Read Achang YOBA 4 Bible Online

YOBA 4 - Achang bible

YOBA 4

¹Yoba, Ngos dang taiq lyis nvng lyis vthauqkhyi jus lah? Ngos samlo ma yoh nyeis lo.

³Nvng dius nyoshoq lyis jyauh goeus; yomnhuk las nvn nyeis soeu lyis yombos nhang.

⁴Dvyuk yuk thungh lains, yomnhuk las nyung lyis nah dang gas nyang yoh yap das xiklyis yomdyei.

⁵Gvshih gas yau cho nah jyank jweh las nvng yomgyau. Hauh zis nvng lyis zangh las dvn nyeis.

⁶Nvng Mangso lhyi paiq las nah kang dwis cho ka yobos huon chank ma bos. Housoeh las nah nghamhnywe cho, nghamhloms cho bos chah.

⁷Gvshih doms nghamh aq, ma jus zis ma kuot soeu ka ma shei das. Dan soeu ka khanhamp eq dyoqbis zis ma bos das.

⁸Ngos nyvng zis gas dius jens ma gis cho yosphuk, lhung cho ge dah jyo khyoq; gvshih nyamoq gas lhung cho yahge ma gis cho xauh yhomh yoeus.

⁹Lyeis jyang teh Mangso ka nhaiqyo zis yah nyamoq lyis mhont tyamp.

¹⁰Lhung bang khangkhyi jens teh nyings, laus eq Mangso ka nyamoq lyis sam nhang lha nyamoq dah zwis lyis khyauh tyamp dyei.

¹¹Ngat sat zo das zis cha ma joq dah khangkhyi jens gas shei lha nyamoq dah lo jens dvnganh gas dyos sanh tyamp teh nghuot.

¹²Loeus dvkoeuq samlo los, hauh zis ngah no mas dvtsiq dvxauhgyo.

¹³Ngos yhet joq lyis yhetthyiq thyiq teh ngos lyis los thauqkhyi.

¹⁴Ngos gyuk las dvgungs gonh dwis shoq tyik tyik nvn nyeis.

¹⁵Lyeis jyamh gas ngah nyoqnho mha los tanh las ngos shink nyang gyuk lyis ngah gungs mas mauh zang los.

¹⁶Ngos thyimha dvja yap joq zis nyvng; ngos yoeuh tsuk toh laus eq hauh zis cha nghuot zis ngos ma yoh taiq. Hauh thang lhyi ngos hau sam masyah thwe dvkoeuq xauhgyo.

¹⁷Dius dvyuk gas Mangso thoq lyis zes yoh dan lhyeh? Dvyuk yuk gas gvnkhanh soeu thoq lyis zes yoh gyingshang lhyeh?

¹⁸Mangso ka nyah maukhung jyeidwis jens lyis ma loms; nyah loeuswons bang lyis yangh yobos huon.

¹⁹Naus lyis teh yoh mhont tyamp, tsohmop tsohnyhon yah kuot toh zis xauh bang lyis nyang loms das oen nghamh lhyeh?

²⁰Yang nvp lyis kang dwis nyeis mvbeh, nghuot laus eq nyenhthang ma jweh shih lyis hank eq ma soh kat shei loh.

²¹Yang yoh zis dvnganh yoeus tyamp dyei. Yang joeui ma bos zis tsain shei loh.