Read Achang YOBA 31 Bible Online

YOBA 31 - Achang bible

YOBA 31

¹Ngos nyetnau zis yah vmesbih lyis khanhamp eq ma yoeuh das oen dangthoengh toh goeus.

²Yomzains Mangso ka yang lyis cha kuot das? Cangsoeu kuot yvlyis nyang khasoeh tauh dyei?

³Nyang gas ma jus zis kuot bang jyank mas dyoqbis zainsmuh yahge thyoqpi cho nhang.

⁴Mangso ka ngos cha kuot zis dvnganh seq; nyang ngah beszoh khanghmuh lyis nyvng.

⁵Ngos lhung khyvlyis khanhamp eq ma kuot, gohyuk lyis khanhamp eq ma mhuih oen maukhi.

⁶Mangso ngos lyis jus dah jvng mas laiq yoeuh bas jungh, housoeh lyis ngos tswi khasoeh ma bos zis nyvng das.

⁷Ngos jus cho masyah tauh loh, nghuot ya ngvnyang ma gis cho lhyi twih nhang lha ngah loq yaunos mas lhoeuh lyis,

⁸ngah jyo yonh loh bas jungh, nghuot ya ngos xoh yvlyis toh dah zonoms gohyuk zo bas jungh.

⁹Ngos, ngah yhenkyoh dah yhensain nyhiq lyis twih las nyah khomh nghe pheh tamh langh nghuot lyis gas,

¹⁰Ngah yhensain nyhiq gas gohtoeu yukgis dah wom jyauq dyei bas jungh, gohtoeu yukgis dah yhetyos mas yhet bas jungh.

¹¹Housoeh teh lhung cho ka shei cho yah soetuon chah.

¹²Houka dyoqbis nhang dah munyi thomh nyi teh nghuot las ngos yoh zis dvnganh ngeh jom tyamp.

¹³Ngah jyeidwis dvyuk yuk ngos lyis tyi lha lop lyis, ngos nyamoq lyis gyo dyei las lyi bos khyvlyis kuot dyei.

¹⁴Ngos ma kuot lyis gas Mangso yah khasoeh yoeuh goh das lah? Mangso ngos lyis soe los tuon lhyi ngos cha yoh taiq das lah?

¹⁵Ngos lyis gvnkhanh toh dah Mangso ka ngah jyeidwis lyis eq dvyhangteh gvnkhanh toh.

¹⁶Ngos nyungs bang lyis pangh das zis khanhamp eq ma ngoek; ngos chauhmuh jens lyis nhaiqlom ma thank nhang.

¹⁷nghuot ya ngos zo uhlyis chauhlo jens lyis yuot zis yah loh nhang lhyeh?

¹⁸Ngos ngah dvcaiq gonh nyamoq lyis loqzamh zwi los.[13]

¹⁹Dyimis wis das zis nyo nyungs las chah nyeis bang dvyuk yuk lyis nyvng lyis

²⁰ngvnyang yvng phung mhayah thuq dah yvng mauh yah kuot dah sauh dyimis nyang lyis dyei. Housoeh nyang ngos lyis nyah ehnyet dvnganh yah chungh das.

²¹Soetuon jang mas ngos yoh ung das zis seq las chauhlo lyis mhuih lyis,

²²ngah loqyom gyau bas jungh, hauh zis ngah kvtoq masyah gyau bas jungh.

²³Ngos Mangso joeng cho lhyi gyuk yvmvyah hauh cho lhyi khanhamp eq ma kuot.

²⁴Ngos dis cho lhyi khanhamp eq ma loms;

²⁵nghuot ya ngos yohkhuiq cho mha khanhamp eq ma khwank.

²⁶Buis yahge nyah dah bvng yvmas, nghuot ya lhamhmuh yahge nyah dah yungh cho mha khanhamp eq ma paiq.

²⁷Nyamoq lyis phauh nyang yvmas ngah loq lyis bvlot tanh zis yah nyamoq lyis nyoqnho ngelang dyei khyvlyis ma shwih whang loh nhang.

²⁸Housoeh teh yaunos gas shei cho yah joeng chah. Houka Yomzains Mangso lhyi peq tyamp zis nghuot.

²⁹Ngah jeswus kham zo zis xauh lyis ngos khanhamp eq ma gaus. Nghuot ya nyamoq dyoqbis zainsmuh xauh lyis ngos nhaiq ma doeus.

³⁰Ngos nyamoq shei das xiklyis nhoengh zis yah yaunos khanhamp eq ma kuot.

³¹Ngos boenghwus lyis vjangh lhom zes cho ngah yhen mha nyeis bang dvnganh seq.

³²Ngos gyung suh bang lyis ngah yhen khau mha khi hwank. Nyamoq lyis khanhamp eq wus talhoeu mha ma yhet nhang.

³³Gohyuk gas nyamoq dah yaunos lyis shung toh laus eq ngos ngah yaunos lyis khanhamp eq ma nghop toh.

³⁴Ngos dius jens cha taiq das zis khanhamp eq ma gyuk, nyamoq jwangh nyhap das zis gyuk yvmvyah khanhamp eq samlo ma nyeis nghuot ya yhen khau mha ma lungh.

³⁵Ngos cha taiq nyeis zis hank ma gyo das lah? Dang khonh khanghmuh jyoeng oen, ngos maukhi. Yomzains Mangso ngos lyis phuk taiq bas jungh. Ngos lyis tyi lha loqyom tyonh soeu she los dah tsuk cho lhaih toh lyis ngos yoh nyvng das.

³⁶Jyoengh, ngos hauh yvlyis ngah kvtoq mas wuot toh das, uhloms mas buismuk soeh tsungh toh das.

³⁷Ngos Mangso lhyi ngos kuot goeus zis dvnganh taiq kyoh las ngos nyah xikkhonh mas nghank das.

³⁸Ngos gas, ngos zwi zo dah maunyeis lyis khauh, yos sain gyingh jyank masyah tsain yoeus,

³⁹ngos houmha yuk dah zonoms zo laus eq hau yos zwi bang lyis gas yuot nhang lhyi ka,

⁴⁰sunghso gungsthaiq zoeuzains, bali gungsthaiq nyoq yuk bas jungh, ge. Yoba dah dang thank goeus.