Read Achang YOBA 34 Bible Online

YOBA 34 - Achang bible

YOBA 34

¹Dius jens namoq gas joeui svsoh bos, svsoh yik bang nghuot; gvshih ngos cha taiq yvlyis gyo geh,

³Nvng zonoms lyis chaq yoeuh lyis gis zis seq, nghuot laus eq nvng dang xauhgyo lyis joeui dang nghuot yvlyis ma seq.

⁴Soe nghamh thyet das zis gas yvnyang dvnghuot.

⁵Yoba gas nyang tswi ma bos laus eq, Mangso ka nyang lyis jyoeng jus cho dyei das zis ngoek, ge taiq.

⁶Nyang nyei, Ngos cu oen khasoeh yoh hwah taiq das lah? Ngos dvmdap zis xungh, nghuot laus eq ngos yaunos ma bos, ge.

⁷Nvng haih dius Yoba teh zis dvyuk yuk nyvng ku lhyeh? Nyang Mangso lhyi phauh nyang cho khanhamp eq ma chixoeuq.

⁸Nyang gas ma gis dah dius phung lhyi o, yaunos yoh bang yah dvgeh suh yenh.

⁹Nyang taiq, Houka Mangso dah ehnyet tungh chank das zis gas dius xiklyis vkyuh ma bos, ge.

¹⁰Seqgyo bang eh, ngah dang gyo geh: Yomzains Mangso ka shuot yvlyis kuot das lhyeh!

¹¹Nyang gas dius jens kuot zis yah dvyhangteh phauh shangh. Nyamoq kham vvng zis yah dvyhangteh kuot.

¹²Yomzains Mangso ka ma gis zis ma kuot. Nyang hank lyis eq lyi ma jus zis khanhamp eq ma kuot.

¹³Mangso ka nyah yomsoq lyis dvyuk yuk masyah xauh yoeus lhyeh? Nyang lyis dvyuk yuk yah mungkvn lyis yoeuh nhang toh lhyeh?

¹⁴Mangso ka nyah dyos yahge kang yoeus tyamp das zis yoh nghamh thyet.

¹⁵Dwis nyeis bang yuk khanghmuh gas shei lha tsoh mas doms tauh e das.

¹⁶Nvng joeui bos lyis, gvshih ngah dang gyo aq.

¹⁷Jus cho lhyi hoeng soeu lhyi hank ma yoh guon. Nvng lyi jus cho yahge yomsoq bos dah Mangso lhyi yobos khasoeh yoh huon?

¹⁸Mangso ka hwankti jens lyis, Namoq chah vkyuh ma bos, yhaugyen bang lyis, Namoq ma gis bang nghuot, ge soeu nghuot.

¹⁹Nyang gas guon bang shot ma dap, shohjyen bang yah tyi dah dis bang lyis nyoqnho ma dyei, khasoeh ge lyis nyang yuk khanghmuh lyis gvnkhanh toh.

²⁰Yang nyenh lyis nyetlos nyettant shei mvbeh. Mangso yang lyis batkhyoq las yang dyoqbis loh. Thoeuqzoe lyis yom ma kat noh sat.

²¹Nyang gas yang bes cheh khanghmuh zungh yoeuh nyeis.

²²Yaunos bos soeu Mangso mhayah yoh tamh shoq chuot dah chuot zis ma bos.

²³Mangso ka nyang yang lyis soetuon das xiklyis loh das zis shishenh toeuq toh chah zis ma nghuot.

²⁴Uhshe bang lyis yoeus tyamp las hauh joqyos mas gohyuk lyis kat das zis nyang ma choq yoeuh noh.

²⁵Khasoeh ge lyis nyang nyamoq cha kuot zis seq. Nyenh lyis nyang nyamoq lyis thyoq las thungh thyi tyamp.

²⁶Nyang yaunos dap bang lyis dvnganhmoq yoh nyvng yvmas joeng.

²⁷Khasoeh ge lyis nyamoq nyah thang mha ma chank lo. Nyang tyingtoh dang dvnganh lyis tyamp toh.

²⁸Nyamoq gas nyungs bang lyis Mangso jyank mas tsoengh kaiq nhang lha nyang nyamoq pangh das cho sang zis xauhgyo.

²⁹Mangso cha eq ma kuot das ge nghamh thyet lyis, nyang lyis yobos hank ma yoh huon. Nyang nyah nyoqnho shung lyis yang nyang lyis hank ma nyvng das.

³⁰Houmha dius nyau jens yoh kuot zis cha ma bos. Mangso ma bos dah zaiq bang lyis guon toh nhang shih.

³¹Yoba eh, nvng nah yaunos Mangso lhyi rhen goeus lah? Yaunos ma doms kuot lo oen dangthoengh toh goeus lah?

³²Nvng Mangso lhyi nah yobos chixoeuq dyei aq oen vdung ku lah? Ma gis zis kuot cho no lo das zis xam vxonh lah?

³³Nvng Mangso kuot yvlyis peq goeus ya, nvng o yvlyis kuot dyei das oen vyoh nghamhloms lah? Hau thyet cho ka ngah zis ma nghuot, nah zis dvnghuot. Gvshih nvng khasoeh nghamh zis ngamoq lyis taiq aq.

³⁴Seqgyo cho bos soeu ka jyoengh xamxonh das. Ngah dang xauhgyo dah joeui bos soeu taiq das zis gas,

³⁵Yoba gas seqgyo cho ma bos masyah taiq nyeis. Nyang taiq dang gas chah vjyuk ma bos.

³⁶Yoba gas ma gis soeu teh phuk taiq yvmvyah nyang lyis soetuon jang mas shwih loh.

³⁷Yoba Mangso lhyi jwangh cho ma no, nyang yaunos bos las Mangso yah tyi loh, ge.