Read Achang YOBA 6 Bible Online

YOBA 6 - Achang bible

YOBA 6

¹Ngos yau cho yahge kuk cho jvng mas kat laiq lyis,

³hauh zis thomh mas sihsho thoq lyis zes lyei das. Housoeh las ngos dang taiq zes zis gas nvng lyis ma mauh nhang das.

⁴Yomzains Mangso ka ngos lyis nyo yah baiq las hau nyonoq gas ngah gungs mas dyos loh. Mangso dah gyukphoh zis gas ngos lyis tsain chomp tyi toh.

⁵Mauhlyihzoe gas mhanh zo lyis nhaiqtap. Noeu eq huhyau zo nyeis lyis tsoeklo nghuot.

⁶Nghuot laus eq coh ma kat, whitau ma bos zonoms hank yoh zo? Uq yhei vthyoeu mha chah whitau bos?

⁷Housoeh teh zonoms gas ngah xiklyis whitau ma bos, ngos zo zis dvnganh ngos lyis dvnos nhang.[2]

⁸Ngos sang zis Mangso ngos lyis chamus ma dyei? Ngos dung zis nyang chamus ma toeuh dyei?

⁹Nyang ngos lyis sat bas jungh; ngos lyis mhont das zis nyah loq ngos lyis duons bas jungh.

¹⁰Nyang ngos lyis sat das zis ngos seq ya, ngos kha iq nos laus eq gaus las dyvm das. Mangso ka gyingshang yvlyis ngos seq, nyang tying yvlyis ngos khanhamp eq ma ngoek.

¹¹Ngos kang tsoq dwis das nyhenshang chah yom bos das lah? Nghamhloms cho ma bos zis chamus kang dwis shih das?

¹²Ngos lyis luk yah kuot toh lhyeh? Ngah gungsdom gas thunk nghuot lhyeh?

¹³Ngvnyang khyuot yoeus zo das nyhenshang yom ma bos lo. Pangh das nyhenshang kha pheh eq ma yoh xoeu lo.

¹⁴Ngos Mangso lhyi tyamp laus ma tyamp laus, heisoeh teh yau cho mha ngos wontang dah dyenschangh chah.

¹⁵Nghuot laus eq ngah dyenschangh jens namoq gas jeislo lvng gas mau ma wus lyis kyuk tyamp teh ngos lyis tsain mhuih.

¹⁶Hauh jeislo lvng jens gas gyu yah nghan yah gyamh tyamp.

¹⁷nghuot laus eq gywes los lyis hauh zis dyuk loh las jeiskhyoh mas cha ma bos kyuk joq.

¹⁸Gyung suh bang jeis xo ma nyvng. Nyamoq suh whang las mhanhdyvp mas shei loh.

¹⁹Tema yahge Sheba masyah gyung suh bang jeis xo.

²⁰Nghuot laus eq nyamoq nghamhloms cho ka hau jeislo lvng kyuk dah vyvm mas shei.

²¹Namoq gas ngah xiklyis hau kyuk dah jeislo lvng jens teh nghuot. Namoq gas ngah uhpui loqkyoq lyis nyvng las gyuk zis yah nungs jik loh.

²²Ngos namoq lyis, Ngos lyis jyungshuk dyei geh, nghuot ya ngah nyhenshang dvyuk yuk lyis khauwhot bos dyei geh,

²³nghuot ya ngos lyis jeswus loq masyah, lhoeng soeu loq masyah khyuot yoeus geh, oen sang ku lhyeh?

²⁴Nghuot goeus, ngos lyis jyauh geh, ngah yobos taiq geh, ngos samlo gyo das.

²⁵Jus dah dang kha iq mvnbos! Nghuot laus eq namoq gas vjyuk ma bos dang taiq.

²⁶Nvng nghamh lyis ngos lyeis dang dvtaiq nyeis oen lhyeh? Housoeh lyis nvng chamus ngos lyis yomgyau dang taiq?

²⁷Namoq gas chauhlo jens lyis jons kuot das zis doeugoh, nah dyenschangh kau jens lyis phauh ma tap ungh zo las nvng dis shoq kuot.

²⁸Ngah nyoqnho lhyi yoeuh geh; ngos namoq lyis ma hwah das.

²⁹Namoq dah ehnyet thaiq geh, lyi ma bos cho no lo geh; ngos lyis dangthang vthyet goh, ngos dan cho mha bos.

³⁰Nghuot laus eq nvng ngos lyis hwah nyeis ge nghamh, ngos jus zis ma jus zis ma yoh taiq das, ge.