Read Achang YOBA 32 Bible Online

YOBA 32 - Achang bible

YOBA 32

¹Yoba gas nyang tswi ma bos cho nhaiqshoq shoq taiq nyeis yvmvyah, nyamoq somh yuk nyang lyis cha ma phuk taiq lo.

²Nghuot laus eq houmha ma bos dah Elihu ge soeu ma yoh jhen lo. Khasoeh ge lyis Yoba gas nyah gungs lyis nyang dan ge Mangso lhyi yobos huon nyeis. (Elihu ka Ram vhuh yah sen dah Buz vnyau vshih Barakel dah lo nghuot.)

³Nyang Yoba dah dyenschangh somh yuk lyis eq nhaiqyo. Nyamoq Yoba lyis khasoeh phuk das cho xo ma nyvng, hauh zis gas Mangso ka shuot ge cho kuot thuq kat.

⁴Houmha Elihu ka ngis thank soeu nghuot yvmvyah nyang gas yuk khanghmuh dang dye taiq shoq langh chah.

⁵Elihu ka, nyamoq somh yuk Yoba dah dang lyis ma yoh phuk cho nyvng lyis nhaiqyo.

⁶Barakel lo Elihu ngos gas nyenhkyi ngis las namoq gas kuh goeus; Housoeh las ngos cha nghamh yvlyis taiq das zis gyuk.

⁷Ngvnyang taiq zo zis gas, namoq taiq chah, nyenhkyi kuh bang namoq dah joeui gvm chah.

⁸Nghuot laus eq heika Yomzains Mangso dah Dyos ngamoq jyank mas joeui los dyei.

⁹Nyenhkyi bos bang kyingh joeui bos zis ma nghuot. Logis jens kyingh khah zis jus yvlyis seq zis ma nghuot.

¹⁰Housoeh las gvshih ngos namoq lyis ngah dang gyo nhang mes. Ngos seq zis namoq lyis taiq bah.

¹¹Ngos namoq taiq nyeis uhlyis ehnyet xing xing gyo goeus. Namoq joeui xo cho taiq goh nyeis uhlyis eq langh goeus.

¹²Ngos vlhomuh gyo lyis namoq somh zis xauhgyo. Yoba taiq lyis nyang lyis namoq yobos hank ma yoh tuonh xoeuq.

¹³Namoq joeui xo nyvng goeus, oen khasoeh yoh sang? Namoq somh goeus yvmvyah Yoba lyis Mangso phuk taiq chah.

¹⁴Yoba gas ngos lyis ma taiq, namoq lyis dvtaiq nyeis. Nghuot laus eq ngos gas namoq phuk teh khanhamp eq ma phuk das.

¹⁵Yoba eh, nyamoq dang ma yoh lo; nyamoq nvng lyis phuk das dang ma yoh.

¹⁶Nyamoq samlo nyeis lyis ngos eq langh nyeis shih das lah? Nyamoq houmha cha ma daq taiq lo dvtsain yap joq.

¹⁷Ngos gvshih ngvnyang phuk dang dyei bah, ngos cha nghamh zis namoq lyis taiq bah.

¹⁸Ngos dang taiq das zis ma yoh langh nyeis lo. Ngah dang lyis ma yoh zwi toh lo.

¹⁹Ngos dang taiq das toeuh ma yoh lyis gas, ngos gas zvbiq saiq dyingh dah shohyeis thung teh buk loh das.

²⁰Ngos ma yoh nyeis lo, ngos dang taiq chah.

²¹Ngos hai taiqgoh yvmas hank shot pheh eq ma dap, ngos hank lyis eq ma mhuih chungh das.

²²Ngos gas khasoeh mhuih chungh das zis ma seq, ngos housoeh kuot lyis gas Mangso ngos lyis lvnyap joeng das.