Read Achang YOBA 41 Bible Online

YOBA 41 - Achang bible

YOBA 41

¹Nvng mvnjung lyis oengnghweh yah yoh nyhik lhyeh? Nyah lhyo lhyi twih yah yoh twih lah?

²Nyah nho lhyi twih yoh chuq kat lhyeh? Nyah am mha nghweh yoh jauh lhyeh?

³Nyang nvng lyis kat kat aq ge dung das lhyeh? Nyang nvng lyis nhaiqnyen das xiklyis shangphu das lhyeh?

⁴Nyang nvng lyis vcaiq vto phuqsoe das ge, nvng yah xamxonh las dangthoengh toh das lah?

⁵Nvng, nyang lyis nyhoeu dah nghoq lyis twih teh yoh twih das lah? Nvng nyang lyis nah jyeidwis vmesbih jens lyis pyo nhang dah vyhang teh yoh kuot das lah?

⁶Oeng nhoh bang nyang lyis kya dyet das lah? Soenghi jens nyang lyis chap ungh das lah?

⁷Nyah yeis lyis oeng thauh lham yah yoh dyingh nhang lhyeh? Nghuot ya nyah uhloms lyis lham dung yah yoh thauh phank lhyeh?

⁸Nyang lyis dvlhain zangh lyis nvng khanhamp eq ma doms shi yoeuh lo das. Nvng hau zan goh cho khanhamp eq ma tohnyhik lo das.

⁹Mvnjung lyis nyvng soeu hank laus eq womh cho chithyuk las nyeisjvng mas lains loh.

¹⁰Nyang lyis zeh lyis nyang gyukphoh nghuot las hank eq nyah xik mas hank eq ma womh yap das.

¹¹Nyang lyis zan lyis jesluiq zis hank? Mungkvn gonh mas hank eq ma yoh kuot.[20]

¹²Mvnjung dah khyei cho yahge nyang kha iq kuh las kha iq yombos cho ngos nvng lyis taiq kyoh bah.

¹³Nyah thoq dyi lyis hank ma yoh lang chuiq. Nghuot ya nyang wuot toh dah gos lyis hank ma yoh thauh phank.

¹⁴Gyukphoh zwis jvng yah dyingh joq dah nyah am lhyi phank shoq hank yoh kuot?

¹⁵Nyah gvnungh[21] gas gos jvng yah kuot toh, hauh zis dvgeh toek toek dap las luk teh than.

¹⁶Dvkyvp yah dvkyvp toenk toenk dapgoh joq las jo mas soq yangh ma yoh wvng.

¹⁷Dvkyvp yah dvkyvp dvgeh kyent dap joq las cha yah khanhamp eq ma yoh lang sanh.

¹⁸Nyang jyei lhyi nyi bvng los, nyah nyoqjeih gas buis canh los teh bvng.

¹⁹Nyah nhuot masyah nyilhyam thuq, nyijyenh thyoh thyoh thuq los.

²⁰Nyah nho mhayah nyikhauh thuq nyeis. Auh chuk mas ngeh las tsoeu nyeis teh nghuot.

²¹Nyang soqshe lhyi nyi ngeh nyeis, nyah nhuot masyah nyi duk dyvm thuq los.

²²Nyah lainzain gas yomsoq svsoh bos las nyang yah xauhgoh bang dvnganh gas gyuk.

²³Nyah shoh mas nhuk dah vdwang yangh thyeq teh than.

²⁴Nyah lukzains nhaiqlom gas ma gyuk, houka mhoq teh than.

²⁵Nyang toq los lyis yombos thank bang[22] yangh dvn. Nyamoq gyuk las cha ma daq kuot lo.

²⁶Nyang lyis dvm yoh tap das moengsa ma joq; Nyang lyis yoh nos nhang das lham, nyo, jeszis ma bos.

²⁷Nyah xiklyis thyeq gas huhyau teh ma goeng, thunk gas saiq yom teh nhamp.

²⁸Nyang lyis yoh phang nhang dah nyo ma bos. Nyang lyis luk yah doeuh zis gas huhyau khvt teh dvnghuot.

²⁹Lhamloq gas nyah xiklyis huhyau dvkhvt dvnghuot. Dius jens lham yah guons lyis nyang yis.

³⁰Nyah womdau mas dah vkyvp gas auhjvp teh zoeu; houka thomhbop yos lyis kyeq loh teh lang chuiq loh.

³¹Nyang thomh lyis jeis tsoeu teh muk nhang lha, houka coeu auh tsoeu teh jeis nyop toq nhang.

³²Nyang lai loh dah thang mha bvng dah vkhyoh dwvng loh las thomh gas jeisnyop thyoeu loh.

³³Nyeisjvng thoq mas nyang yah byi das zis cha ma bos: nyang gas gyuk zis ma bos dah gvnkhanh toh zis xauh.

³⁴Nyang gas khwank thank dah gaunyhauq lyis yangh chaxwe ma nhang; nyang gas mhanhdyvp mas yewus dvnganh dah hwankti nghuot, ge.