Read Achang YOBA 42 Bible Online

YOBA 42 - Achang bible

YOBA 42

¹Hauh thang lhyi Yoba YHENSAIN lhyi phuk taiq.

²YHENSAIN eh, nvng gas yomsoq dvnganh bos las nvng o zis dvnganh yoh kuot yvlyis ngos seq.

³Ngos cha ma seq uhlyis, nah joeui cho khasoeh womh nyei, ge nvng ngos lyis nyei. Ngos ma seqgyo cho ngos taiq, ngah xiklyis seq das zis nyo kuh dah mauhphoh cho ngos taiq.

⁴Nvng ngos lyis, nvng taiq nyeis uhlyis gyo las nah nyeidang lyis phuk yoeuh aq, ge.

⁵Xik pheh gas ngos lyis gohyuk taiq kyoh las kyingh seq, nghuot laus eq gvshih gas ngvnyang nyoqjeih yah nyvng goeus.

⁶Housoeh las ngos taiq goeus zis dvnganh lyis xoq las tsohmop yahge nyiyvp mas auhuiq.

⁷YHENSAIN hauh zis Yoba lyis dye taiq thang lhyi Elipha lyis taiq zis gas, Ngos nvng yahge nah dyenschangh aiq yuk lyis nhaiqyo. Khasoeh ge lyis ngah jyeidwis Yoba kuot teh , nvng ngah cho jyoeng zis ma taiq.

⁸Gvshih nvng noeulu nyhet doeu, yvng lus nyhet doeu ngah jyeidwis Yoba jyank mas she loh las nah xiklyis phudyei aq. Ngah jyeidwis Yoba nah xiklyis shvmanh dung dyei das, ngos nyang dung zis gyo dyei das las nvng kuot zis mon-yih khyvlyis xoq ma phuh nhang das. Nvng ngah cho ngah jyeidwis Yoba kuot teh jyoeng zis ma taiq.

⁹Teman dius Elipha, Shuhite dius Bildad yahge Nama dius Zopha gas YHENSAIN kuot nhang khyvlyis kuot las, YHENSAIN eq Yoba dah shvmanh dung dang gyo dyei.

¹⁰Housoeh Yoba gas nyah dyenschangh somh yuk xiklyis shvmanh dye dung thang lhyi, YHENSAIN ka nyang lyis nyeisgis yap doms lhoq nhang lha nyang lyis xikpheh thoq lyis aiq huon doms dyei.

¹¹Yoba dah vmang vnoeuh, xikpheh dah dyenschangh jens dvnganh nyah jyank mas kwang los las nyah yhen mha nyang yah dvgeh pwe zo shuk. Nyamoq sainh nos cho tsain taiq las YHENSAIN nyah jyank mas she los dyei dah yau cho xiklyis nhaiqtaink dyei. Nyamoq gas nyang lyis ngwis dvkhamh yahge xing loqkyop dvyuk dvkoeuq dyei.

¹²YHENSAIN ka Yoba dah kang dwis cho thang thank vbon mas xik pheh shvmanh dyei thoq lyis zes shoq shvmanh dyei. Yoba gas yvng dvmons nyei khyoengh, gola-u khyuk khyoengh, noeu kya dvkhyoengh, yahge mauhlyihzoe dvkhyoengh yoh.

¹³Nyang gas loloeu nyhet yuk yahge lonyi somh yuk dah uwus nghuot.

¹⁴Nyang lonyi xeih lyis khotjyauh ge dah vjyuk yah Yemima, aiq vyuk lyis xangh shom ge dah vjyuk yah Kezia, ngis thank vyuk lyis nyoq cauh cheih kwilo ge vjyuk yah Keren Hapu ge lui.

¹⁵Mungkvn gonh mas Yoba dah lonyi jens iq yungh dah vmesbih hank ma bos. Nyamoq dah uwus gas nyamoq lyis nyamoq dah vmang moq yah dvgeh yhenzis vso gvm dyei.

¹⁶Hauh zis dye thang lhyi Yoba gas dvxo nyeici zvn nyeis shih las nyah nyeilo jens, nyah nyet jens eq nyvng khoq shih.

¹⁷Hauh thang lhyi Yoba gas nyenhkyi kuh las shei.