Read Achang YOBA 38 Bible Online

YOBA 38 - Achang bible

YOBA 38

¹Hauh thang lhyi YHENSAIN ka Yoba lyis lyeisjyang mhayah jis.

²Seq cho ma bos, vjyuk ma bos dang yah ngah joeui lhyi nyei soeu nvng hank nghuot?

³Gvshih nvng zungh zungh toq yap las ngos nyei dah nyeidang phuk aq.

⁴Ngos mungkvn lyis kuot uhlyis nvng houmha nyeis lhyeh? Nvng hounyhoq seq lyis hauh zis ngos lyis taiq kyoh aq.

⁵Hauh zis kha iq kuh chah zis hank thyet? Hauh thoq mas mvvs hank lang? Nvng phuk dang dvnganh vseq lah?

⁶Hau nyeisjvng lyis thuk dah zains lyis cha yah tsain toeu toh? Hau nyeih lyis mungkvn dah vthunk luk hank kat toh?

⁷Hauh nyeih maubuh los lyis kyi jens dvgeh chunghthwe kat las, maukhung mha bang gauslaus zis yah tsain kaiq.

⁸Nyeisjvng ung mhayah buiq thuq los dah thomh lyis zwi toh das zis khyam khomh lyis hank tsain nyheih toh?

⁹Thomh lyis jyommauh yah nghop las mauchuotdwang mas koek toh soeu ka ngos nghuot.

¹⁰Ngos thomh xiklyis vkhomp tsain kat las hauh nungsthank pheh khomhkyank kyank toh.

¹¹Ngos thomh lyis taiq goeus, houhweq dvnghuot, ma yoh lai lo. Heimha nah yombos jeisphauq no toh chah.

¹²Yoba eh, nvng nah caiq mas nyoq nyvng los das zis dvnyeih vdoengs ku lah?

¹³Nvng maubuh los yvlyis, nyeisjvng lyis zwi las lhung bang tamh joqyos masyah ko khyoq aq oen vmingh dyei ku lah?

¹⁴Nyeih lyis dah bvng zis gas jing jens langhkhau jens lyis dyimis nap toh teh thuq los nhang. Houka tsohnyhon mha kyihau tap lyis dwvng joq teh nghuot.

¹⁵Nyeih lyis dah bvng zis gas lhung bang xiklyis nyo bvng las thyoq zo muh masyah lang tauh los.

¹⁶Nvng, thomh noq dah jeisthuq dwang mas loh ku lhyeh? Nvmukdra thomh theh mas cha joq zis xo ku lhyeh?

¹⁷Dvyuk yuk nvng lyis Shei mau noq lyis zungh dah khomh chixoeuq ku lhyeh?

¹⁸Nvng mungkvn kha iq kuh zis vseq lah? Nvng seq lyis ngos lyis phuk taiq aq.

¹⁹Bvng zis kha mhayah los, nghuot ya chuot zis dah vpom cha nghuot zis nvng vseq lah?

²⁰Nvng hau aiq ja lyis khahweq loh chah cho vyoh chixoeuq lah? Nghuot ya nyamoq lyis doms tauh nhang kat das cho vyoh chixoeuq lah?

²¹Nvng yoh kuot das oen ngos top seq: khasoeh ge lyis nvng hou iq kuh goeus, mungkvn kuot uhlyis nvng houmha nyeis goeus.

²²Ngos gyu yahge gyutomp toh joqyos mas nvng loh kwang ku lhyeh?

²³Ngos hauh yvlyis yau shishenh, moengdyoq, jeszan buisnyeis xiklyis cicont kuot toh.

²⁴Nvng buis canh los joqyos mas jweh ku lhyeh? Nghuot ya buisthuq lyeis kha mhayah muot los joqyos mas jweh ku lhyeh?

²⁵Mau hank wus nhang? Maujau jau loh das cho hank shang?

²⁶Sihyos mas mau hank wus nhang?

²⁷Jeis ma joq dah mhanh yos mas jeis hank sanh?

²⁸Mau, nghuot ya jyweh gas uwus bos lhyeh?

²⁹Nghan yahge gyutomp dah ungwes gas hank nghuot?

³⁰Hauh zis jeis lyis lukzains teh kuot las thomh thoq mas gyamh joq.

³¹Nvng gas Kyijyon lyis yoh dain toh lhyeh? Shohkhat kyi dah dyichih lyis yoh phui tyamp lhyeh?

³²Nvng kyi lhyi dvyoq thang lhyi dvyoq cho yoh she lhyeh? Woms kyi yahge Womslo kyi lyis cho yoh shet lhyeh?

³³Nvng maukhung lhyi guon dah lyi tsain seq lah? Hauh zis yah nvng nyeisjvng lyis yoh guon nhang lah?

³⁴Nvng lyis mau yah jyweq nhang das xiklyis nvng jyommauh lyis yoh kaiq sang lah?

³⁵Nvng maunyoq nyik das zis tying lhyi, hauh zis nah jyank mas los las, Ngamoq nyeis, ge das lah?

³⁶Nile lvng nhauq los das ge nghoq lyis hank taiq? Nghuot ya Gyoqphoq lyis mauwus das ge hank taiq?

³⁷Jyommauh lyis suon das iq joeui hank bos? Mauwus los shoq hank huot khyoq?

³⁸Hauh mau gas tsohmop lyis thomh bop bweh nhang.

³⁹Nvng khangkhyi zo das zonoms xo lha yuot dah khangkhyi lo jens nhaiqshoq lhyeh?

⁴⁰Nyamoq gas nyamoq dah luk-uk mas tamh joq, nghuot ya nyamoq dah khyung mha lhom nyeis.

⁴¹Kvnhoq jens dang jyon yuot yenh lyis, nyamoq dah lo jens ngos lyis zonoms sang lhyi nyamoq lyis zonoms dyei soeu hank nghuot?