Read Achang YOBA 40 Bible Online

YOBA 40 - Achang bible

YOBA 40

¹Yoba eh, nvng Yomzains Mangso lhyi loqyom tyonh. Gvshih nvng vsomh kham das lah, phuk taiq das lah, ge.

³Yoba YHENSAIN lhyi phuk taiq zis gas, YHENSAIN eh, ngos vkoh vpaq taiq goeus. Ngos cha yoh phuk das? Ngos cha ma taiq lo.

⁵Ngos taiq gis thoq lyis zes shoq taiq tyamp goeus, ge.

⁶Hauh thang lhyi YHENSAIN lyeisjyang mhayah Yoba lyis dvlhain doms jis.

⁷Zungh zungh toq yap las ngos nyei zis toeuh aq.

⁸Nvng ngos lyi ma jus cho lhyi tungh kyink nyeis lhyeh? Nvng ngos lyis ma jus yvmas toh las nvnyang gas jus yvmas nyeis lhyeh?

⁹Nvng ngos teh yombos lhyeh? Nah thwe ngah maujau thwe iq yoh than lhyeh?

¹⁰Nghuot lyis gas nah nyoqnho ngelang yahge nah khwank cho mha toq yap aq. Shoenkkhyi yahge phunk lyis wuot toh aq.

¹¹Khwank bang lyis yoeuh aq, nvng nhaiqyo zis huot khyoq, ehnyet nyhen nhang aq.

¹²Nghuot goeus, nyamoq lyis yoeuh las duon khyoq aq; lhung bang lyis nyamoq yap yvmas thungh thyi aq.

¹³Nyamoq dvnganh lyis nyeisjvng mas nyhop tyamp aq; nyamoq lyis shei mau mas twih toh aq.

¹⁴Housoeh lyis ngos gas nvng lyis cangxeih chungh soeu nghuot das, nvng nvnyang ung cho yoh goeus oen rhen das.

¹⁵Hau kuh dah dumbau[18] lyis yoeuh aq, ngos nyang lyis gvnkhanh toh, ngos nvng lyis eq gvnkhanh toh. Nyang gas noeu teh mhanh zo nyeis.

¹⁶Nghuot laus eq nyah gungs mas yom kha iq bos, nyah gyi mas yomsoq kha iq bos.

¹⁷Nyah lhyank gas arit zains teh toeutsung, nyah khyei mha dah gyi gas yombos.

¹⁸Nyah shohyau gas thunk teh yombos, nyah khyei eq thyeq tungh teh nghuot.

¹⁹Ngos gvnkhanh toh zis dvnganh mas mauh thank zis nghuot. Nyang lyis gvnkhanh soeu kyingh nyang lyis dvyoh ung.

²⁰Yewus jens pant dah jing mas mhanh gas nyang lyis tsoh bes kat.[19]

²¹Nyang gas zoeu gyomh khyei mha whop joq, thomhbop jvmbu gyomh mas tamh joq.

²²Zoeugyomh yahge jeislo lvng yvm mas dah gyvlung zains gas nyamoq dah buisshen yah nyang lyis khaugus dyei.

²³Nyang jeisje los yvlyis ma gyuk; Yodan lvng nyah nyoqnho mha bat los laus eq nyang nyens nyens dvnyeis.

²⁴Nyang lyis nyah nyoq chet las hank yoh nyhik das? Lhyik mas nyah nho lhyi hank yoh nyhik das?