Read Achang YOBA 5 Bible Online

YOBA 5 - Achang bible

YOBA 5

¹Yoba, lui aq, nvng lyis hank ma toeuh das? Nvng yoh xoeu das loeuswons soeu hank bos?

²Vkoh vpaq nhaiqyo zis gas dius lyis sat. Noh zis gas joeui ma bos soeu lhyi shei nhang.

³Koh bang yuk-yos-tamh-tai teh yvlyis ngos nyvng, laus eq ngos nyamoq yhen mha nhoengh zis lvnyap khi khyoq.

⁴Nyamoq lo jens gas jesluiq joqyos khanhamp eq ma yoh xo nyvng; soetuon jang mas nyamoq lyis khomp das zis hank ma toq yap.

⁵Yuot bang gas koh soeu dah jyo nyau - zoeu gyomh mas yuk dah jyo yangh[1] zo das. Shet bang gas nyah zisyos lyis noh.

⁶Ma gis cho ka tsoh mas ma yuk, yau cho eq nyeisjvng masyah ma yuk thuq los.

⁷Jyoengh ma nghuot! Jyoengh nyang nyijyenh gas nyi masyah thuq los teh yau cho eq yvnyang dvshe los.

⁸Ngos nvng dvnghuot lyis gas, ngos Mangso jyank pheh xoeu das las ngah soe nyang lyis kyauh das.

⁹Nyang kuot dah kuhxing cho yahge ma thoq thank lo dah nyah yomsoq muh lyis yang ma seqgyo.

¹⁰Nyang gas nyeisjvng mas mau wus nhang lha maunyeis mas jeis dyei.

¹¹Nghuot goeus, nhaiqlom nyhen mha gyoh bang lyis toeushap soeu ka Mangso nghuot, nyang kuk bang dvnganh lyis gauslaus cho dyei.

¹²Nyang gas nhaiqlom guih bang dah toeuq cho lhoeu nhunk dyei. Joeui bos bang lyis nyamoq dah joeui da yvmas nyih nhang. Housoeh las nyamoq kuot zis cha eq ma ung.

¹⁴Nyamoq nyeih lyis mauchuotdwang yah xauhgoh; nyeihgungs lyis yangh nyenh lyis teh sopwu yenh.

¹⁵Nghuot laus eq Mangso ka shohjyen bang lyis shei cho mhayah, nyungs bang lyis zaiq cho mhayah khyuot yoeus.

¹⁶Nyang gas shohjyen bang lyis nghamhloms cho dyei, lhung bang lyis tsoek yah nyeis nhang.

¹⁷Mangso yah soq dyei zis xauh soeu ka pyo: housoeh las Yomzains nyho lhyi chaxwe ma nhang vkuot.

¹⁸Mangso ka nyang tap dah dvm lyis lyet dyei; nyah loq yah nvng lyis nos nhang lha nyah loq yah yhoh.

¹⁹Nyang nvng lyis nos nhang ja masyah dvlhain thang lhyi dvlhain khyuot yoeus das.

²⁰Phanghkhauq los lyis nyang nvng lyis dwis nyeis nhang das. Jeszan lyis shei masyah gos dyei das.

²¹Mangso ka nvng lyis jwangh masyah khyuot das; dyoqbis cho jweh los lyis nyang nvng lyis khyuot yoeus das.

²²Nvng thyoqpi cho yahge yuot shet cho lhyi yis das, yewus lyis eq ma gyuk noh.

²³Nvng phuk dah yos mas luk ma joq das; yewus eq nvng lyis khanhamp eq ma ngat das.

²⁴Housoeh las nvng nah zvng mas nyenstap zis yah nyeis das. Nah yvng jens lyis yoeuh kat lyis eq jesluiq zis nyvng das.

²⁵Katjang mas mhanh huq nyo teh nvng lo jens nyoshoq yoh das.

²⁶Jyo yhomh shishenh lyis nyhink dah gukphu, teh nvng mang shoq nyeis das.

²⁷Yoba eh, ngamoq haih cho nyangh nyangh xuq las seq goeus. Haih zis gas jus, housoeh las gvshih haih yvlyis lhom yoeus aq, ge.