nyamoq gas zau ma guon moqphung teh ngos lyis tsain zan. Ngah khyei mha twih tsain khyoq. Nyamoq ngos lyis zan das zis tsain sont.

¹³Nyamoq ngos lyis mhont. Ngos lyis mhont das zis nyamoq lyis hank ma tomp.[11]

¹⁴Nyamoq ngos lyis wusciank thyoq khyoq teh zan.

¹⁵Gyukphoh zis yah ngos lyis ung tyamp las ngah shop shop cho uklyeis teh dyuk loh goeus. Ngah ung cho ka jyommauh soeh bi tyamp.

¹⁶Gvshih ngos shei bah ge goeus, ngos xauh kham zo zis gas sunghhuq das cho ma bos lo.

¹⁷Nyenh lyis ngah shohyau khih; hauh nos gas ma lyen lo khih nyeis.

¹⁸Mangso ka ngos lyis ngah dyigop masyah nyhik las dyi vzwvng ma bos lo shoq lhyent.

¹⁹Nyang ngos lyis thomhbop mas doeuh kat; ngos gas tsoh teh bweh loh.

²⁰Mangso eh, ngos nvng lyis lui laus eq nvng khanhamp eq ma toeuh; ngos shvmanh dung lyis nvng ma gyo dyei.

²¹Nvng ngos lyis nhaiq ma nyen lo kuot. Nah yomsoq dvnganh yah ngos lyis shoeuhshih.

²²Nvng ngos lyis lyeis mas muot dang loh nhang. Nvng ngos lyis Lyeismuh jyang mha toqh kat.

²³Nvng ngos lyis hau yuk khanghmuh xiklyis yung toh uhpui loqkyoq shei das yvmas shwih loh nyeis zis ngos seq.

²⁴Cha ma yoh kuot lo dvdung zo; dyoqbis loh nyeis soeu lhyi nvng chamus thyoq?[12]

²⁵Ngos yau cho bos bang yah dvgeh ngaus ku ma nghuot lhyeh? Nyungs bang xiklyis nhaiqnyen ku ma nghuot lhyeh?

²⁶Ngos pyo cho yahge bvng zis lyis nghamhloms, nghuot laus eq hauh gungsthaiq yau cho yahge chuot cho dvthuq los.

²⁷Chiq cho yahge nos zis gas ngos lyis lang chingh loh. Dvnyeih thang lhyi dvnyeih xauh kham zo nyeis.

²⁸Ngos buis tso zis ma bos dah kuk cho mha loh; ngos moqphung mha toq yap las pangh das xiklyis dung.

²⁹Ngos kuk las nhaiq ngis ngaus thwe ka ye khuih ngaus, nghuot ya gola-u nghoq dah nyings thwe teh nghuot.

³⁰Ngah shoh noq los, ngos gungs ngeh las nos nyeis.

³¹Xikpheh ngos gauslaus turiya xauhgyo joqyos, gvshih kuk las ngaus thwe dvxauhgyo lo.