Read Achang YOBA 36 Bible Online

YOBA 36 - Achang bible

YOBA 36

¹Ngos Mangso nyhenshang cha taiq yvlyis jhen las dvxa gyo dyei shih aq.

³Ngah seq cho ka lvm; ngos lyis gvnkhanh soeu Mangso ka dan yvlyis chixoeuq das xiklyis ngos seq zis yhung das.

⁴Ngos nvng lyis ma jus zis cha ma taiq. Jyoeng dah joeui bos soeu ka nvng yah nyeis.

⁵Mangso ka kha iq yombos! Nyang hank lyis eq ma hoeng. Nyang ma seqgyo zis cha ma bos.

⁶Nyang gas yaunos wons bang lyis ma nyeis nhang, shohjyen bang lyis vjangh lyi jus zis kuot.

⁷Nyang gas dan bang lyis gomh toh dyei: nyamoq lyis hwankti teh guon das toeuh dyei las vcaiq vto chungh zis xauh nhang.

⁸Nghuot laus eq hauh dan bang gas shamjvng yah twih las nyamoq kuot goeus zis xauh kham lhyi,

⁹Mangso ka nyamoq dah yaunos yahge khwank cho nyamoq lyis tuonhshet.

¹⁰Nyang nyamoq lyis nyang zaih nhang cho gyo las ma gis cho mhayah tauh los das xiklyis kuot.

¹¹Nyamoq Mangso dah domsyos gyo las nyang lyis phuqsoe lhyi, nyenstap zis yah kang dwis las nyeisgis yaplhoq das.

¹²Housoeh ma nghuot lyis gas, nyamoq cha ma seq yvmas shei das, nyamoq jeislo lvng goeu las shei mau pheh loh das.

¹³Mangso ma bos bang gas nhaiqyo nyeis shih. Joeng zis xauh uhlyis yangh nyamoq lyis pangh das cho ma dung.

¹⁴Nyamoq wotyamh ngis shih lyis shei. Xoqphuh dah kang dwis cho yah thank tyamp.

¹⁵Nghuot laus eq Mangso ka dius jens lyis khamzo nhang zis yah jyauh, shanghsenh cho lhyi yhung lha nyamoq lyis seq los nhang, nyvng nhang.

¹⁶Mangso ka nvng yau cho mhayah shwih yoeus las sam yvmas pyo nhang das. Nah kihgus gas zonoms yah boms joq.

¹⁷Nghuot laus eq gvshih nvng gas nvng yah mon yih mon yih khyvlyis joeng zis xauh nyeis.

¹⁸Khauwhot yah nvng lyis ma mhuih bas jungh, nghuot ya dis cho yah nvng lyis ma shwih whang bas jungh zaih nyeis aq.

¹⁹Nah zisyos eq nah yombos cho eq nvng lyis yau cho mhayah ma yoh pangh thuq kat.

²⁰Nyenh jweh los das zis v omes; houka dius nyau jens dyoqbis das shishenh nghuot.

²¹Ma gis cho pheh ma tauh loh das zis zaih geh; nvng xauh khamzo zis gas hou mhayah jhank das xiklyis nhang zis nghuot.

²²Mangso dah yomsoq kha iq kuhxing yvlyis soh aq. Nyang gas dvnganh dah jyauh soeu zainsmuh nghuot.

²³Mangso lhyi cha kuot das oen hank ma yoh taiq kyoh. Nyang lyis ma gis zis kuot oen hank ma yoh kauq.

²⁴Nyang gas nyang kuot goeus dah muhzoh xiklyis vjangh chungh nyeis. Nvng eq nyang lyis chungh chah.

²⁵Nyang kuot goeus cho yuk khanghmuh nyvng, nghuot laus eq yang gas we masyah kyingh dvxauh yoeuh.[14]

²⁶Nyah kuhxing cho lhyi yang dyingh shoq ma yoh seq. Nyah zvn lyis eq ma yoh suon.

²⁷Nyang gas jeis yoeus las mauzoq pheh lhaiq kat Mangso nghuot.

²⁸Nyang jyommauh masyah mau wus nhang, cangsoeu dius dvnganh thoq mas jyweq nhang.

²⁹Jyommauh khasoeh dyos loh cho lhyi hank ma seq, nghuot ya Mangso nyeis dah maukhung mha maujau khasoeh nyings loh zis hank ma seq.

³⁰Nyang maukhung gonh mas maunyoq nyhik kat, nghuot laus eq thomh theh mas gas noq joq.

³¹Heika Mangso dius nyau jens lyis guon cho nghuot. Nyang dius lyis khasoeh tsoh[15] cho nghuot.

³²Nyang nyah loq yah maunyoq lyis nyhik las toeuq toh yvmas thungh das zis vmingh dyei.

³³Maujau jau zis gas lyeisjyang los nyeis ge taiq hoeuh. Houka lyeisjyang los nyeis ge zis noeu jens seq.