Read Achang YOBA 37 Bible Online

YOBA 37 - Achang bible

YOBA 37

¹Hauh lyeisjyang ka ngos lyis sainh guk thungh nhang.

²Namoq dvnganhmoq Mangso dah thwe lhyi gyo geh, nyah nhuot masyah thuq dah maujau lyis gyo geh.

³Nyang hauh maunyoq lyis maukhung gonh nhang kat. Nyeisjvng dvthang mhayah gohtoeu dvthang mha jweh shoq loh.

⁴Hauh thang lhyi nyah thwe nyings zis xauhgyo, maujau thwe shoenkkhyi los las maunyoq nyik bvng loh.

⁵Mangso dah dang khonh gas yang ma yoh seqgyo dah mauhphoh vyhang bweh los.

⁶Nyang gyu lyis nyeisjvng mas gyoh das xiklyis vmingh dyei, mau thunghkyei eq gyoh nhang.

⁷Yah muh lyis eq no toh nhang. Nyang cha yoh kuot cho yang lyis chixoeuq.

⁸Yewus jens gas nyamoq khyung mas wvng nyeis.

⁹Lyeisjyang ka mautyi pheh yah los, ngamh zis gas mautsung pheh yah los.

¹⁰Mangso dah soq yah jeis lyis gyamh nhang lha houka nghantungh thaiq loh.

¹¹Mangso ka jyommauh mas jeis tyink toh. Maunyoq gas jyommauh masyah nyik thuq los.

¹²Hauh zis Mangso dah ehnyet yah dvyhangteh loh las mungkvn gonh joqyos khyiq khanghmuh mas Mangso zaudang khyoq zis dvnganh kuot.

¹³Mangso ka nyeisjvng lyis jyweq nhang das xiklyis mauwus dyei. Hauh zis yang lyis joeng das zis nhang mvbeh. Nghuot ya yang lyis nyang nyoq zons doeus cho chixoeuq mvbeh.

¹⁴Yoba eh, dvxa no las gyo aq; Mangso kuot dah mauhphoh cho lhyi nghamh yoeuh aq.

¹⁵Nvng Mangso vmingh khasoeh dyei zis vseq lah? Jyommauh masyah maunyoq khasoeh nyik nhang zis vseq lah?

¹⁶Nvng maukhung mha jyommauh khasoeh dang zis vseq lah? Mangso dah muhzoh mauhphoh lyes cho muhzoh lyis nvng vseq lah?

¹⁷Ma seq, mautyi lyeis yah nyeisjvng lyis toeu khuk los lyis dyi khau mha gywes zis kyingh dvxauh kham.

¹⁸Mangso maukhung lhyi lhywa lha shonh dah thunk teh goeng shoq kuot uhlyis nvng yoh bos pangh lhyeh?

¹⁹Ngamoq Mangso lhyi khasoeh taiq das zis jyauh aq; ngamoq seq cho ma tham lha cha ma daq taiq.

²⁰Ngos Mangso yah jisgoh das cho ma sang das. Ngos nyang lyis chamus ngos lyis mhont das toeuh dyei das?

²¹Gvshih hau maukhung mha dah bvng zis gas tsoek tsoek tso joq, hauh zis ngamoq xiklyis nyo bvng las ma yoh yoeuh. Lyeis muot zis yah maukhung eq lhyang joq.

²²Mautsung shot pheh xing vwot lyis nyvng, Mangso phunk gas yang lyis gyukphoh zis yah tyink dyei.

²³Mangso dah yomsoq gas svsoh kuhxing lha yang nyah nvm mas ma yoh loh. Nyang yang lyis kuot dyei yvmas nyang gas dan las lyi jus.

²⁴Housoeh las yuk khanghmuh nyang lyis gyuk; nyang gas joeui bos ge taiq bang lyis tyamp toh, ge.