Read Achang YOBA 39 Bible Online

YOBA 39 - Achang bible

YOBA 39

¹Nvng ye beqlo khanhamp sot zis seq lah? Ye cvtlo sot yvlyis zungh yoeuh nyeis lhyeh?

²Nyamoq lodap zis khanyhank nghuot yvlyis seq lhyeh? Nyamoq losot shishenh nvng seq lhyeh?

³Nyamoq khanhamp whop las mungkvn mas lo tsain sot toh das zis nvng seq lhyeh?

⁴Nyamoq lo jens eq mhanhdyvp mas kuh yangh los; nyamoq loh las ma tauh los lo.

⁵Ye mauhlyihzoe jens lyis luiq cho hank dyei? Nyamoq lyis hank phui kat las chwang yenh nhang?

⁶Ngos nyamoq lyis mhanhdyvp gas nyamoq dah yhen khyvlyis dyei toh. Nyamoq lyis coh janggyon mas nyeis nhang.

⁷Nyamoq gas hoeu dah wus masyah we we nyeis, nyamoq lyis mhiq yoeus las muh hank eq ma yoh zwi nhang.

⁸Boms gas nyamoq xo zo dah katjang nghuot las houmha nyamoq nyaus ya nyaus yvlyis tsain xo zo. Dius yah vmingh dyei zis ma xauhgyo nhang.

⁹Noeuphuk gas nah xiklyis muh zwi dyei das lhyeh? Nyang nah zungs mas mes yhet das lhyeh?

¹⁰Noeuphuk lyis twih dvkhvt yah she lha yos yoh phuk nhang lhyeh? Nah nyang zungs nvm mas khont yoh she nhang das lah?

¹¹Nvng nyah yombos yvlyis nges las nyang nah muhchangh lyis kuot dyei das oen yoh nghamhloms lhyeh?

¹²Nyang nah jyo yhomh yvlyis thanjang masyah tsainh yoeus las chi los dyei das oen nghamhloms lah?

¹³Gola-u nghoq dungs phap zis kha iq nyap! Nghuot laus eq khah gola-u nghoq eq nghoq kywank teh ma yoh dang.[16]

¹⁴Gola-u nghoq gas nyah uq lyis tsohmop mas buis yah nywe nhang das xiklyis nyeisjvng mas toh.

¹⁵Nyang gas khyei yah uq lyis zangh nang phuk das, yewus yah lhoq khwih das ge ma chiq.

¹⁶Nyang gas hau uq gas nyah zis nghuot teh ma kuot, nyang yomkat cho ka vkom dvnghuot yvlyis ma sen teh dvkuot.

¹⁷Houka ngos nghuot. Ngos nyang lyis joeui ma dyei, koh nhang.

¹⁸Nghuot laus eq nyang wuih[17] lhyi, nyang yahge nyang ji soeu lhyi yoh yis.

¹⁹Yoba eh, nyang lyis yombos nhang zis yahge nyang mham lhyi xing nhang zis nvng nghuot lhyeh?

²⁰Nvng nyamoq lyis janghgyik teh dyvm nhang lhyeh? Nyamoq nyings thwe yah dius lyis dvn nhang lhyeh?

²¹Nyang jens gas langhkhau mha nyeisjvng lyis nhaiq wvng zis yah dyik; nyamoq yombos nyhoq jeszan yvmas duon loh.

²²Nyamoq gyuk cho ma seq, khah moengsa eq nyamoq lyis ma yoh tauh loh nhang.

²³Nyamoq mas ji bang wons dah kyonhkhyi nhont nyhink, hauh zis buis mas ying ying nghuot.

²⁴Sainh hwangh zis yah nvn las nyang jens xikpheh wuih loh. Lvbuh muot kat lyis nyamoq samlo ma yoh yap.

²⁵Lvbuh muot kat khanghmuh nyamoq nyings. Jeszan yvmas ma ni loh shih, jeszau jens vmingh kaiq dyei zis ma xauhgyo shih lyis nyamoq jes shom xauh nvm.

²⁶Wuq dvng zons gas dungs tyo lha mautyi pheh khasoeh dang loh das zis nah jyank masyah xuq lhyeh?

²⁷Zons gas boms nyhang mha nyah sot sot das zis nah vmingh lyis langh lhyeh?

²⁸Nyang nyah yhen lhyi nyhang thank luktyoq thoq mas kuot toh. Zuk dah luk-tyoq thyoh lyis nyah thoenkgus jesdvp kuot.

²⁹Nyang dvja ja lyis sat las zo das xiklyis hou mhayah ni mas we mas zungh yoeuh nyeis.

³⁰Shei mvng yvmlhaink zons zain los, zons lo jens gas suih tsain shuk, ge.