Read Achang YOBA 33 Bible Online

YOBA 33 - Achang bible

YOBA 33

¹Yoba eh, gvshih ngos taiq chah dang dvnganh vlhomuh gyo yoeus aq.

²Ngos ngah uhnuk mas bos zis taiq das xiklyis cicont nghuot.

³Ngah dang dvnganh gas shang shang nghuot, ngos jyoeng zis taiq nyeis.

⁴Mangso dah Dyos gas ngos lyis gvnkhanh las ngos lyis kang dyei.

⁵Nvng yoh phuk lyis phuk aq; nah dang sont las ngah xik mas yap aq.

⁶Mangso nyoqlvtjvng mas ngos yahge nvng gas dvyhangteh nghuot: yah aiq yuk gonh gas tsoh yah zwvng toh.

⁷Housoeh las nvng ngos lyis gyuk chank ma bos. Ngos nvng lyis ma nos nhang das.

⁸Gvshih haih zis gas nvng taiq yvlyis ngos xauhgyo zis nghuot.

⁹Ngos yobos ma bos; ngos cha ma cu, ngos tswi ma bos, yaunos ma dap.

¹⁰Nghuot laus eq Mangso ka ngos lyis zan das xiklyis jyamp gus xo, ngos lyis jes teh kuot.

¹¹Nyang ngah khyei lhyi kyomh kyomh las ngos loh khanghmuh zungh yoeuh nyeis, ge.

¹²Nghuot laus eq Yoba eh, ngos nvng lyis taiq bah, nvng shuot, Mangso ka dius thoq lyis zes kuhxing.

¹³Nvng ngamoq lop dang lyis khanhamp eq ma phuk dah Mangso lhyi chamus kauq?

¹⁴Mangso ka doms taiq doms taiq laus eq nyang cha taiq yvlyis hank eq ma gyo dyei.

¹⁵Nyenh lyis dius jens yhet lyis Mangso ka yhetmoq yahge nyoqnyvng masyah jis.

¹⁶Mangso ka nyamoq lyis nyang cha taiq zis gyo nhang lha nyamoq gas nyang zaih nhang yvlyis dvn.

¹⁷Mangso ka nyamoq lyis yaunos ma kuot lo das xiklyis taiq las nyamoq lyis khwank cho masyah khyuot yoeus.

¹⁸Nyang nyamoq lyis ma dyoqbis nhang das. Nyang nyamoq lyis nyang pheh yah shei cho mhayah khyuot yoeus.

¹⁹Mangso ka yang lyis nosthyoh nhang, yah gungsdom mas khih cho dyingh nhang zis yah soq dan.

²⁰Nos bang gas whitau ma bos, gis thank zonoms lyis yangh nhaiq yoeuh nos.

²¹Nyamoq dah gungsshoh dyoqbis loh, nvng nyamoq dah shohyau dvnganh yoh nyvng.

²²Nyamoq gas shei mungkvn pheh loh bah ge.

²³Loeuswons soeu dvyuk nyamoq lyis los pangh mvbeh - Mangso dah loeuswons bang khyoengh mons masyah yah yvwons lyis taiq kyingh das nyhenshang dvyuk los.

²⁴Nhaiqnyen zis yah hau loeuswons taiq das zis gas, Nyamoq lyis kat kat aq, nyamoq shei mau mas ma gyo das. Haih zis gas nyamoq lyis khyuot kat das phauh nghuot, ge.

²⁵Nyamoq dah gungsdom gas wotyamh teh kuh los las yom doms bos das.

²⁶Nyamoq shvmanh dung lyis Mangso toeuh dyei das. Nyamoq Mangso lhyi gauslaus zis yah paiq das; Mangso ka nyamoq xiklyis jus zis doms kuot dyei das.

²⁷Dvyuk dvyuk moqphung mha taiq das zis gas, Ngos yaunos kuot goeus, ngos jus zis ma kuot lo, nghuot laus eq Mangso ngos lyis yobos shauh las dyei.

²⁸Nyang, ngos shei mau pheh loh nyeis masyah, shwih las ngos dwis nyeis shih.

²⁹Mangso ka hai dvnganh lyis doms kuot doms kuot:

³⁰Nyang gas dius dah kang lhyi khyuot yoeus las dvyuk dvyuk lyis gauslaus dah nyeisyap cho dyei.

³¹Yoba eh, gvshih ngos cha taiq nyeis yvlyis gyo aq; samlo nyeis aq, ngos taiq bah.

³²Nghuot laus eq nvng taiq dais bos lyis taiq shih aq ngos gyo bah. Ngos nvng jus yvlyis gaus zis yah rhen das.

³³Taiq dais ma bos lyis gas nvng samlo ngah dang gyo aq; ngos nvng lyis khasoeh joeui bos chah cho jyauh das, ge.